ଭଦ୍ରକ 15/04 : ଡିଜେ ବାଜିବା ଉପରେ ବ୍ୟାନ୍ କରିଥିଲେ ସୁପ୍ରିମକୋର୍ଟ।  କିନ୍ତୁ କେହି ମାନୁ ନାହାଁନ୍ତି ନିୟମ। ପୋଲିସ, ପ୍ରଶାସନ ନା ସାଧାରଣ ଜନତା। ପରେ  ଡିଜେକୁ ନେଇ  ଅଘଟଣ ହେଲେ କିଛି ଦିନ ପାଇଁ ନିଦରୁ ଉଠେ ପ୍ରଶାସନ, କାର୍ଯାନୁଷ୍ଠାନ ନିଏ। କିନ୍ତୁ ପରେ ସ୍ଥିତିରେ କୌଣସି ସୁଧାର ଆସେ ନାହିଁ। ଏମିତି କହିବାର କାରଣ ଭଦ୍ରକ ଜିଲ୍ଲାର ଗୋଟିଏ ଘଟଣା ଚିନ୍ତା ବଢ଼ାଇଛି। ପାଟୁଆ ଶୋଭାଯାତ୍ରା ବେଳେ ଡ଼ିଜେ ଗାଡ଼ି ବିଦ୍ୟୁତ୍ ସଂସ୍ପର୍ଶରେ ଆସି ଦୁଇ ଜଣ ମୃତ୍ୟୁ ବରଣ କରିଥିବା ବେଳେ ୧୦ ଜଣ ଗୁରୁତର ଅଛନ୍ତି ।

ଗାଁରେ ପାଟୁଆ ଯାତ୍ରା ପାଇଁ ଚାଲିଥିଲା ଶୋଭାଯାତ୍ରା। ଅନେକ ଅଞ୍ଚଳରୁ ଆସିଥିଲେ ଲୋକେ । ହଠାତ୍ ୧୧ କେଭି ତାରରେ ଲାଗି ଗଲା ଡିଜେ ଗାଡ଼ି। ସଙ୍ଗେ ସଙ୍ଗେ ବିଦ୍ୟୁତ୍ ଝଟକା ରେ ତଳେ ପଡିଗଲେ ଲୋକେ । କିଏ ରାସ୍ତା ଉପରେ ତ କିଏ ବିଲକୁ ଛିଟିକି ପଡ଼ିଥିଲେ । ଭଦ୍ରକ ଜିଲ୍ଲା ତିହିଡି ଥାନା ଅଧୀନ ନୟାନନ୍ଦ ପଂଚାୟତ ହଟୁଆରି ଗାଁର ଏହି ଘଟଣା।  କାଣ୍ଟି ମଙ୍ଗଳା ପୀଠକୁ ପାଟୁଆ ମାନେ ଶୋଭାଯାତ୍ରାରେ ଯାଉଥିବା ବେଳେ ଅଘଟଣ ଘଟିଥିଲା। ସ୍ଥାନୀୟ ଲୋକେ ଗୁରୁତର ଓ ଆହତଙ୍କୁ ଭଦ୍ରକ ମେଡିକାଲକୁ ଆଣିଥିଲେ। ଡାକ୍ତର ଦୁଇ ଜଣଙ୍କୁ ମୃତ ଘୋଷଣା କରିଥିବା ବେଳେ ୧୦ଜଣ ଗୁରୁତରଙ୍କୁ ଭଦ୍ରକ ମେଡିକାଲରେ ଭର୍ତ୍ତି କରାଯାଇଛି। ଆଉ ଦୁଇଜଣଙ୍କୁ କଟକ ମେଡିକାଲକୁ ସ୍ଥାନାନ୍ତର କରାଯାଇଛି। ମୃତକ ଦୁଇ ଜଣ ମାନସ ମଲ୍ଲିକ ଓ ଶରତ ମହାଳିକ ବୋଲି ସୂଚନା ମିଳିଛି। ଗୁରୁତରଙ୍କ ମଧ୍ୟରେ ମହିଳା ଓ ଶିଶୁଙ୍କ ସଂଖ୍ୟା ଅଧିକ ରହିଛି। ରାଜ୍ୟ ବିଜେପି ସଭାପତି, ଭଦ୍ରକ ଜିଲ୍ଲାପାଳ, ମେଡିକାଲରେ ପହଞ୍ଚି ଗୁରୁତରଙ୍କୁ ଭେଟିଥିଲେ । 

ଭଦ୍ରକ ପୋଲିସ୍ କେବଳ ସାଉଣ୍ଡ ବକ୍ସକୁ ଜବତ କରିଛି, କିନ୍ତୁ ଡିଜେ ମେସିନ ଓ ଗାଡ଼ି ପଶ୍ଚିମବଙ୍ଗକୁ ଫେରାର ହୋଇଯାଇଥିବା ଖବର ମିଳିଛି । ତେବେ ଖୁବଶୀଘ୍ର ସେହି ଡିଜେକୁ ଜବତ୍ କରାଯିବା ନେଇ ଟିମ୍ କାମ କରୁଛି ବୋଲି କହିଛନ୍ତି ପୋଲିସ ଅଧିକାରୀ। ପୋଲିସ ଓ ପ୍ରଶାସନ କହିଛନ୍ତି ଯେ ଡିଜେ ପାଇଁ ଅନୁମତି ନେଇ ନଥିଲେ।  କିନ୍ତୁ ଏଠି ପ୍ରଶ୍ନ ଉଠୁଛି ଯଦି ଏତେ ବଡ ଆୟୋଜନ ହୋଇଥିଲା ତେବେ ପୋଲିସ ପାଖରେ କଣ ଖବର ନଥିଲା କି ? ଯଦି ପୋଲିସ ଡିଜେକୁ ନେଇ ଖବର ପାଇଥିଲା ତେବେ ବନ୍ଦ୍ କଲା ନାହିଁ କଣ ପାଇଁ ? ଏପଟେ  ଅତିରିକ୍ତ ଏସପି କହିଛନ୍ତି ଡିଜେର ସ୍ପିକର ଗୁଡ଼ିକ ଜବତ୍ ହୋଇଛି। ମାମଲା ରୁଜୁ କରିଛି ତିହିଡି ପୋଲିସ । ଏସଡିପିଓ ଙ୍କ ତତ୍ତ୍ୱାବଧାନରେ ତଦନ୍ତ ହେଉଛି। ଯିଏ ବି ଦୋଷୀ ନିଶ୍ଚିତ ଦଣ୍ଡ ପାଇବେ ।