ନୂଆଦିଲ୍ଲୀ: ୟୁରୋପୀୟ ଦେଶ ଲକ୍ସେମବର୍ଗରେ ମିଳିଲା ରୋମାନ ଯୁଗର ସ୍ୱର୍ଣ୍ଣମୁଦ୍ରା। ଗୋଟିଏ କି ଦୁଇଟି ନୁହେଁ ୧୪୧ଟି ସ୍ୱର୍ଣ୍ଣମୁଦ୍ରା। ଯାହାର ମୂଲ୍ୟକୁ ଆକଳନ କରିବା ବି ମୁସ୍କିଲ। ଏହି ମୁଦ୍ରା ପ୍ରାୟ ୧୭୦୦ ବର୍ଷ ତଳର ପୁରୁଣା। 2020 ରୁ 2024 ପର୍ଯ୍ୟନ୍ତ ଚାଲିଥିବା ଖନନ ସମୟରେ ଏସବୁ ମିଳିଥିଲା, ଯାହା ବିଷୟରେ ଏବେ ସୂଚନା ଦେଇଛନ୍ତି ଗବେଷକ
ଉତ୍ତର ଲକ୍ସେମବର୍ଗର ହୋଲଜଥମ୍। ଏହି ଅଞ୍ଚଳରେ ଟାଓ୍ୱାର ପରି ଦେଖାଯାଉଥିବା ଛୋଟ ଦୁର୍ଗ ତଳୁ ୧୪୧ଟି ସ୍ୱର୍ଣ୍ଣ ମୁଦ୍ରା ପାଇଛନ୍ତି ପ୍ରତ୍ନତତ୍ୱବିତ। ଏହି ମୁଦ୍ରାଗୁଡ଼ିକ ଖ୍ରୀଷ୍ଟାବ୍ଦ 364ରୁ 408 ମଧ୍ୟରେ ପ୍ରଚଳିତ। ଏହାର ସନ୍ଧାନ ଐତିହାସିକ ଭାବରେ ଗୁରୁତ୍ୱପୂର୍ଣ୍ଣ। ଏଥିରୁ ସେହି ସମୟର ଅନେକ ନୂଆ ସୂଚନା ହାସଲ କରିହେବ ବୋଲି ଆଶା କରିଛନ୍ତି ପ୍ରତ୍ନତତ୍ତ୍ୱବିଦ। ଏହି ମୁଦ୍ରାଗୁଡ଼ିକର ମୂଲ୍ୟ ପ୍ରାୟ 3,22,000 ଆମେରିକୀୟ ଡଲାର ବା ୨୭୮ ଲକ୍ଷ। ଖନନ ସମୟରେ ଟିମ୍ ଅତି ସତର୍କତାର ସହ ଖୋଳିଥିଲା। କାରଣ ଏହି ଅଞ୍ଚଳରେ ଦ୍ୱିତୀୟ ବିଶ୍ୱଯୁଦ୍ଧର ଗୋଳାବାରୁଦ ଏବଂ ବିସ୍ଫୋରକ ପୋତାଯାଇଥିଲା।
ଏହି ସ୍ୱର୍ଣ୍ଣମୁଦ୍ରାରେ ଗବେଷକମାନେ ଏମିତି କିଛି ତଥ୍ୟ ପାଇଥିଲେ, ଯାହା ସେମାନଙ୍କୁ ଆଶ୍ଚର୍ଯ୍ୟ କରିଥିଲା। ପ୍ରତ୍ନତତ୍ୱବିତ୍ କହିଛନ୍ତି- ରୋମାନ ଯୁଗର ସମ୍ରାଟଙ୍କ ଜୀବନଶୈଳୀ ଓ ସେତେବେଳେର ଶାସନ ବ୍ୟବସ୍ଥାର ରହସ୍ୟ ଖୋଲୁଛି ଏହି ପ୍ରାଚୀନ ମୁଦ୍ରା।
