ଭାରତରୁ ‘ପ୍ରାଡା’କୁ ମିଳିଲା ନୂଆ ପ୍ରେରଣା, କୋହ୍ଲାପୁରୀ ଚପଲ ପରେ ଏବେ ଲଞ୍ଚ କଲା ଚା ରୁ ପ୍ରେରିତ ପରଫ୍ୟୁମ

ନୂଆଦିଲ୍ଲୀ ୯।୧: ଇଟାଲୀର ଫେମସ ଫ୍ୟାସନ କମ୍ପାନୀ ପ୍ରାଡା ଏବେ ପୁଣି ଥରେ ଚର୍ଚ୍ଚାରେ। ଏଥର ଭାରତର ସବୁଠୁ ପ୍ରିୟ ପରମ୍ପରା ମଧ୍ୟରୁ ଅନ୍ୟତମକୁ ଏକ ନୂଆ ଓ ଅନନ୍ୟ ରୂପ ଦେଇଛି। ଗତ ବର୍ଷ କୋହ୍ଲାପୁରୀ ଚପଲ ବିବାଦ ପରେ ବ୍ରାଣ୍ଡ ‘ଇନଫ୍ୟୁଜନ ଡେ ସେଣ୍ଟଲ ଚା ଇୟୋ ଡେ ପରଫ୍ୟୁମ’ ଲଞ୍ଚ କରିଛି। ଏହା ଅଳେଇଚ ମିଶ୍ରଣରେ ପ୍ରେରିତ ଏକ ୟୁନିସେକ୍ସ ପରଫ୍ୟୁମ ଓ ଏହି ପରଫ୍ୟୁମ ପ୍ରାଡାର ଲେସ୍ ଇନଫ୍ୟୁସନ୍ସ କଲେକ୍ସନର ଅଂଶବିଶେଷ।

ପ୍ରାଡା ୱେବସାଇଟେରେ ଏହି ପରଫ୍ୟୁମର ମୂଲ୍ୟ ପାଖାପାଖି ୧୯୦ ଡଲାର ଅର୍ଥାତ ୧୭,୦୦୦ ଟଙ୍କା ରଖାଯାଇଛି। ଏଥିରେ ମଲାଇଦାର ଚନ୍ଦନକୁ ଚା ର ମସାଲାଦାର ନୋଟସ୍ ସହିତ ମିଳା ଯାଇଛି। ଯାହାକୁ ସିଟ୍ରସ ଓ ଅଳେଇଚର ସ୍ପର୍ଷରେ ଏକ ସୁଗନ୍ଧିତ ରୂପ ଦିଆଯାଇଛି। ଏହି ପରଫ୍ୟୁମକୁ ସିଲ କରାଯାଇଥିବା ବୋତଲ ମଧ୍ୟ ଏହାର ଥିମକୁ ପ୍ରଦର୍ଶିତ କରୁଛି, ଯାହା ଭାରତୀୟଙ୍କ ଚା କପକୁ ମନେ ପକାଇ ଦେଉଛି। ପ୍ରାଡା ଇଂଷ୍ଟାଗ୍ରାମରେ ଏହି ପ୍ରଡକ୍ଟକୁ ଲଞ୍ଚ କରି ଉଲ୍ଲେଖ କରିଛି ଯେ ‘ଏକ ନୂଆ ଇନଫ୍ୟୁଜନ, ଯାହାକୁ ଅଲଗା ପ୍ରକାରେ ତିଆରି କରାଯାଇଛି’। ସୋସିଆଲ ମିଡିଆରେ ଏବେ ଏହା ବନାଗ୍ନି ଭଳି ବ୍ୟାପି ଯାଇଛି।

