ସରକାରୀ କର୍ମଚାରୀ ଏସଆଇଆର ଡ୍ୟୁଟି କରିବାକୁ ବାଧ୍ୟ, ସୁପ୍ରିମକୋର୍ଟଙ୍କ ନିର୍ଦ୍ଦେଶ

ନୂଆଦିଲ୍ଲୀ: ଭୋଟର ତାଲିକାର ସ୍ବତନ୍ତ୍ର ବ୍ୟାପକ ସଂଶୋଧନ (ଏସଆଇଆର) ଜାରି ରହିଛି । ୧୨ଟି ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳରେ ଏସଆଇଆର ଚାଲିଥିବା ବେଳେ ଏଥିଲାଗି ନିୟୋଜିତ କର୍ମଚାରୀଙ୍କ କାର୍ଯ୍ୟ ଚାପ ବୃଦ୍ଧି ପାଇଛି । ବିଶେଷ କରି ବ୍ଲକସ୍ତରୀୟ ଅଧିକାରୀ (ବିଏଲଓ) ଆତ୍ମହତ୍ୟା କରୁଥିବା ନେଇ ଖବର ମଧ୍ୟ ସାମ୍ନାକୁ ଆସୁଛି । ଏହାରି ଭିତରେ ସୁପ୍ରିମକୋର୍ଟ ଗୁରୁବାର ରାଜ୍ୟ ସରକାର ଏବଂ ରାଜ୍ୟ ନିର୍ବାଚନ ଅଧିକାରୀଙ୍କୁ ଗୁରୁତ୍ବପୂର୍ଣ୍ଣ ନିର୍ଦ୍ଦେଶ ଦେଇଛନ୍ତି ।

କାର୍ଯ୍ୟ ଚାପ କମ୍ କରିବା ଲାଗି ଅତିରିକ୍ତ କର୍ମଚାରୀ ନିଯୁକ୍ତ କରିବାକୁ କୋର୍ଟ କହିଛନ୍ତି । ସେପଟେ ନିର୍ବାଚନ ଆୟୋଗଙ୍କ ଦ୍ବାରା ନିଯୁକ୍ତ କର୍ମଚାରୀମାନେ ହିଁ ଏସଆଇଆର ଲାଗି କାମ କରିବେ ବୋଲି କହିଛନ୍ତି ସୁପ୍ରିମକୋର୍ଟ । ଯଦି କୌଣସି କର୍ମଚାରୀ ଛୁଟି ନେବାକୁ ଚାହିଁବେ, ତେବେ ତାଙ୍କ ପାଖରେ ଠୋସ୍ କାରଣ ଥିବା ଦରକାର । ପ୍ରଧାନ ବିଚାରପତି ସିଜେଆଇ ସୂର୍ଯ୍ୟକାନ୍ତ ଏବଂ ଜଷ୍ଟିସ୍ ଜୟମାଲ୍ୟା ବାଗଚୀଙ୍କ ଖଣ୍ଡପୀଠ କହିଛନ୍ତି, ସରକାରୀ କର୍ମଚାରୀ ଏସଆଇଆର ସହିତ ଅନ୍ୟ ସରକାରୀ କାର୍ଯ୍ୟ କରିବାକୁ ବାଧ୍ୟ । ନିର୍ବାଚନ ଆୟୋଗଙ୍କୁ ଆବଶ୍ୟକୀୟ କର୍ମଚାରୀ ଯୋଗାଇବା ରାଜ୍ୟ ସରକାରଙ୍କ କର୍ତ୍ତବ୍ୟ ।

ଖଣ୍ଡପୀଠ କହିଛନ୍ତି, ଯଦି ଏସଆଇଆର ଲାଗି କାମ କରୁଥିବା ବ୍ଲକସ୍ତରୀୟ ଅଧିକାରୀଙ୍କ ଉପରେ କାର୍ଯ୍ୟ ଚାପ ରହିଛି, ତେବେ ତାଙ୍କୁ ସହଯୋଗ କରିବା ଲାଗି ଅତିରିକ୍ତ କର୍ମଚାରୀଙ୍କୁ କାର୍ଯ୍ୟରେ ଲଗାଯିବା ଦରକାର । ସାଉଥ ଆକ୍ଟର ବିଜୟଙ୍କ ଦଳ ଟିଭିକେର ଏକ ଆବେଦନର ଶୁଣାଣି କରି ଏହା କହିଛନ୍ତି ସର୍ବୋଚ୍ଚ ନ୍ୟାୟାଳୟ । ସଠିକ୍ ସମୟରେ କାମ ନସରିଲେ ସଂପୃକ୍ତ ବିଏଲଓଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେହେଉ ବୋଲି ଦାବି କରି ଟିଭିକେ ପକ୍ଷରୁ ସୁପ୍ରିକୋର୍ଟରେ ଆବେଦନ କରାଯାଇଥିଲା ।

ବିଏଲଓଙ୍କ ଉପରେ କାମର ଚାପ କମ କରିବା ପାଇଁ ଏସସିଙ୍କ ନିର୍ଦ୍ଦେଶ ଦେଇଛନ୍ତି:

୧. ଅତିରିକ୍ତ କର୍ମଚାରୀ ନିୟୋଜିତ କରାଯାଉ । ଫଳରେ ବିଏଲଓଙ୍କ କାର୍ଯ୍ୟ ଚାପ ହ୍ରାସ ହୋଇପାରିବ ।

୨. କାର୍ଯ୍ୟରୁ ଅବସର ଲାଗି ଆବେଦନ ଉପରେ ବ୍ୟକ୍ତିଗତ ଭାବରେ ବିଚାର କରାଯାଉ । ବିଶେଷ କରି ସ୍ବାସ୍ଥ୍ୟ କିମ୍ବା ବ୍ୟକ୍ତିଗତ କାରଣ କ’ଣ ତାକୁ ଜାଣିବାକୁ ଚେଷ୍ଟା କରାଯିବା ଉଚିତ । ଏହା ବ୍ୟତୀତ ସେହି ସ୍ଥାନରେ ତୁରନ୍ତ ଅନ୍ୟ ଅଧିକାରୀଙ୍କୁ ନିଯୁକ୍ତ କରାଯାଉ ।

୩. ଯଦି କୌଣସି କର୍ମଚାରୀଙ୍କୁ ଆଶ୍ବସ୍ତି ମିଳିନପାରେ, ତେବେ ସେ ସିଧାସଳଖ କୋର୍ଟଙ୍କ ଦ୍ବାରସ୍ଥ ହୋଇପାରିବେ ।