ମୋବାଇଲରେ 'ସଞ୍ଚାର ସାଥୀ' ଆପ୍‌ ବାଧ୍ୟତାମୂଳକ ନୁହେଁ, ବିରୋଧ ପରେ ବଦଳିଲା ନିଷ୍ପତ୍ତି !

ନୂଆଦିଲ୍ଲୀ: ସାଇବର ସୁରକ୍ଷା ଏବେ ବିଶ୍ୱ ପାଇଁ ବଡ଼ ସଙ୍କଟ ଭାବେ ଉଭା ହୋଇଛି। ଏହାର ମୁକାବିଲା ପାଇଁ ବଡ଼ ପଦକ୍ଷେପ ନେଇଥିଲେ କେନ୍ଦ୍ର ସରକାର। ନୂତନ ହ୍ୟାଣ୍ଡସେଟ୍‌ରେ ସଞ୍ଚାର ସାଥୀ ଆପ୍ ପ୍ରି-ଅପଲୋଡ କରିବାକୁ ନିର୍ଦ୍ଦେଶ ଦେଇଥିଲା ଦୂରସଂଚାର ମନ୍ତ୍ରଣାଳୟ। ମୋବାଇଲ୍ ଫୋନ୍‌ର ପ୍ରାମାଣିକତା ସୁନିଶ୍ଚିତ କରିବା ପାଇଁ, ସମସ୍ତ ମୋବାଇଲ୍ ନିର୍ମାଣକାରୀ କମ୍ପାନୀଗୁଡ଼ିକୁ ଏହି ନିର୍ଦ୍ଦେଶ ଦିଆଯାଇଥିଲା।  ନୂତନ ଆମଦାନୀ ହୋଇଥିବା ଫୋନ୍‌ଗୁଡ଼ିକରେ ମଧ୍ୟ ସଞ୍ଚାର ସାଥୀ ଆପ୍ ଅନ୍ତର୍ଭୁକ୍ତ କରିବାକୁ ପଡ଼ିବ ବୋଲି କୁହାଯାଇଥିଲା। କିନ୍ତୁ ବିରୋଧୀଙ୍କ ଚାପ ପରେ ନିଷ୍ପତ୍ତି ବଦଳାଇଛନ୍ତି ସରକାର। ଫୋନରେ ଏହି ଆପ୍‌ ଅପ୍ସନାଲ ରହିବ, ୟୁଜର ଇଚ୍ଛା ଅନୁସାରେ ଡିଲିଟ୍‌ କରିପାରିବେ। ଏନେଇ ସୂଚନା ଦେଇଛନ୍ତି କେନ୍ଦ୍ର ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ।

ସରକାରଙ୍କ ପୂର୍ବ ପଦକ୍ଷେପକୁ ନେଇ ଆରମ୍ଭ ହୋଇଛି ଚର୍ଚ୍ଚା ଏବଂ ବିତର୍କ। ବିରୋଧୀମାନେ ଏହାକୁ ବିଗ୍‌ ବ୍ରଦର ଏବଂ ପେଗାସସ୍ ପ୍ଲସ୍ ପ୍ଲସ୍ କହି ମୋଦି ସରକାରଙ୍କୁ ଘେରିଛନ୍ତି। ଦୂରସଂଚାର ବିଭାଗର ଏହି ନିର୍ଦ୍ଦେଶ ଅସାମ୍ବିଧାନିକ କହିଛନ୍ତି ରାଜସ୍ଥାନର ରାଜ୍ୟସଭା ସାଂସଦ କେ.ସି. ବେଣୁଗୋପାଳ। କହିଛନ୍ତି ବିଗ୍ ବ୍ରଦର ଆମ ଉପରେ ନଜର ରଖିପାରିବେ ନାହିଁ। । ଗୋପନୀୟତାର ଅଧିକାର ସମ୍ବିଧାନର ଧାରା ୨୧ରେ ଅନ୍ତର୍ଭୁକ୍ତ ଜୀବନ ଏବଂ ସ୍ୱାଧୀନତାର ମୌଳିକ ଅଧିକାରର ଏକ ଅବିଚ୍ଛେଦ୍ୟ ଅଂଶ। ଏକ ପ୍ରି-ଲୋଡେଡ୍ ସରକାରୀ ଆପ୍, ଯାହାକୁ ଅନଇନଷ୍ଟଲ୍ କରାଯାଇପାରିବ ନାହିଁ, ଏହା ପ୍ରତ୍ୟେକ ଭାରତୀୟଙ୍କ ଉପରେ ନଜର ରଖିବା ପାଇଁ ଡିଜାଇନ୍ କରାଯାଇଥିବା ଏକ ଭୟଙ୍କର ନିରୀକ୍ଷଣ ମେସିନ।