ଲାଇଭ୍ ସାଇନ୍ସ ରିପୋର୍ଟ ଅନୁଯାୟୀ, ଏହି ମୁଦ୍ରାରେ ଆଠ ଜଣ ସମ୍ରାଟଙ୍କ ଚିତ୍ର ରହିଛି। ତିନୋଟି ମୁଦ୍ରାରେ ୟୁଜେନିୟସ୍ଙ୍କ ଚିତ୍ର ଥିଲା। ୟୁଜେନିୟସ୍ ପଶ୍ଚିମ ରୋମାନ୍ ସାମ୍ରାଜ୍ୟରେ ମାତ୍ର ଦୁଇ ବର୍ଷ ଅର୍ଥାତ ଖୀଷ୍ଟାବ୍ଦ ୩୯୨ରୁ ୩୯୪ ପର୍ଯ୍ୟନ୍ତ ଶାସନ କରିଥିଲେ। ୟୁଜେନିୟସ୍ ଜଣେ ଶିକ୍ଷକ ଏବଂ ଆଇନ୍ ଅଧିକାରୀ ଥିଲେ। ଜଣେ ଶକ୍ତିଶାଳୀ ସାମରିକ ଅଧିକାରୀ ତାଙ୍କୁ ସମ୍ରାଟ ଘୋଷଣା କରିଥିଲେ। ଏହି ଘଟଣାଟି ପଶ୍ଚିମ ସମ୍ରାଟ ଭାଲେଣ୍ଟିନିଆନ ଦ୍ୱିତୀୟଙ୍କ ମୃତ୍ୟୁଦଣ୍ଡ ପରେ ଏହା ଘଟିଥିଲା।
କିନ୍ତୁ ପୂର୍ବ ରୋମାନ୍ ସାମ୍ରାଜ୍ୟର ସମ୍ରାଟ ଥିଓଡୋସିୟସ୍ ପ୍ରଥମ ୟୁଜେନିୟସ୍ଙ୍କୁ ସମ୍ରାଟ ଭାବରେ ସ୍ୱୀକାର କରିବାକୁ ମନା କରିଦେଇଥିଲେ। ସେ ୟୁଜେନିୟସ୍ଙ୍କ ଧାର୍ମିକ ସହିଷ୍ଣୁତା ନୀତିକୁ ମଧ୍ୟ ପସନ୍ଦ କରିନଥିଲେ। ଫଳରେ ଏହା ଯୁଦ୍ଧର କାରଣ ହେଲା। ସେପ୍ଟେମ୍ବର ୩୯୪ରେ ଫ୍ରିଗିଡସ୍ ଯୁଦ୍ଧରେ ୟୁଜେନିୟସ୍ ପରାସ୍ତ ପରେ ତାଙ୍କୁ ହତ୍ୟା କରାଯାଇଥିଲା। ତେଣୁ, ତାଙ୍କର ମୁଦ୍ରା ବିରଳ, କାରଣ ତାଙ୍କ ଶାସନକାଳ ବହୁତ କମ୍ ଥିଲା। ଏହି ସୁନାମୁଦ୍ରାଗୁଡ଼ିକୁ 'ସଲିଡି' କୁହାଯାଏ। ଏହାର ଅର୍ଥ 'କଠିନ'। ଏହି ନାମଟି ସେମାନଙ୍କର ସୁନାର ଶୁଦ୍ଧତାକୁ ପ୍ରତିଫଳିତ କରେ। ପ୍ରତ୍ୟେକ ମୁଦ୍ରାର ଓଜନ ୦.୧୬ ଆଉନ୍ସ (୪.୫ ଗ୍ରାମ)। ତେବେ ସମ୍ପୂର୍ଣ୍ଣ ପ୍ରାଚୀନ ମୁଦ୍ରା ଭଣ୍ଡାର ଆବିଷ୍କାର ପ୍ରତ୍ନତାତ୍ତ୍ୱିକ ଅଧ୍ୟୟନ କରିବାରେ ସହାୟକ ହେବ।