ବିଶ୍ୱ ଯୁଦ୍ଧ ଆସନ୍ନ: ଋଷ ତେଲ ଟ୍ୟାଙ୍କରକୁ ଜବତ କଲା ଆମେରିକା, ଭୟଙ୍କର ସ୍ଥିତିରେ ଦୁଇ ଦେଶର ସମ୍ପର୍କ

ୱାଶିଂଟନ ଡିସି: ତୃତୀୟ ବିଶ୍ୱ ଯୁଦ୍ଧ ମୁହାଁ ହେଲାଣି ବିଶ୍ୱ। ଋଷ ଓ ଆମେରିକା ମଧ୍ୟରେ ଉତ୍ତେଜନା ସାଂଘାତିକ ସ୍ଥିତିରେ ରହିଛି। ଉତ୍ତର ଆଟଲାଣ୍ଟିକ ମହାସାଗରରେ ସପ୍ତାହ ଧରି ପିଛା କରିବା ପରେ ଶେଷରେ ଆମେରିକା ରୁଷ ପତାକା ଥିବା ତେଲ ଟ୍ୟାଙ୍କର୍ "ମାରିନେରା"କୁ ଜବତ କରିଛି। ଏହି ଅଏଲ ଟ୍ୟାଙ୍କରକୁ ଋଷର ଯୁଦ୍ଧପୋଥ ସୁରକ୍ଷା ଦେଉଥିଲେ। ଏହା ସତ୍ତ୍ୱେ ବି ଆମେରିକା ଔଧତ୍ୟ କରି ଏହାକୁ ଜବତ କରିବା ବିଶ୍ୱବ୍ୟାପୀ ରାଜନୈତିକ ହଇଚଇ ସୃଷ୍ଟି କରିଛି। ଆମେରିକା ତେଲ ଟ୍ୟାଙ୍କର ଜବତ କରିବା ବେଳେ ରୁଷ ନୌସେନା ଯୁଦ୍ଧଜାହାଜ ଏବଂ ବୁଡ଼ାଜାହାଜ ମଧ୍ୟ ସେହି ଅଞ୍ଚଳରେ ଉପସ୍ଥିତ ଥିଲେ।

କେବଲ ଏହି ଗୋଟିଏ ନୁହେଁ, କାରିବିଆନ ସାଗରରେ ମଧ୍ୟ ଭେନେଜୁଏଲାରୁ ଆସୁଥିବା ଏକ ତେଲ ଟ୍ୟାଙ୍କରକୁ ଅଟକାଇଛି ଆମେରିକା ତଟରକ୍ଷୀ ବାହିନୀ। ଏନେଇ ସୂଚନା ଦେଇଛନ୍ତି ଆମେରିକାର ଗୃହ ସୁରକ୍ଷା ସଚିବ କ୍ରିଷ୍ଟି ନୋଏମ। ଏହାକୁ ଘୋଷ୍ଟ ଫ୍ଲିଟ୍(ଅବୈଧ ବ୍ୟାପାରରେ ଲିପ୍ତ ଜାହାଜ) ବିରୁଦ୍ଧରେ ଏକ ବଡ଼ ଆଘାତ ବୋଲି ସେ କହିଛନ୍ତି।

ସଚିବ କ୍ରିଷ୍ଟି ନୋଏମଙ୍କ ଅନୁଯାୟୀ, ଆମେରିକା ତଟରକ୍ଷୀ ବାହିନୀ ସକାଳେ ଦୁଇଟି ଅତ୍ୟନ୍ତ ସଠିକ ଏବଂ ସମନ୍ୱିତ ଅପରେସନ୍ କରିଥିଲା। ପ୍ରଥମ ଟ୍ୟାଙ୍କର, ମୋଟର ଟ୍ୟାଙ୍କର ବେଲା-I, ଉତ୍ତର ଆଟଲାଣ୍ଟିକରେ ଜବତ କରାଯାଇଥିଲା। ଅନ୍ୟଟି ମୋଟର ଟ୍ୟାଙ୍କର ସୋଫିଆ, କାରିବିଆନର ଅନ୍ତର୍ଜାତୀୟ ଜଳସୀମାରେ ଜବତ କରାଯାଇଥିଲା। ଉଭୟ ଜାହାଜ ସମ୍ପ୍ରତି ଭେନେଜୁଏଲାରେ ଡକିଂ କରିଥିଲା କିମ୍ବା ଚୋରା ତେଲ ନେଇ ସେଠାକୁ ଯାଉଥିଲା ବୋଲି ସେ କହିଛନ୍ତି।