ପୂର୍ବରୁ କଣ ନିଆଯାଇଥିଲା ନିଷ୍ପତ୍ତି -

ନିର୍ମାତାମାନେ ବିକ୍ରୟ ପାଇଁ ପୂର୍ବରୁ ନୂତନ ମୋବାଇଲ୍ ଫୋନ୍‌ରେ ଅନେକ ଆପ୍ ଅପଲୋଡ୍‌ କରିସାରିଛନ୍ତି। ଏବେ ସେମାନଙ୍କୁ ସଞ୍ଚାର ସାଥୀ ଆପ୍ ଅନ୍ତର୍ଭୁକ୍ତ କରିବାକୁ ପଡ଼ିବ। ଏହି ସରକାରୀ ନିର୍ଦ୍ଦେଶକୁ ଆଗାମୀ ୯୦ ଦିନ ମଧ୍ୟରେ ପାଳନ କରିବାକୁ ପଡିବ, ଏବଂ ନିର୍ମାତାମାନଙ୍କୁ ଆଗାମୀ ୧୨୦ ଦିନ ମଧ୍ୟରେ ସରକାରଙ୍କୁ ଏକ ଅନୁପାଳନ ରିପୋର୍ଟ ଦାଖଲ କରିବାକୁ ପଡିବ।

ମନ୍ତ୍ରାଳୟ ମଧ୍ୟ ନିର୍ଦ୍ଦେଶ ଦେଇଛି ଯେ ମୋବାଇଲ୍ ଫୋନ୍ ଅପଡେଟ୍ ପରି ସଞ୍ଚାର ସାଥୀ ଆପ୍ ସ୍ୱୟଂଚାଳିତ ଭାବରେ ଅପଡେଟ୍ ହେବା ଉଚିତ। ସଞ୍ଚାର ସାଥୀ ପୋର୍ଟାଲ୍ ୨୦୨୩ରେ ଲଞ୍ଚ କରାଯାଇଥିଲା। କିନ୍ତୁ ଏହି ବର୍ଷ ଜାନୁଆରୀରେ ସଞ୍ଚାର ସାଥୀ ମୋବାଇଲ୍ ଆପ୍ ଲଞ୍ଚ କରାଯାଇଥିଲା। ଏହି ଆପ୍ ଗ୍ରାହକମାନଙ୍କ ପାଇଁ ବହୁ ଫିଚର ପ୍ରଦାନ କରେ।

ଏହି ଆପ୍ ଚୋରି ହୋଇଥିବା ଫୋନ୍ ରିପୋର୍ଟ କରିବା ଏବଂ ଏହାର ସତ୍ୟତା ଯାଞ୍ଚ କରିବା ପାଇଁ ବ୍ୟବହାର କରାଯାଇପାରିବ। ଯୋଗାଯୋଗ ମନ୍ତ୍ରଣାଳୟ ଅନୁଯାୟୀ, ସଞ୍ଚାର ସାଥୀ ସହାୟତାରେ ଚଳିତ ବର୍ଷ ଅକ୍ଟୋବରରେ ୫୦ ହଜାରରୁ ଅଧିକ ଚୋରି ହୋଇଥିବା ମୋବାଇଲ୍ ଫୋନ୍ ଉଦ୍ଧାର କରାଯାଇଥିଲା। ଯାହା ଚଳିତ ବର୍ଷ ଜୁନ୍ ମାସରେ ଉଦ୍ଧାର ହୋଇଥିବା ସଂଖ୍ୟା ତୁଳନାରେ ୪୭ ପ୍ରତିଶତ ଅଧିକ।

