ଏବେ ସମ୍ଭବ ହେବନି ହିନ୍ଦୁ ଓ ମୁସ୍ଲିମ ସିଧା ଜମି ନେଣ ଦେଣ, ଜିଲ୍ଲା ମାଜିଷ୍ଟ୍ରେଟଙ୍କଠୁ ନେବାକୁ ପଡିବ ମଞ୍ଜୁରୀ

ଗୌହାଟୀ ୧୫।୧: ଜମି ବିକା କିଣାକୁ ନେଇ ନିକଟରେ ଆସାମ ସରକାର ନେଇଥିବା ନିଷ୍ପତ୍ତି ଦେଶରେ ଏକ ନୂଆ ବିତର୍କକୁ ଜନ୍ମ ଦେଇଛି। ଏବେ ପ୍ରଶ୍ନ ଉଠୁଛି ଏକ ଖାସ ସମୂଦାୟ ନିମନ୍ତେ ସମ୍ପତ୍ତି କ୍ରୟ କରିବା ଆଗକୁ କଠିନ ହେବ। ଉଲ୍ଲେଖଯୋଗ୍ୟ ଯେ ହିମନ୍ତା ବିଶ୍ୱଶର୍ମା ସରକାର ରାଜ୍ୟର ଜନସଂଖ୍ୟା ଅର୍ଥାତ ଡେମୋଗ୍ରାଫିରେ ହେଉଥିବା ପରିବର୍ତ୍ତନକୁ ନିୟନ୍ତ୍ରିତ କରିବା ପାଇଁ ଭୂମି ହସ୍ତାନ୍ତରଣ ନିୟମରେ ପରିବର୍ତ୍ତନ କରିଛନ୍ତି। ଏଥିରେ ଆସାମରେ ହିନ୍ଦୁ ଓ ମୁସଲମାନ ସମୂଦାୟ ମଧ୍ୟରେ ସିଧା ଜମି ନେଣଦେଣ ହୋଇ ପାରିବନି।

ନୂଆ ଆଇନ ଅନୁସାରେ ଯଦି ଅଲଗା ଅଲଗା ଧର୍ମର ଲୋକେ ପରସ୍ପର ମଧ୍ୟରେ ଜମି କିଣାବିକା କରନ୍ତି ତେବେ ସେମାନଙ୍କୁ ଜିଲ୍ଲା ମାଜିଷ୍ଟ୍ରେଟ୍ ଙ୍କ ଔପଚାରିକ ମଞ୍ଜୁରୀ ନେବାକୁ ପଡିବ। ଏଥି ପାଇଁ ସରକାରଙ୍କ ତର୍କ ହେଲା ଅନେକ ଅଞ୍ଚଳରେ ସ୍ୱଦେଶୀ ଲୋକଙ୍କ ଜମି ଚାପ ଅଥବା ଆର୍ଥିକ ଦୟନିୟତା କାରଣରୁ ବିକ୍ରି ହେଉଛି। ଏଣୁ ଏହାକୁ ‘ଲ୍ୟାଣ୍ଡ ଜିହାଦ’ ମଧ୍ୟ କୁହାଯାଉଛି। ଏହି ଆଇନର ଉଦ୍ଦେଶ୍ୟ ହେଉଛି ବାଂଲାଦେଶୀ ଅନୁପ୍ରବେଶ ଓ ସୀମାବର୍ତ୍ତି ଜିଲ୍ଲା ମାନଙ୍କରେ ବଦଳୁଥିବା ଜନସଂଖ୍ୟା ସନ୍ତୁଳନକୁ ନିୟନ୍ତ୍ରିତ କରିବା। ଧୁବରୀ, ବାରପେଟା ଓ ନୌଗାଓଁ ଭଳି ଜିଲ୍ଲାମାନଙ୍କରେ ମୂଳ ନିବାସୀଙ୍କ ସଂଖ୍ୟା ହ୍ରାସକୁ ନଜରରେ ରଖି ସରକାର ଜିଲ୍ଲା ପ୍ରଶାସନକୁ ସବୁ ଅନ୍ତରଧାର୍ମିକ ହସ୍ତାନ୍ତରଣର ଗହନ ଯାଞ୍ଚ ନିର୍ଦ୍ଦେଶ ଦେଇଛନ୍ତି।