ଏହା ପୂର୍ବରୁ ବୁଧବାର ଆମେରିକାର ୟୁରୋପୀୟ କମାଣ୍ଡ କହିଥିଲେ ଯେ ଭେନେଜୁଏଲାର ତୈଳ ବାଣିଜ୍ୟରେ ନିୟୋଜିତ ରୁଷୀୟ ଟ୍ୟାଙ୍କର୍ "ମାରିନେରା"କୁ ଆମେରିକୀୟ ସେନା ଏବଂ ତଟରକ୍ଷୀ ବାହିନୀର ମିଳିତ ଅଭିଯାନରେ ଜବତ କରାଯାଇଛି। ପ୍ରତିବନ୍ଧକ ଉଲ୍ଲଂଘନ ପାଇଁ ଫେଡେରାଲ୍ କୋର୍ଟର ୱାରେଣ୍ଟ ଆଧାରରେ ଏହି କାର୍ଯ୍ୟାନୁଷ୍ଠାନ ନିଆଯାଇଥିଲା ବୋଲି ଆମେରିକା କହିଥିଲା।

ବୁଡ଼ା ଜାହାଜ ଓ ଯୁଦ୍ଧପୋତ ଜଗିବା ସତ୍ତ୍ୱେ ବି ଆମେରିକା ଚଲାଇଥିଲା ଅପରେସନ

ରୁଷ ନୌସେନାର ଏକ ବୁଡ଼ାଜାହାଜ ଏବଂ ଅନେକ ଯୁଦ୍ଧଜାହାଜ ଆଇସଲ୍ୟାଣ୍ଡ ନିକଟବର୍ତ୍ତୀ ଜଳସୀମାରେ ମୁତୟନ କରାଯାଇଥିଲା। ଏହା ସତ୍ତ୍ୱେ ବି ଆଟଲାଣ୍ଟିକ ମହାସାଗରରେ ଋଷ ତେଲ ଟ୍ୟାଙ୍କରକୁ ଅଟକାଇ ଦେଲା ଆମେରିକା। ଏନେଇ ନାଁ ଗୋପନ ରଖି ଅନ୍ତର୍ଜାତୀୟ ଗଣମାଧ୍ୟମ ରୟଟର୍ସକୁ ସୂଚନା ଦେଇ ଆମେରିକୀୟ ଅଧିକାରୀମାନେ କହିଛନ୍ତି ଯେ ରୁଷ ଟ୍ୟାଙ୍କରକୁ ଧରିବା ରାତାରାତି ଘଟିନଥିଲା, ବରଂ ଏହା ସପ୍ତାହ ଧରି ଆଟଲାଣ୍ଟିକ ମହାସାଗରରେ ଟ୍ରାକ୍ କରାଯାଇଥିଲା।