ସେହିପରି ଗତ ଜୁନ୍‌ରେ ସଞ୍ଚାର ସାଥୀ ପୋର୍ଟାଲ୍ ବ୍ୟବହାର କରି ୩୪,୩୩୯ଟି ଫୋନ୍ ଉଦ୍ଧାର କରାଯାଇଥିଲା। ଚଳିତ ବର୍ଷ ଅଗଷ୍ଟ ମାସରେ ୪୫,୨୪୩ଟି ଫୋନ୍ ଉଦ୍ଧାର କରାଯାଇଥିଲା। ମନ୍ତ୍ରଣାଳୟ ଦାବି କରିଛି ଯେ ଏହି ପୋର୍ଟାଲ୍ ସାହାଯ୍ୟରେ ପ୍ରତି ମିନିଟରେ ଗୋଟିଏ ଚୋରି କିମ୍ବା ହଜିଯାଇଥିବା ମୋବାଇଲ୍ ଫୋନ୍ ଉଦ୍ଧାର କରାଯାଉଛି। ମୋବାଇଲ୍ ଫୋନ୍ ମାଲିକମାନେ ବ୍ୟବହାର କରୁଥିବା ଫୋନ୍ ଚୋରି ହୋଇଛି କି ନାହିଁ ତାହା ଜାଣିପାରିବେ।

ଏହି ଆପ୍ ଆପଣଙ୍କୁ ଜଣେ ବ୍ୟକ୍ତିଙ୍କ ନାମରେ କେତେ ସିମ୍ କାର୍ଡ ଅଛି ତାହା ନିର୍ଣ୍ଣୟ କରିବାକୁ ମଧ୍ୟ ଅନୁମତି ଦିଏ। ମନ୍ତ୍ରଣାଳୟ ଅନୁଯାୟୀ, ସଞ୍ଚାର ସାଥୀ ସାହାଯ୍ୟରେ ଏପର୍ଯ୍ୟନ୍ତ ୪.୨ ନିୟୁତରୁ ଅଧିକ ମୋବାଇଲ୍ ଫୋନ୍ ଅବରୋଧ କରାଯାଇଛି। ମନ୍ତ୍ରଣାଳୟ କହିଛି ଯେ ଯେତେବେଳେ ଲୋକମାନେ ସେକେଣ୍ଡ-ହ୍ୟାଣ୍ଡ୍ ମୋବାଇଲ୍ ଫୋନ୍ କିଣନ୍ତି, ସେତେବେଳେ ଏହାର ସତ୍ୟତା ଯାଞ୍ଚ କରିବା ପାଇଁ ଆପ୍ ବ୍ୟବହାର କରାଯାଇପାରିବ।

କେବେକେବେ, ଏକ ସିମ୍ କାର୍ଡ ଜାଲିଆତି ଭାବରେ କାହା ନାମରେ ଆବଣ୍ଟିତ କରାଯାଏ ଏବଂ ତା’ପରେ ବେଆଇନ୍ ଉଦ୍ଦେଶ୍ୟରେ ବ୍ୟବହାର କରାଯାଏ। ଏପରି ପରିସ୍ଥିତିରେ, ପୋଲିସ ସେହି ବ୍ୟକ୍ତିଙ୍କୁ ପଚରାଉଚରା କରେ ଯାହାଙ୍କ ନାମରେ ସିମ୍ କାର୍ଡ ଆବଣ୍ଟିତ ହୋଇଛି, ଏବଂ ସିମ୍ କାର୍ଡ ଧାରକଙ୍କୁ ଠକେଇ ପାଇଁ ଦାୟୀ କରାଯାଏ। ଏପରି ପରିସ୍ଥିତିରେ, ସଞ୍ଚାର ସାଥୀ ଆପ୍ ବ୍ୟବହାର କରି ଆପଣଙ୍କ ଅଜାଣତରେ ଆପଣଙ୍କ ନାମରେ ସିମ୍ କାର୍ଡ ଆବଣ୍ଟିତ ହୋଇଛି କି ନାହିଁ ତାହା ଜାଣିବା ସହଜ। ଯଦି ଚାହିଁବେ ତେବେ ଆପଣ ଏହାକୁ ବ୍ଲକ୍ କରିପାରିବେ।