ସ୍ତ୍ରୀକୁ ମନଇଚ୍ଛା ପିଟିପାରିବେ ସ୍ୱାମୀ, କୋର୍ଟରେ ମହିଳା ଦେଖାଇବେ ବୁର୍ଖା ଭିତରର କ୍ଷତ...ତାଲିବାନର ନୂଆ ନିୟମ

କାବୁଲ, ୧୯/୦୨ : ଆଫଗାନିସ୍ତାନରେ ଅଜବ ନିୟମ । ସ୍ତ୍ରୀକୁ ପିଟିଲେ ଚଳିବ । ବେଶି କିଛି ଦଣ୍ଡ ମିଳିବନି । କେବଳ ହାଡ ଭାଙ୍ଗିଲେ ହିଁ ଦଣ୍ଡ ମିଳିବ । ଏପରି କିଛି ଆଇନ୍ ଆଣିଛନ୍ତି ତାଲିବାନ ସରକାର । ଯାହାକୁ ନେଇ ସବୁଠି ଚର୍ଚ୍ଚା ଏବଂ ଆଲୋଚନା ।

ଆଫଗାନିସ୍ତାନରେ ତାଲିବାନ ସରକାର ଏକ ନୂଆ ଆଇନ ଆଣିଛନ୍ତି । ଯାହା ସମସ୍ତଙ୍କୁ ଚକିତ କରିଛି । ଏହା ଘରୋଇ ହିଂସାକୁ ପ୍ରୋତ୍ସାହିତ କରୁଛି । ମିଡିଆ ରିପୋର୍ଟ ଅନୁସାରେ, ଆଫଗାନିସ୍ତାନରେ କୌଣସି ବ୍ୟକ୍ତି ନିଜ ପତ୍ନୀଙ୍କୁ ମାଡ ମାରି ପାରିବେ । ଏପରିକି ସନ୍ତାନକୁ ମଧ୍ୟ ପିଟି ପାରିବେ । ହାଡ ଭାଙ୍ଗିଲା ଯାଏଁ ପିଟିବାକୁ ଆଇନରେ ଅନୁମତି ମିଳିଛି । ଏନେଇ ଅଭିଯୋଗ କରିଛି ଆଫଗାନ୍ ମହିଳାଙ୍କ ପାଇଁ ଲଡୁଥିବା ମାନବାଧିକାର ସଙ୍ଗଠନ ରବାଦାରୀ । 

ହାଡ ନଭାଙ୍ଗିଲେ ଦୋଷ ନୁହେଁ

ଡେଲି ମିରର୍ ରିପୋର୍ଟ ଅନୁସାରେ, ୨୦୨୫ ଡିସେମ୍ବର ୨୫ରେ ଆଫଗାନ୍ ସରକାର ୯୦ ପୃଷ୍ଠାର ଏକ ନୂଆ ଆଇନ୍ ଆଣିଛନ୍ତି । ଏଥିରେ ଉଲ୍ଲେଖ ରହିଛି ଯେ, ଘରୋଇ ହିଂସାକୁ ସଦାବେଲେ ଅପରାଧ ବିବେଚନା କରାଯିବ ନାହିଁ । ପତି ପତ୍ନୀଙ୍କୁ ସାଧାରଣ ଭାବେ ମାଡ ମାରେ ତେବେ ଏହା ଦୋଷ ନୁହେଁ । ଯଦି ଶରୀରରେ ଦାଗ ହୁଏ କିମ୍ବା ହାଡ ଭାଙ୍ଗେ ତେବେ ଏହାକୁ ସାମାନ୍ୟ ଦୋଷ ଭାବେ କୋର୍ଟ ବିଚାର କରିବେ । ଏହି ଆଇନ ମହିଳା ଏବଂ ଶିଶୁଙ୍କୁ ନର୍କକୁ ଠେଲିଦେବ ।

ଏହି ଖବରଟି ପଢନ୍ତୁ... ଚୀନରେ ସୁନାଠାରୁ ଅଧିକ ବେଗରେ ବଢୁଛି ମାଙ୍କଡ଼ଙ୍କ ମୂଲ୍ୟ, ଜାଣନ୍ତୁ କାହିଁକି

