ନୂଆଦିଲ୍ଲୀ ୧୦।୧: ଜାତୀୟ କାର୍ଯ୍ୟକ୍ରମରେ ସାଧାରଣ ଲୋକଙ୍କ ଭାଗିଦାରୀ ବଢାଇବା ଉଦ୍ଦେଶ୍ୟରେ କର୍ତ୍ତବ୍ୟ ପଥରେ ଅନୁଷ୍ଠିତ ହେବାକୁ ଥିବା ଗଣତନ୍ତ୍ର ଦିବସ ପରେଡ ଦେଖିବାକୁ ଚଳିତବର୍ଷ ୧୦ ହଜାର ଖାସ ଅତିଥିଙ୍କୁ ନିମନ୍ତ୍ରିତ କରାଯାଇଛି। ଆମନ୍ତ୍ରିତ ଅତିଥିଙ୍କ ମଧ୍ୟରେ ସରପଞ୍ଚ, ବିପର୍ଯ୍ୟୟ ପ୍ରବନ୍ଧନ କାର୍ଯ୍ୟକର୍ତ୍ତା, ସ୍ୱୟଂ ସହାୟକ ସମୂହର ସଦସ୍ୟ, କାରିଗର ଓ ବିଭିନ୍ନ ସରକାରୀ ଯୋଜନାର ହିତାଧିକାରୀଙ୍କ ଭଳି ବିଭିନ୍ନ ପୃଷ୍ଠଭୂମିର ଲୋକେ ଅଛନ୍ତି।
ଏଥିରେ ନିମନ୍ତ୍ରିତ ଅତିଥିଙ୍କ ମଧ୍ୟରେ କୃଷି, ପରିବେଶ ସଂରକ୍ଷଣ, ସ୍ୱାସ୍ଥ୍ୟ ଓ ଦକ୍ଷତା ବିକାଶ କ୍ଷେତ୍ରରେ ଉତ୍କୃଷ୍ଟ ପ୍ରଦର୍ଶନ କରିଥିବା ଲୋକଙ୍କ ସହିତ ପ୍ରମୁଖ ସରକାରୀ କାର୍ଯ୍ୟକ୍ରମମାନଙ୍କରେ ଭାଗନେଉଥିବା ଲୋକଙ୍କ ଉପରେ ସ୍ୱତନ୍ତ୍ର ଧ୍ୟାନ ଦିଆଯାଇଛି। ସାଧାରଣତନ୍ତ୍ର ଦିବସ ପରେଡରେ ପ୍ରଥମ ଥର ପାରା ଆଥଲେଟ, ଅନ୍ତର୍ଜାତୀୟ କ୍ରିଡା ଆୟୋଜନର ବିଜେତା, ଷ୍ଟାର୍ଟଅପ, ପେଟେଣ୍ଟ ଧାରୀ ଓ ସ୍କୁଲ ପ୍ରତିଯୋଗୀତା ବିଜେତା ମଧ୍ୟ ଭାଗ ନେବେ।
ଏଥିରେ ସେହି ଲୋକଙ୍କୁ ପ୍ରାଥମିକତା ଦିଆଯାଇଛି ଯେଉଁମାନେ ପୂର୍ବରୁ କେବେ ଦିଲ୍ଲୀ ଦେଖି ନାହାନ୍ତି ଓ ଯେଉଁମାନେ ତୃଣମୂଳସ୍ତରରେ ଉଲ୍ଲେଖନୀୟ ଯୋଗଦାନ ଦେଉଛନ୍ତି। ଏପରି ଅତିଥିମାନେ ଜାତୀୟ ଯୁଦ୍ଧ ସ୍ମାରକ ଓ ପ୍ରଧାନମନ୍ତ୍ରୀ ସଂଗ୍ରହାଳୟ ମଧ୍ୟ ବୁଲିବେ ଏବଂ ବରିଷ୍ଠ ମନ୍ତ୍ରୀମାନଙ୍କ ସହିତ କଥାବାର୍ତ୍ତା କରିବେ।
୨୦୨୫ ଗଣତନ୍ତ୍ର ଦିବସ ପରେଡରେ କର୍ତ୍ତବ୍ୟ ପଥରେ ନିଜନିଜ ରାଜ୍ୟର ପ୍ରଜ୍ଞାପନ ମେଢ ପ୍ରଦର୍ଶନୀ ନିମନ୍ତେ ଯେଉଁ ରାଜ୍ୟମାନଙ୍କୁ ଅନୁମତି ମିଳିଛି ସେଥିରେ ଆନ୍ଧ୍ରପ୍ରଦେଶ, ବିହାର, ଚଣ୍ଡିଗଡ,ଦାଦର ନଗର ହେବେଲୀ, ଡାମନ ଡ୍ୟୁ, ଗୋଆ, ଗୁଜରାଟ, ହରିୟାଣା, ଝାଡଖଣ୍ଡ, କର୍ଣ୍ଣାଟକ, ମଧ୍ୟପ୍ରଦେଶ, ପଞ୍ଜାବ, ତ୍ରିପୁରା, ଉତ୍ତରାଖଣ୍ଡ, ଉତ୍ତରପ୍ରଦେଶ ଓ ପଶ୍ଚିମବଙ୍ଗ ଆଦି ରାଜ୍ୟମାନେ ଅଛନ୍ତି। ଏହା ଛଡା କେନ୍ଦ୍ର ସରକାରଙ୍କ ୧୧ ମନ୍ତ୍ରାଳୟଙ୍କୁ ମଧ୍ୟ ସାଧାରଣତନ୍ତ୍ର ଦିବସ ପରେଡରେ ପ୍ରଜ୍ଞାପନ ମେଢ ପ୍ରଦର୍ଶନ ନିମନ୍ତେ ବଛା ଯାଇଛି।
