ଆମ ପରିବାର କଷ୍ଟକର ସମୟ ଦେଇ ଗତି କରୁଛି...କାହିଁକି ଏଭଳି କହିଲେ ସୁପ୍ରିୟା ସୁଲେ ?

ନୂଆଦିଲ୍ଲୀ: ଏନସିପିର କାର୍ଯ୍ୟକାରୀ ସଭାପତି ଏବଂ ସାଂସଦ ସୁପ୍ରିୟା ସୁଲେ ଅଜିତ ପାୱାରଙ୍କ ପରଲୋକ ସଂପର୍କରେ ନୂଆଦିଲ୍ଲୀରେ ସାମ୍ବାଦିକମାନଙ୍କୁ ପ୍ରତିକ୍ରିୟା ଦେଇଛନ୍ତି । ସେ କହିଛନ୍ତି, ‘ଆମ ପରିବାର କଷ୍ଟକର ସମୟ ଦେଇ ଗତି କରୁଛି। ଆମେ ପରଷ୍ପରର ସମର୍ଥନରେ ଆଗକୁ ବଢ଼ୁଛୁ। ମୋ ବଡ଼ ଭାଇ ଆଉ ଆମ ସହିତ ନାହାନ୍ତି, ତେଣୁ ମୁଁ ପୁରୁଣା ପ୍ରସଙ୍ଗ ଉଠାଇବାକୁ ଚାହୁଁନାହିଁ। ସେ ମୋର ବଡ଼ ଭାଇ ଥିଲେ, କିନ୍ତୁ ସେ ଆଉ ଆମ ସହିତ ନାହାନ୍ତି। ମୋର ତାଙ୍କ ମଧ୍ୟରେ ଯାହା ଆଲୋଚନା ହୋଇଥିଲା ତାହା ଆମ ଭିତରେ ରହିଗଲା। ତାଙ୍କର ଅଧୁରା ସ୍ୱପ୍ନ ପୂରଣ କରିବା ଆମ ସମସ୍ତଙ୍କର ନୈତିକ ଦାୟିତ୍ୱ।’

ସୁପ୍ରିୟା ସୁଲେ କହିଛନ୍ତି ଯେ, ମୁଖ୍ୟମନ୍ତ୍ରୀ ଏକ ବିବୃତ୍ତି ଜାରି କରିଛନ୍ତି। ସେ ଏହି ମାମଲାରେ ଏକ ପୁଙ୍ଖାନୁପୁଙ୍ଖ ତଦନ୍ତ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି। ସୁପ୍ରିୟା ସୁଲେ ଆହୁରି କହିଛନ୍ତି ଯେ, ରୋହିତଙ୍କ ଚିନ୍ତା ସ୍ୱାଭାବିକ। ତାଙ୍କର ଅନେକ ପ୍ରଶ୍ନ ଅଛି, କିନ୍ତୁ ସେଗୁଡିକର ଉତ୍ତର ମିଳିନାହିଁ। କ'ଣ ହେଲା, ଏହା କିପରି ହେଲା, ଆମେ ତାଙ୍କୁ ରକ୍ଷା କରିପାରିଥାନ୍ତୁ ? ଏପରି ଅନେକ ପ୍ରଶ୍ନ ଅଛି। ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବୀସ ଏହି ମାମଲାରେ ପୁଙ୍ଖାନୁପୁଙ୍ଖ ତଦନ୍ତ ପାଇଁ ପ୍ରତିଶ୍ରୁତି ଦେଇଛନ୍ତି। ଆମେ ସେହି ତଦନ୍ତକୁ ଅପେକ୍ଷା କରିବା ଉଚିତ ବୋଲି ସୁପ୍ରିୟା କହିଛନ୍ତି।

ସୁପ୍ରିୟା ସୁଲେ ଆହୁରି କହିଛନ୍ତି ଯେ, ଶରଦ ପାୱାର ହସ୍ପିଟାଲରେ ଥିବା ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ , ସୋନିଆ ଗାନ୍ଧୀ, ରାହୁଲ ଗାନ୍ଧୀ, ରାଜନାଥ ସିଂହ ଏବଂ ଓମର ଅବଦୁଲ୍ଲାଙ୍କ ସମେତ ଅନ୍ୟମାନେ ତାଙ୍କ ସ୍ୱାସ୍ଥ୍ୟାବସ୍ଥା ପଚାରି ବୁଝିବାକୁ ଫୋନ୍ କରିଥିଲେ। ସେ ଆହୁରି ମଧ୍ୟ କହିଛନ୍ତି ଯେ, ଏହି ସମୟରେ ପାୱାର ପରିବାରକୁ ସମର୍ଥନ କରିଥିବାରୁ ସେ ସମସ୍ତଙ୍କ ପ୍ରତି ହୃଦୟରୁ କୃତଜ୍ଞ।

ରେବତୀ ଏବଂ ସାରଙ୍ଗଙ୍କ ବିବାହ ଘୋଷଣା ବିଷୟରେ ପଚରାଯିବାରୁ, ସୁପ୍ରିୟା ସୁଲେ କହିଛନ୍ତି ଯେ, ପ୍ରକୃତରେ କିଛି ମାସ ଧରି ଆଲୋଚନା ଚାଲିଥିଲା। ରେବତୀ ଏବଂ ସାରଙ୍ଗ ପରଷ୍ପରକୁ ଜାଣନ୍ତି। ମୁଁ ଭାଗ୍ୟବାନ ଯେ, ମୋର ଛଅ ଭାଇ ଅଛନ୍ତି। ମୋର ସମସ୍ତ ଭାଇ ଏହି ସମ୍ପର୍କକୁ ଆଶୀର୍ବାଦ କରିଛନ୍ତି। ତେଣୁ, ମୁଁ ଏହାକୁ ମୋର ସୌଭାଗ୍ୟ ବୋଲି ମନେ କରେ ଯେ, ଏହି ବିବାହ ମୋ ଭାଇଙ୍କ ଜାଣତରେ ସ୍ଥିର ହୋଇଥିଲା।

ସେ ଆହୁରି କହିଛନ୍ତି ଯେ, ଅଜିତ ପାଓ୍ବାରଙ୍କ ଜାନୁଆରୀ ୨୮ ତାରିଖରେ ଦେହାନ୍ତ ହେବା ଦୁର୍ଭାଗ୍ୟଜନକ । ନଚେତ୍ ସମଗ୍ର ପରିବାର ୩୦ ତାରିଖରେ ବିବାହ ଘୋଷଣା କରିଥାନ୍ତେ। ସୁପ୍ରିୟା ସୁଲେ ଆହୁରି ମଧ୍ୟ କହିଛନ୍ତି ଯେ, ତାଙ୍କ ଭାଇଙ୍କ ଆଶୀର୍ବାଦରେ ଏହି ବିବାହ ସ୍ଥିର ହୋଇଥିବାରୁ ସେ ଖୁସି।