୧୫ ଦିନର ଜେଲ୍

କୋର୍ଟ ମହିଳାଙ୍କୁ ନିଜର ଅଭିଯୋଗ ପ୍ରମାଣିତ କରିବାକୁ ସମୟ ଦେବେ । ଅର୍ଥାତ କୋର୍ଟରେ ମହିଳା ନିଜର ଆଘାତ ଦାଗ ଦେଖାଇବେ । ଏହାପରେ ପତିଙ୍କୁ ସର୍ବାଧିକ ୧୫ ଦିନ ଜେଲଦଣ୍ଡ ମିଳିବ । ସବୁଠାରୁ ବଡ କଥା ହେଲା ଯେ, ଆଫଗାନ୍ ମହିଳା ନିଜ ଶରୀରକୁ ସମ୍ପୂର୍ଣ୍ଣ ଭାବେ ଘୋଡାଇ ରଖିଥାନ୍ତି । ସେମାନେ କୋର୍ଟରେ ବିଚାରପତିଙ୍କ ଆଗରେ ନିଜର କ୍ଷତଚିହ୍ନ ଦେଖାଇବା ସହଜ ନୁହେଁ । ଏହାସହ କୋର୍ଟ ଯିବା ପାଇଁ ମହିଳା ନିଜ ସ୍ୱାମୀ ଏବଂ ପୁରୁଷ ସମ୍ପର୍କୀୟ କାହାକୁ ଧରି ଅଦାଲତ ଯାଇପାରିବେ ।

ସମ୍ପର୍କୀୟଙ୍କୁ ଭେଟିବା ପାପ

ମହିଳାଙ୍କ ସ୍ୱାଧିନତା ଉପରେ ଗୋଟିଏ ପରେ ଗୋଟିଏ ଆକ୍ରମଣ କରିଚାଲିଛି ତାଲିବାନ୍ ସରକାର । ନୂଆ ଆଇନରେ କୁହାଯାଇଛି ଯେ, କେହି ମହିଳା ନିଜ ସମ୍ପର୍କୀୟଙ୍କ ଘରକୁ ଗଲେ ଅନୁମତି ଦରକାର । ସ୍ୱାମୀଙ୍କ ଅନୁମତି ବିନା କୌଣସି ସମ୍ପର୍କୀୟ ଘରକୁ ଯାଇହେବ ନାହିଁ । ଏପରିକି ମହିଳା ନିଜ ମାତାପିତାଙ୍କୁ ମଧ୍ୟ ଭେଟିପାରିବେ ନାହିଁ । ଯଦି ମହିଳା ଏହି ଆଇନ ନମାନନ୍ତି ତେବେ ତାଙ୍କୁ ୩ ମାସ ଧରି ଜେଲରେ ରହିବାକୁ ହେବ ।

ତାଲିବାନର ସର୍ବୋଚ୍ଚ ନେତା ହିବତୁଲ୍ଲାହ ଅଙ୍କୁଜଜାଦାଙ୍କ ଦସ୍ତଖତ ଥିବା ୯୦ ପୃଷ୍ଠାର ନିୟମ ପୃଷ୍ଠାରେ ସମାଜକୁ ଚାରୋଟି ଶ୍ରେଣୀରେ ସରକାର ବାଣ୍ଟିଛନ୍ତି । ଏଥିରେ ଧାର୍ମିକ ବିଦ୍ୱାନ, ବ୍ୟବସାୟୀ, ମଧ୍ୟମ ବର୍ଗ ଏବଂ ନୀଚ୍ଚ ଶ୍ରେଣୀ ରହିଛି । ଧାର୍ମିକ ବିଦ୍ୱାନ କିଛି ଦୋଷ କଲେ ସେମାନଙ୍କୁ କେବଳ ଓ୍ୱାର୍ଣ୍ଣିଂ ଦିଆଯିବ । ସେହିପରି ବ୍ୟବସାୟୀ ବର୍ଗ କିଚି ଅପରାଧ କଲେ କୋର୍ଟ ଡକାଯାଇ ପରାମର୍ଶ ଦିଆଯିବ । ଅନ୍ୟ ଦୁଇ ବର୍ଗ ଦୋଷ କଲେ ସେମାନଙ୍କୁ ଜେଲଦଣ୍ଡ ମିଳିବ ବୋଲି ଆଇନରେ ଉଲ୍ଲେଖ ରହିଛି ।