ଶହବାଜଙ୍କ ମୁହଁରେ ପୁଣି ଆମେରିକା ପ୍ରଶଂସା, କହିଲେ- ଭାରତ ସହ ତିକ୍ତତା କମାଇବାରେ ରହିଛି ଟ୍ରମ୍ପଙ୍କ ଭୂମିକା

ନୂଆଦିଲ୍ଲୀ: ପାକିସ୍ତାନ ପ୍ରଧାନମନ୍ତ୍ରୀ ଶହବାଜ ଶରିଫ୍‌ ପୁଣି ଥରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ପ୍ରଶଂସା  କରିଛନ୍ତି। ଟ୍ରମ୍ପ ଭାରତ- ପାକିସ୍ତାନ ସଂଘର୍ଷ ଶେଷ କରିଛନ୍ତି ବୋଲି ଧନ୍ୟବାଦ ଦେଇଛନ୍ତି ଶରିଫ୍। ସେ କହିଛନ୍ତି ମେ ମାସରେ ଟ୍ରମ୍ପଙ୍କ ‘ସାହସ ଏବଂ ନିର୍ଣ୍ଣାୟକ ନେତୃତ୍ବ’ କାରଣରୁ ଦୁଇ ଦେଶ ମଧ୍ୟରେ ଯୁଦ୍ଧ ଟଳିଥିଲା ଆଉ ଦକ୍ଷିଣ ଏସିଆରେ ଶାନ୍ତି ବଜାୟ ରହିଥିଲା।

ଶନିବାର ଅଜରବାଇଜାନର ବିଜୟ ଦିବସ ପରେଡରେ ବାକୂରେ ଉଦବୋଧନ ଦେବା ସମୟରେ ଶରିଫ୍ କହିଛନ୍ତି ରାଷ୍ଟ୍ରପତି ଟ୍ରମ୍ପଙ୍କ ନିର୍ଣ୍ଣାୟକ ଭୂମିକା ଭାରତ ଏବଂ ପାକିସ୍ତାନ ମଧ୍ୟରେ ସଂଘର୍ଷ ରୋକିବାରେ ଗୁରୁତ୍ବପୂର୍ଣ୍ଣ ଭୂମିକା ନେଇଛନ୍ତି। ଏଥିରେ ଲକ୍ଷ ଲକ୍ଷ ଲୋକଙ୍କ ଜୀବନ ବଞ୍ଚିଯାଇଛି ଏବଂ ସ୍ଥିରତା ଆସିଥିଲା।

ଏହା ପୂର୍ବରୁ ମଧ୍ୟ ପାକିସ୍ତାନ ସରକାର ଅନେକ ଥର ଟ୍ରମ୍ପଙ୍କ ଭୂମିକାର ପ୍ରଶଂସା କରିଛନ୍ତି। ପାକିସ୍ତାନ ପୂର୍ବରୁ କହିଆସିଛି ଯେ, ଟ୍ରମ୍ପଙ୍କ ମଧ୍ୟସ୍ଥତା ଯୋଗୁ ମେ ମାସରେ ସଂଘର୍ଷ ବନ୍ଦ ହୋଇଥିଲା। ଟମ୍ପ ମଧ୍ୟ ସୋସିଆଲ ମିଡିଆରେ ଏହି ଦାବି ରଖି ଆସୁଛନ୍ତି ଯେ, ଓ୍ବାସିଂଟନର ମଧ୍ୟସ୍ଥତା ଯୋଗୁ ଦୁଇ ଦେଶ ‘ସଂପୂର୍ଣ୍ଣ ଏବଂ ତୁରନ୍ତ ଯୁଦ୍ଧବିରାମ’ ଉପରେ ସହମତି ହୋଇଥିଲେ।

ସେହିଭଳି ଶରିଫ୍ ନିଜ ସମ୍ବୋଧନରେ କଶ୍ମୀର ପ୍ରସଙ୍ଗ ମଧ୍ୟ ଉଠାଇଥିଲେ। ସେ କହିଛନ୍ତି ଅଜରବାଇଜାନର କରାବାଢ଼ ବିଜୟ ସେହି ସବୁ ଦେଶଙ୍କ ପାଇଁ ଆଶାର କିରଣ, ଯେଉଁମାନେ ଅତ୍ୟାଚାର ବିରୋଧରେ ସଂଘର୍ଷ କରୁଛନ୍ତି। ସେ କହିଛନ୍ତି ଯେ, ପାକିସ୍ତାନ ଶାନ୍ତି ଚାହୁଛି, କିନ୍ତୁ ନିଜର ସାର୍ବଭୌମତ୍ବ ଏବଂ କ୍ଷେତ୍ରୀୟ ଅଖଣ୍ଡତାରେ କୌଣସି ସାଲିସ କରିବନାହିଁ।

ତେବେ ଭାରତ ସରକାର ପକ୍ଷରୁ ଏହି ଦାବିକୁ ଖାରଜ କରାଯାଇଛି। ଭାରତ ଏବଂ ପାକିସ୍ତାନ ମଧ୍ୟରେ ମେ ୧୦ରେ ପରସ୍ପର ମଧ୍ୟରେ ବୁଝାମଣା ପରେ ଯୁଦ୍ଧବିରାମ ହୋଇଥିଲା। ଆଉ ଏଥିରେ କୌଣସି ତୃତୀୟ ଦେଶର ଭୂମିକା ନାହିଁ ବୋଲି ଭାରତ ପକ୍ଷରୁ କୁହାଯାଇଛି। ଭାରତ ପହଲଗାମ ଆତଙ୍କୀ ଆକ୍ରମଣର ଜବାବରେ ମେ ୭ରେ ଅପରେସନ ସିନ୍ଦୂର ଆରମ୍ଭ କରିଥିଲା।