ଇଞ୍ଜେକ୍ସନ ନେବା ପରେ ଗିଲଙ୍କୁ ୨୧ ଦିନ ଆରାମ, ହାର୍ଦ୍ଦିକଙ୍କୁ ନେଇ ଆସିଲା ଗୁଡ୍ ନ୍ୟୁଜ୍

ନୂଆଦିଲ୍ଲୀ: ଭାରତ ସଂପ୍ରତି ଦକ୍ଷିଣ ଆଫ୍ରିକା ବିପକ୍ଷରେ ଦିନିକିଆ ସିରିଜ୍ ଖେଳୁଛି। ଏହା ପରେ ଡିସେମ୍ବର ୯ରୁ ଆରମ୍ଭ ହେବ ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍। କିନ୍ତୁ ଏ ପର୍ଯ୍ୟନ୍ତ ଦଳ ଘୋଷଣା ହୋଇନି। ଏହାର କାରଣ ଓପନର ଶୁଭମନ ଗିଲ୍‌ଙ୍କ ଆହତ ହେବା। ତାଙ୍କର ଫିଟ୍ ହେବାକୁ ଅପେକ୍ଷା କରିଛନ୍ତି ଚୟନକର୍ତ୍ତା। ଏହି କ୍ରମରେ ଉପଅଧିନାୟକ ଶୁଭମନ ଗିଲ୍ ଫିଟନେସ୍ ଆକଳନ ପାଇଁ ସୋମବାର ବେଙ୍ଗାଲୁରୁର ସେଣ୍ଟର ଅଫ ଏକ୍ସିଲେନ୍ସ ପହଞ୍ଚିଛନ୍ତି। ଏହି ଆକଳନର ପରିଣାମ ଆଧାରରେ ଗିଲଙ୍କୁ ଟି-୨୦ ଦଳରେ ସାମିଲ୍ କରାଯିବ କି ନାହିଁ ନିଷ୍ପତ୍ତି ନିଆଯିବ। ଦକ୍ଷିଣ ଆଫ୍ରିକା ବିପକ୍ଷ କୋଲକାତାରେ ପ୍ରଥମ ଟେଷ୍ଟର ଦ୍ଵିତୀୟ ଦିନରେ ବ୍ୟାଟିଂ କରିବା ବେଳେ ଗିଲଙ୍କ ବେକରେ ଆଘାତ ଲାଗିଥିଲା। ଏହା ପରେ ସେ ୨ୟ ଟେଷ୍ଟ ଏବଂ ଦିନିକିଆ ସିରିଜ୍ରୁ ବାଦ୍ ପଡ଼ିଛନ୍ତି।

ଭାରତର ଟି-୨୦ ଦଳରେ କୌଣସି ଚକିତ କରିବା ଭଳି ନାଁ ସାମିଲ୍ କରାଯିବାର ଆଶା ବହୁତ କମ। ଯଦି କୌଣସି ଖେଳାଳି ଆହତ ହୁଅନ୍ତି ତେବେ ଅନ୍ୟ ଖେଳାଳିଙ୍କୁ ସାମିଲ୍ କରାଯାଇପାରେ। ସେଣ୍ଟର ଅଫ ଏକ୍ସିଲେନ୍ସର କ୍ରୀଡ଼ା ବିଜ୍ଞାନରୁ ଗିଲ୍ଙ୍କ ରିପୋର୍ଟକୁ ଅପେକ୍ଷା କରିଛି ଅଜିତ ଅଗରକରଙ୍କ ନେତୃତ୍ଵାଧୀନ ଚୟନ କମିଟି। ବିସିସିଆଇର ଜନୈକ ଅଧିକାରୀ କହିଛନ୍ତି, ଗିଲଙ୍କୁ ଇଞ୍ଜେକ୍ସନ ଦିଆଯାଇଥିଲା ଏବଂ ୨୧ ଦିନ ବିଶ୍ରାମ ନେବାକୁ ପରାମର୍ଶ ଦିଆଯାଇଥିଲା।

ଜନୈକ ଅଧିକାରୀ କହିଛନ୍ତି, ଟ୍ରେନିଂ ସମୟରେ ଗିଲ୍ଙ୍କ ଗତିବିଧିର ଆକଳନ ନ କରିବା ଯାଏଁ କିଛି କହି ହେବନି। ଏହା ମଧ୍ୟ ଜଣା ନାହିଁ ଯେ, ବ୍ୟାଟିଂ କରିବା ସମୟରେ ସେ ନିଜକୁ ସହଜ ଅନୁଭବ କରିବେ କି ନାହିଁ। ବର୍ତ୍ତମାନର ସ୍ଥିତି ଦେକିଲେ ଗିଲଙ୍କ ଦକ୍ଷିଣ ଆଫ୍ରିକା ବିପକ୍ଷ ଟି-୨୦ ସିରିଜ୍ ଖେଳିବାର ସମ୍ଭାବନା ୫୦ ପ୍ରତିଶତ ରହିଛି। ଅନ୍ୟପଟେ ଭାରତୀୟ ପ୍ରଶଂସକଙ୍କ ପାଇଁ ଖୁସିର ଖବର ଯେ, ତାରକା ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ସଂପୂର୍ଣ୍ଣ ଫିଟ୍ ହୋଇ ଯାଇଛନ୍ତି। ତାଙ୍କୁ ସେଣ୍ଟର ଅଫ ଏକ୍ସିଲେନ୍ସରୁ ସ୍ଵୀକୃତି ମିଳି ଯାଇଛି। ସେ ମଙ୍ଗଳବାର ହାଇଦ୍ରାବାଦରେ ବରୋଦା ପାଇଁ ପଞ୍ଜାବ ବିପକ୍ଷରେ ସୈୟଦ ମୁସ୍ତାକ ଅଲ୍ଲୀ ଟ୍ରଫି ଖେଳିବେ। ଏଥିସହ ପ୍ରାୟ ଅଢେଇ ମାସ ପରେ ପଡ଼ିଆକୁ ଫେରିବେ ପାଣ୍ଡ୍ୟା। ଏହା ପରେ ଡିସେମ୍ବର ୪ରେ ବରୋଦା ବନାମ ଗୁଜରାଟ ମ୍ୟାଚରେ ଖେଳିବେ।

ଜାତୀୟ ଚୟନକର୍ତ୍ତା ପ୍ରଜ୍ଞାନ ଓଝା ଦୁଇ ମ୍ୟାଚ୍ ସମୟରେ ଉପସ୍ଥିତ ରହିବେ। ଦଳ ଚୟନ ପୂର୍ବରୁ ହାର୍ଦ୍ଦିକ ପାଣ୍ଡ୍ୟାଙ୍କ ଫିଟନେସ୍ ପରଖିବେ ଓଝା। ଜନୈକ ଅଧିକାରୀ କହିଛନ୍ତି, ଅକ୍ଟୋବର ୨୧ରୁ ନଭେମ୍ବର ୩୦ ପର୍ଯ୍ୟନ୍ତ ହାର୍ଦ୍ଦିକ ସେଣ୍ଟର ଅଫ ଏକ୍ସିଲେନ୍ସରୁ ବାହାରି ନ ଥିଲେ। ସେ ନିଜର ପୁନଃ ଥଇଥାନ ଓ ରିଟର୍ଣ୍ଣ ଟୁ ପ୍ଲେ ପ୍ରୋଟୋକଲ ପୂରା କରିଛନ୍ତି। ତାଙ୍କୁ ବ୍ୟାଟିଂ ଓ ବୋଲିଂ ଉଭୟ ପାଇଁ ସ୍ଵୀକୃତି ମିଳିଛି।