ନୂଆଦିଲ୍ଲୀ: ଜାମ୍ମୁ କାଶ୍ମୀରର କୁପୱାଡ଼ାରେ ସେନାର ୧୬ ଯବାନ ଏବଂ ଅଫିସରଙ୍କ ବିରୋଧରେ ହତ୍ୟା ଉଦ୍ୟମ ଏବଂ ଡକାୟତି ମାମଲା ରୁଜୁ କରାଯାଇଛି । ଏଥିରେ ତିନି ଜଣ ଲେଫ୍ଟିନାଣ୍ଟ କର୍ଣ୍ଣେଲଙ୍କ ମଧ୍ୟ ସାମିଲ ଅଛନ୍ତି । ମଙ୍ଗଳବାର ବିଳମ୍ୱିତ ରାତିରେ କୁପୱାଡା ପୋଲିସ ଥାନାରେ ଆକ୍ରମଣ କରିବା ଅଭିଯୋଗରେ ଯବାନଙ୍କ ବିରୋଧରେ ମାମଲା ରୁଜୁ ହୋଇଛି । ଅଭିଯୋଗ ଅନୁସାରେ ଟେରିଟୋରିୟମ ଆର୍ମିର ଜଣେ ଯବାନଙ୍କୁ ପୋଲିସ ପଚରାଉଚରା କରିଥିଲା । ଏଥିରେ ସେନାର ଯବାନ ରାଗି ଯାଇ ପୋଲିସ ଥାନା ଉପରେ ଆକ୍ରମଣ କରିଥିଲେ । ପୋଲିସର କହିବା ଅନୁସାରେ କଥିତ ଡ୍ରଗ୍ସ କେସର ଅଭିଯୋଗରେ ଯବାନଙ୍କୁ ପଚରାଉଚରା କରାଯାଇଥିଲା ।
ଏହାର ଏକ ଭିଡିଓ ମଧ୍ୟ ଜାରି କରାଯାଇଛି । ପୋଲିସ ଅଧିକାରୀଙ୍କ କହିବା ଅନୁସାରେ ସେନାର ଯବାନ ଆକ୍ରମଣ ସମୟରେ ବର୍ଦ୍ଦିରେ ଥିଲେ ଏବଂ ହତିଆର ସହ ଥିଲେ । ତାଙ୍କ ସହ ଅନେକ ବରିଷ୍ଠ ଅଧିକାରୀ ମଧ୍ୟ ଥିଲେ । ଟେରିଟୋରିୟଲ ଆର୍ମି ଭାରତୀୟ ସେନାର ଏକ ୱିଙ୍ଗ ଅଟେ, ଯାହାକୁ ରିଜର୍ଭ ଫୋର୍ସ ରୂପେ ରଖାଯାଇଥାଏ । ଏଥିରେ ପାର୍ଟ ଟାଇମ୍ ଭଲିଣ୍ଟିୟର ମଧ୍ୟ ସାମିଲ ଥାନ୍ତି, ଯେଉଁମାନେ ସେନାକୁ ଅପରେସନ ସମୟରେ ସାହାଯ୍ୟ କରିନ୍ତି । ପୋଲିସ ଏଫଆଇଆର ଅନୁସାରେ କର୍ଣ୍ଣେଲ ଅଙ୍କିତ୍ ସୁଦ, ରାଜୀବ ଚୌହାନ ଏବଂ ନିଖିଲଙ୍କ ନେତୃତ୍ୱରେ ସେନାର ଯବାନ ପୋଲିସ ଥାନାରେ ପଶିଥିଲେ ।
ସେନାର ଯବାନମାନେ ଥାନାରେ ଉପସ୍ଥିତ ପୋଲିସକର୍ମୀଙ୍କ ଉପରେ ଆକ୍ରମଣ କରିଥିଲେ । ସେମାନେ ଧରିଥିବା ରାଇଫଲରେ ମାଡ଼ ମାରିଥିଲେ । ଏହା ବ୍ୟତୀତ ବିନା କୌଣସି ଯୁକ୍ତିରେ ଲାଠି ଏବଂ ବାଡ଼ିରେ ମାଡ଼ ମାରିଥିଲେ । ଅଭିଯୋଗ ଯେ ମାଡ଼ ମାରିବା ପରେ ସେନାର ଯବାନମାନେ ପୋଲିସକର୍ମୀଙ୍କ ମୋବାଇଲ୍ ରଖି ନେଇଥିଲେ । ଏହା ବ୍ୟତୀତ ଜଣେ ପୋଲିସକର୍ମୀଙ୍କୁ ଅପହରଣ ମଧ୍ୟ କରି ନେଇଥିଲେ । ଘଟଣା ବିଷୟରେ ବରିଷ୍ଠ ପୋଲିସ ଅଧିକାରୀଙ୍କୁ ସୂଚନା ମିଳିବା ପରେ ସେମାନେ ଆକ୍ସନକୁ ଆସିଥିଲେ ଏବଂ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ । ଏହି ମାମଲାର ତଦନ୍ତ କୁପୱାଡାର ଡିଏସପି କରୁଛନ୍ତି । ଅଧିକାରୀଙ୍କ କହିବା ଅନୁସାରେ ଏହି ମାମଲାର ବିସ୍ତୃତ ତଦନ୍ତ ହେବ ଏବଂ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ । ଏହି ମାମଲାରେ ସେନାର ବୟାନ ମଧ୍ୟ ଆସିଛି । ଶ୍ରୀନଗର ସ୍ଥିତି ସେନାର ମୁଖପାତ୍ର କହିଛନ୍ତି ଯେ ଏହି ମାମଲା ସେତେ ବଡ଼ ନୁହେଁ । ସେ କହିଛନ୍ତି ଯେ ପୋଲିସକର୍ମୀଙ୍କୁ ମାଡ଼ ମାରିବା ଖବର ଭୁଲ ଏବଂ ଗୁଜବ ଅଟେ । ସେ କହିଛନ୍ତି ଯେ ଏକ ଅପରେସନ ମେଣ୍ଟରରେ ପୋଲିସକର୍ମୀ ଏବଂ ଟେରିଟୋରିଆଲ୍ ଆର୍ମି ମଧ୍ୟରେ ସାମାନ୍ୟ ମତଭେଦ ଥିଲା, ଯାହାକୁ ଦୂର କରାଯାଇଛି ।