ତେବେ ଏହି ପରଫ୍ୟୁମର ଲଞ୍ଚ ଭାରତରେ ପ୍ରାଡାର କୋହ୍ଲାପୁରୀ ଚପଲ ବିବାଦକୁ ପୁଣି ତାଜା କରିଦେଇଛି। ୨୦୨୫ରେ ବମ୍ବେ ହାଇକୋର୍ଟରେ ଏକ ଜନସ୍ୱାର୍ଥ ମାମଲା ରୁଜୁ ହୋଇଥିଲା। ଏଥିରେ ଅଭିଯୋଗ କରାଯାଇଥିଲା ଯେ ଅନ୍ତର୍ଜାତୀୟ ବ୍ରାଣ୍ଡ ପ୍ରାଡା ତାର ସମର କଲେକ୍ସନରେ କୋହ୍ଲାପୁର ଡିଜାଇନକୁ ନକଲ କରିଛି। ଏହାର ଜବାବରେ ପ୍ରାଡା ପ୍ରତିଷ୍ଠିତ ଚପଲ ପଛର ଐତିହ୍ୟକୁ ବୁଝିବା ପାଇଁ ଭାରତୀୟ କାରିଗରଙ୍କ ସହ ସମ୍ପର୍କ କରିଥିଲା।

ଏହା ପରେ ଡିସେମ୍ବର ମାସ ମଧ୍ୟରେ ପ୍ରାଡା ମହାରାଷ୍ଟ୍ରର ଏଲଆଇଡିସିଓମଏମ ଓ କର୍ଣ୍ଣାଟକର ଏଲଆଡିକେଏଆର ସହିତ କୋହ୍ଲାପୁରୀ ଚପଲରୁ ପ୍ରେରିତ ପ୍ରକଳ୍ପ ଲାଗି ଏକ ବୁଝାମଣାରେ ସ୍ୱାକ୍ଷର କରିଥିଲା। ଏହି ସହଯୋଗ ଭାରତର ପ୍ରାଚୀନ ପାରମ୍ପରିକ ନିର୍ମାଣ ଜ୍ଞାନକୌଶଳକୁ ପ୍ରାଡାର ସମକାଳୀନ ଡିଜାଇନ ସହିତ ଯୋଡା ଯିବ। କୋହ୍ଲାପୁର ଚପଲର ଏକ ସୀମିତ ସଂସ୍କରଣ ତିଆରି କରାଯିବ। ଏଥିରେ ମାତ୍ର ୨ହଜାର ହଳ ଚପଲ ରହିବ, ଯାହାର ମୂଲ୍ୟ ପାଖାପାଖି ୮୦୦ ୟୁରୋ ଅର୍ଥାତ ୮୪ ହଜାର ଟଙ୍କା ପ୍ରତି ଯୋଡା ରହିବ ଓ ଏହା ୨୦୨୬ରୁ ସାରା ବିଶ୍ୱର ୪୦ ପ୍ରାଡା ଷ୍ଟୋର ଓ ଅନଲାଇନରେ ଉପଲବ୍ଧ ହେବ।

ପ୍ରାଡାର ବରିଷ୍ଠ ଅଧିକାରୀ ଲରେନ୍ସ ବର୍ଟେଲୀ ଗଣମାଧ୍ୟମକୁ କହିଛନ୍ତି ଯେ ଏହାର ଉଦ୍ଦେଶ୍ୟ ଶିଳ୍ପକୁ ବୈଶ୍ୱିକ ସ୍ତରରେ ପରିଚିତ କରିବା ଓ କାରିଗରଙ୍କୁ ଉଚିତ ପୈଠ ସୁନିଶ୍ଚିତ କରିବା। ସେହିପରି କାରିଗରଙ୍କୁ ଭାରତ ଓ ଇଟାଲୀସ୍ଥିତ ପ୍ରାଡା ଆକାଡେମୀରେ ପ୍ରଶିକ୍ଷଣ ମଧ୍ୟ ପ୍ରଦାନ କରିବା ବୋଲି ସେ କହିଛନ୍ତି। ଏଲଆଇଡିକମ୍ ପରିଚାଳନା ନିର୍ଦ୍ଦେଶିକା ପ୍ରେରଣା ଦେଶଭ୍ରତା କହିଛନ୍ତି ଯେ ପ୍ରାଡା ଭଳି ବୈଶ୍ୱିକ ବ୍ରାଣ୍ଡ ଯଦି ଥରଟିଏ ଏହି ଶିଳ୍ପକୁ ସମର୍ଥନ କରିବା ଆରମ୍ଭ କରିଦିଏ ତେବେ ସାରା ବିଶ୍ୱରେ ଏପରି ଉତ୍ପାଦର ଚାହିଦା ସ୍ୱଭାବିକ ଭାବେ ବୃଦ୍ଧି ହେବା ଏକ ପ୍ରକାର ନିଶ୍ଚିତ।