ଟ୍ୟାଙ୍କର ଟି ପୂର୍ବରୁ ଆମେରିକାର ସାମୁଦ୍ରିକ ଅବରୋଧକୁ ଚକ୍ମା ଦେଇ ଚାଲିଯାଇଥିଲା। ଏହାପରେ ଆମେରିକା ତଟରକ୍ଷୀ ବାହିନୀ ପକ୍ଷରୁ ଜାହାଜରେ ଯାଞ୍ଚ କରିବାକୁ ଅନୁରୋଧ କରାଯାଇଥିଲେ ବି ଏହାକୁ ବାରମ୍ବାର ପ୍ରତ୍ୟାଖ୍ୟାନ କରିଥିଲା ଋଷ ତୈଳ ଟ୍ୟାଙ୍କରରେ ଥିବା ଅଧିକାରୀ। କେବଳ ଏତିକି ନୁହେଁ, ଧରାପଡ଼ିଯିବା ଭୟରେ, ଜାହାଜଟି ସମୁଦ୍ର ମଝିରେ ନିଜର ପରିଚୟ ଲୁଚାଇବା ପାଇଁ ତା'ର ପତାକା ଏବଂ ପଞ୍ଜୀକରଣ ମଧ୍ୟ ବଦଳାଇଥିଲା।

ଏହି ସମୟରେ ଟ୍ୟାଙ୍କରର ରାସ୍ତାରେ ରୁଷ ନୌସେନା କାର୍ଯ୍ୟକଳାପ ବୃଦ୍ଧି ପାଇଛି ବୋଲି ଅନ୍ତର୍ଜାତୀୟ ଗୁଇନ୍ଦା ରିପୋର୍ଟ ଦେଇଥିଲେ। ଏହାପରେ ସମଗ୍ର ଘେରାବନ୍ଦୀ ଆହୁରି ଉତ୍ତେଜନାପୂର୍ଣ୍ଣ ହୋଇଯାଇଥିଲା। ଆମେରିକାର ଅଧିକାରୀମାନେ କହିଛନ୍ତି ଯେ ଅପରେସନ ସମୟରେ ରୁଷୀୟ ଯୁଦ୍ଧଜାହାଜ ଏବଂ ଏକ ବୁଡ଼ାଜାହାଜ ସେହି ଅଞ୍ଚଳରେ ଉପସ୍ଥିତ ଥିଲା। ଯଦିଓ ରୁଷୀୟ ସାମରିକ ଜାହାଜ ଏବଂ ଟ୍ୟାଙ୍କର ମଧ୍ୟରେ ସଠିକ୍ ଦୂରତା ନିର୍ଦ୍ଦିଷ୍ଟ କରାଯାଇ ନାହିଁ, ତେବେ ଏଗୁଡ଼ିକର ଉପସ୍ଥିତି ଆମେରିକା ଯେଉଁ ଅପରେସନ କରିଛି ତାହା ଏକ ଗମ୍ଭୀର ଭୂରାଜନୈତିକ ସମସ୍ୟା ସୃଷ୍ଟି କରିଛି।

ପଢନ୍ତୁ- ଟ୍ରମ୍ପଙ୍କ ବିରୋଧରେ ଖୋଲାଖୋଲି ସାମ୍ନାକୁ ଆସିଲେ UN ମୁଖ୍ୟ, ଜାଣନ୍ତୁ କହିଲେ କ’ଣ?

ଆମେରିକାକୁ ସାହାଯ୍ୟ କରୁଛି ବ୍ରିଟେନ୍

ଆମେରିକାର ଏହି ଚ୍ୟାଲେଞ୍ଜିଂ ଅପରେସନରେ ବ୍ରିଟିଶ ସରକାର ଖୋଲା ଓ ଗୁରୁତ୍ୱପୂର୍ଣ୍ଣ ସାହାଯ୍ୟ କରିଥିଲେ। ଆମେରିକୀୟ ଅଧିକାରୀଙ୍କ ଅନୁଯାୟୀ, ଏହି ମିଶନକୁ ଆମେରିକୀୟ ତଟରକ୍ଷୀ ବାହିନୀ ଏବଂ ଆମେରିକୀୟ ସେନା ମିଳିତ ଭାବରେ କରିଥିଲେ। ଏହି ଅପରେସନ ସୁରୁଖୁରର କରାଇବାକୁ ବ୍ରିଟେନ ନିଜ ଲଞ୍ଚପ୍ୟାଡ୍ ବ୍ୟାବହାର କରିବାକୁ ଆମେରିକା ସେନାକୁ ଦେଇଥିଲା।