ଏଥିରେ ଜିଲ୍ଲା ମାଜିଷ୍ଟ୍ରେଟ୍ ଜମି ଡରେଇ ଧମକେଇ କିଣାବିକା ହେଉନିତ ଏହା ସୁନିଶ୍ଟିତ କରିବେ। ଏହା ଛଡା ଏହି କାରବାର ଯୋଗୁ ସ୍ଥାନୀୟ ଅଞ୍ଚଳର ସାମାଜିକ ଭିତ୍ତିଭୂମି ଉପରେ ଏହାର କୌଣସି ପ୍ରଭାବ ପଡୁଛି କି ତାହା ମଧ୍ୟ ସୁନିଶ୍ଚିତ କରିବେ। ତେବେ ଏହି ନିୟମ ଗୋଟିଏ ଧର୍ମର ଲୋକଙ୍କ ମଧ୍ୟରେ ଜମି କିଣାବିକା ହେଉଥିଲେ ଲାଗୁ ହେବ ନାହିଁ। ଏହି ପଦକ୍ଷେପର ବ୍ୟାପକ ପ୍ରଭାବ ପୂର୍ବୋତ୍ତରର ଅନ୍ୟ ରାଜ୍ୟଙ୍କ ଉପରେ ମଧ୍ୟ ପଡିବ ବୋଲି ଆକଳନ କରାଯାଉଛି।

ଅନ୍ୟପଟେ ସରକାରଙ୍କ ଏହି ନିଷ୍ପତ୍ତିକୁ ରାଜନୈତିକ ଅଳିନ୍ଦରେ ମଧ୍ୟ ତୀବ୍ର ବିରୋଧ କରାଯାଉଛି। କଂଗ୍ରେସ ଓ ଏଆଇୟୁଡିଏଫ ଭଳି ବିରୋଧୀ ଦଳଙ୍କ କହିବା କଥା ହେଉଛି ନିଜ ସମ୍ପତ୍ତିକୁ ନିଜ ଇଛାରେ କାହାରିକୁ ବିକ୍ରି କରିବା ନାଗରିକର ମୌଳିକ ଅଧିକାର ଓ ଏଥିରେ ସରକାରଙ୍କ ହସ୍ତକ୍ଷେପ ଅସାମ୍ବିଧାନିକ। ବିରୋଧୀ ଏହାକୁ ସାମ୍ପ୍ରଦାୟିକ ଧ୍ରୁବୀକରଣ ବୋଲି ଅଭିଯୋଗ କରୁଛି। ଅନ୍ୟପଟେ ବିଶ୍ୱ ହିନ୍ଦୁ ପରିଷଧ ଭଳି ସଙ୍ଗଠନ ଏହି ଆଇନକୁ ସାରା ଦେଶରେ ଲାଗୁ କରିବାକୁ ଦାବି କରୁଛି।

ଏଥିରେ ଆସାମ ସରକାରଙ୍କ କହିବା କଥା ହେଉଛି ରାଜ୍ୟର ସାଂସ୍କୃତିକ ପରିଚୟ ଓ ଭୌଗଳିକ ଐତିହ୍ୟର ସୁରକ୍ଷା ପାଇଁ ଏହା ଏକ ଅନିବାର୍ଯ୍ୟ ସୁରକ୍ଷା କବଚ। ଆଗାମୀ ସମୟରେ ବିହାର, ପଶ୍ଚିମବଙ୍ଗ ଓ ଝାଡଖଣ୍ଡ ଭଳି ରାଜ୍ୟ ଆସାମ ରାସ୍ତାରେ ଚାଲିବେ କି ନା ତାହା ଦେଖିବାକୁ ରହିଲା।