ବାହାରିଗଲା ଚଳନ୍ତା ବସ୍‌ର ଆଗ ଚକ, ପ୍ରାୟ ୨ଶହ ମିଟର ଯାଏ ଘୋଷାଡ଼ି ହୋଇଗଲା

ଦିଗପହଣ୍ଡି ୩୧।୧୨: ଚାଲୁଥିଲା ବସ୍, ବାହାରିଗଲା ଚକ । ଅଳ୍ପକେ ବର୍ତ୍ତିଗଲେ ୫୦ରୁ ଉର୍ଦ୍ଧ୍ବ ପର୍ଯ୍ୟଟକ । ଗଞ୍ଜାମ ଜିଲ୍ଲା ଦିଗପହଣ୍ଡି-ବ୍ରହ୍ମପୁର ମୁଖ୍ୟରାସ୍ତା ଗଣିଆନାଳ ଛକରେ ଘଟିଛି ଏଭଳି ଅଘଟଣ ।

ସୂଚନାଯୋଗ୍ୟ ଯେ, ନୂଆବର୍ଷ ପାଇଁ ଭଦ୍ରକ ଜିଲ୍ଲା ଚାନ୍ଦବାଲିରୁ ‘ମୁସ୍କାନ’ ନାମକ ଏକ ଘରୋଇ ବସ୍ରେ ତପ୍ତପାଣି ବୁଲିବାକୁ ଆସିଥିଲେ ପର୍ଯ୍ୟଟକ । ତପ୍ତପାଣି ବୁଲି ସାରିବା ପରେ ମହାପ୍ରଭୁ ଜଗନ୍ନାଥଙ୍କ ଦର୍ଶନ କରିବା ପାଇଁ ପୁରୀ ଅଭିମୁଖେ ବାହାରିଥିଲେ । କିଛି ବାଟ ଯିବା ପରେ ଦିଗପହଣ୍ଡି-ବ୍ରହ୍ମପୁର ମୁଖ୍ୟରାସ୍ତା ଗଣିଆନାଳ ଛକ ନିକଟରେ ଘଟିଲା ବଡ଼ ଅଘଟଣ । ଚଳନ୍ତା ବସ୍ରୁ ବାମ ପଟର ଆଗ ଚକଟି ହଠାତ୍ ବାହାରି ପଡିଥିଲା । ଚକ ବାହାରିବାର ପରେ ପ୍ରାୟ ୨ଶହ ମିଟର ପର୍ଯ୍ୟନ୍ତ ବସ୍ଟି ଘୋଷାଡ଼ି ହୋଇ ଯାଇଥିଲା ।

ଏଭଳି ଦୁର୍ଘଟଣାରୁ ଅଳ୍ପକେ ବର୍ତ୍ତିଯାଇଛନ୍ତି ପର୍ଯ୍ୟଟକ । କାହାର କୌଣସି କ୍ଷୟକ୍ଷତି ହୋଇନଥିବା ଜଣାପଡିଛି ।