ଟ୍ୟାଙ୍କରକୁ ଧରିବା ମିଶନ ପାଇଁ ବ୍ରିଟିଶ ବାୟୁସେନା ଘାଟି ବ୍ୟବହାର କରାଯାଇଥିଲା। ରୁଷିଆ ଟ୍ୟାଙ୍କରଟି ଆଇସଲ୍ୟାଣ୍ଡ ଏବଂ ବ୍ରିଟେନ ମଧ୍ୟରେ ଜଳ ସୀମା ଦେଇ ଗତି କରୁଥିବା ସମୟରେ, ୟୁକେର ରୟାଲ ବାୟୁସେନା (RAF) ନିରୀକ୍ଷଣ ବିମାନ ନିରନ୍ତର ଏହାର ଗତିବିଧି ଉପରେ ନଜର ରଖିଥିଲା ଏବଂ ଆମେରିକୀୟ ସେନା ସହିତ ସଠିକ୍ ସୂଚନା ବାଣ୍ଟିଥିଲା।

ମାଦୁରୋଙ୍କ ଗିରଫଦାରୀ ପରେ ବଢ଼ିଛି ଉତ୍ତେଜନା

ଭେନେଜୁଏଲା ରାଷ୍ଟ୍ରପତି ନିକୋଲାସ ମାଦୁରୋଙ୍କୁ ଆମେରିକା ଗିରଫ କରିବା ପରେ ସାରା ବିଶ୍ୱରେ ଉତ୍ତେଜନା ଦେଖା ଦେଇଛି। ମାଦୁରୋଙ୍କୁ କାରାକାସରେ ଅତର୍କିତ ଆକ୍ରମଣକରି ଆମେରିକାର ସ୍ୱତନ୍ତ୍ର ବାହିନୀ ଗିରଫ କରି ଉଠାଇ ଆଣିଥିଲା। ତାଙ୍କ ଉପରେ ଡ୍ରଗ୍ସ ଚାଲାଣ ଅଭିଯୋଗ ଲଗାଇ ବିଚାର ପାଇଁ ତାଙ୍କୁ ଆମେରିକାକୁ ଅଣାଯାଇଛି। ଭେନେଜୁଏଲାର ବରିଷ୍ଠ ଅଧିକାରୀମାନେ ଏହି ଘଟଣାକୁ "ଅପହରଣ" ବୋଲି କହିବା ସହିତ ଆମେରିକା ଭେନେଜୁଏଲାର ବିଶାଳ ତୈଳ ଭଣ୍ଡାରକୁ ଦଖଲ କରିବାକୁ ଷଡ଼ଯନ୍ତ୍ର କରୁଛି ବୋଲି ଅଭିଯୋଗ କରିଛନ୍ତି।

ପଢନ୍ତୁ- ଆମେରିକାର ପରବର୍ତ୍ତୀ ଟାର୍ଗେଟ୍ ଇରାନ, ଭେନେଜୁଏଲାଠୁ ବି ସ୍ଥିତି ହେବ ଭୟାନକ, କିଏ ଦେଲେ ଏମିତି ଚେତାବନୀ ?

ରୁଷ-ଆମେରିକା ସମ୍ପର୍କ ଉପରେ ପ୍ରଭାବ

ନିକଟ ଅତୀତରେ ଆମେରିକା ଏଭଳି କେବେ ଋଷ ଜାହାଜ ଅଟକ ରଖି ନାହିଁ। ହେଲେ ହଠାତ୍ ଆମେରିକାର ଏଭଳି କାର୍ଯ୍ୟାନୁଷ୍ଠାନ ଋଷ ସହ ସମ୍ପର୍କ ଖରାପ କରିଦେଇଛି। ତେଣୁ ଏ ଦିଗରେ ଋଷ ମଧ୍ୟ କିଛି କଡ଼ା କାର୍ଯ୍ୟାନୁଷ୍ଠାନ ନେଇପାରେ।