୨ ମାସ ହେଲା କଲେଜ ଫି ଦେଇପାରୁ ନାହାଁନ୍ତି କରିସ୍ମାଙ୍କ ଝିଅ ! ତାଗିଦ କଲେ କୋର୍ଟ

ନ୍ୟୁୟର୍କ, ୧୫|୧୧: କଲେଜ ଫି ଦେଇ ପାରୁନାହାଁନ୍ତି ଅଭିନେତ୍ରୀ କରିସ୍ମା କପୁରଙ୍କ ଝିଅ । ସ୍ବାମୀଙ୍କ ଦେହାନ୍ତ ପରେ ଆର୍ଥିକ ସମସ୍ୟା ଦେଇ ଗତି କରୁଛନ୍ତି କରିସ୍ମା । ଏହାସହ ସ୍ବାମୀଙ୍କ ସମ୍ପତ୍ତିରେ ଅଂଶୀଦାର ପାଇଁ କୋର୍ଟରେ ଦାଖଲ କରିଛନ୍ତି ମାମଲା । ଯାହାର ଶୁଣାଣି କରିଛନ୍ତି କୋର୍ଟ ।

ରିପୋର୍ଚ ଅନୁସାରେ, ସ୍ବର୍ଗତ ସଂଜୟ କପୁରଙ୍କ ସମ୍ପତ୍ତିରେ ଅଂଶୀଦାର ହେବା ସହ ସାବତ ମାଆ ପ୍ରିୟା ସଚଡେବଙ୍କ ବିରୋଧରେ ଦିଲ୍ଲୀ ହାଇକୋର୍ଟରେ ମାମଲା ହୋଇଥିଲେ । ଯାହାର ଶୁଣାଣିରେ କୋର୍ଟ ଫିଲ୍ମ ଷ୍ଟାଇଲରେ ଫଇସଲା ଶୁଣାଇ ପାରିବେ ନାହିଁ ବୋଲି କହିଥିଲେ । କରିସ୍ମାଙ୍କ ପକ୍ଷରୁ ମାମଲା ଲଢୁଥିବା ଆଇନଜୀବୀ ମହେଶ ଜେଠାମାଳିନୀ କହିଥିଲେ ଯେ, କରିସ୍ମାଙ୍କ ଝିଅ ଆମେରିକାର ଏକ ବିଶ୍ବବିଦ୍ୟାଳୟରେ ପାଠ ପଢୁଛନ୍ତି । ସେ ଦୁଇ ମାସ ହେଲା କଲେଜ ଫି ଦେଇପାରି ନାହାଁନ୍ତି । ଏସବୁ ଖର୍ଚ୍ଚ ସଂଜୟ କପୁର ଉଠାଇବା କଥା । କିନ୍ତୁ ସେ ଏବେ ଦୁନିଆରେ ନାହାଁନ୍ତି ।

ପ୍ରିୟା ସଚଦେବଙ୍କ ତରଫରୁ ଲଢୁଥିବା ଆଇନଜୀବୀ କହିଥିଲେ ଯେ, ପ୍ରିୟା ସମସ୍ତ ଖର୍ଚ୍ଚ କରିଛନ୍ତି । ମିଡିଆରେ ଚର୍ଚ୍ଚାରେ ରହିବାକୁ କରିସ୍ମା ଏପରି ପ୍ରସଙ୍ଗକୁ କୋର୍ଟରେ ଉଠାଉଛନ୍ତି । ବିଚାରପତି କହିଥିଲେ ଯେ, ଏସବୁ ପ୍ରସଙ୍ଗ କୋର୍ଟକୁ ଆସିବା ଅନୁଚିତ । ପ୍ରିୟା ଏସବୁ ସମସ୍ୟାର ସମାଧାନ କରିବା ଦରକାର । ମାମଲାକୁ ସେ ୩୦ ସେକେଣ୍ଡରୁ ଅଧିକ ସମୟ ଦେଇପାରିବେ ନାହିଁ । ସମାନ ପ୍ରଶ୍ନ ପୁଣି ଥରେ କୋର୍ଟକୁ ଆଣିବା ଅନୁଚିତ ବୋଲି ବିଚାରପତି କହିଥିଲେ ।

ସୂଚନାଯୋଗ୍ୟ, କରିସ୍ମାଙ୍କ ସ୍ବାମୀ ସଞ୍ଜୟ ଚଳିତ ବର୍ଷ ଜୁନ ୧୨ ତାରିଖରେ ପ୍ରାଣ ହରାଇଥିଲେ । ଲଣ୍ଡନରେ ପୋଲୋ ଖେଳିବା ବେଳେ ତାଙ୍କୁ ହୃଦଘାତ ହୋଇଥିଲା । ଯାହାପରେ ସନ୍ତାନ ସମାୟିରା ଏବଂ କିଆନ୍ ବାପାଙ୍କ ସମ୍ପତ୍ତିରେ ହକ୍ ପାଇବାକୁ କୋର୍ଟରେ ମାମଲା କରିଥିଲେ ।

ସେମାନେ ଅଭିଯୋଗ କରିଥିଲେ ଯେ, ସାବତ ମାଆ ପ୍ରିୟା ସଞ୍ଜୟଙ୍କ ଇଚ୍ଛା ବିରୋଧରେ କାମ କରୁଛନ୍ତି । ସନ୍ତାନଙ୍କୁ ସମସ୍ତ ପ୍ରକାର ସୁବିଧା ଦିଆଯିବ ବୋଲି ସଞ୍ଜୟ ପ୍ରତିଶ୍ରୁତି ଦେଇଥିଲେ । କିନ୍ତୁ ଏସବୁରୁ ସେମାନଙ୍କୁ ବଞ୍ଚିତ କରାଯାଉଛି । ସେପଟେ ପ୍ରିୟା କୋର୍ଟରେ ଉଭୟ ସନ୍ତାନଙ୍କୁ ୧୯୦୦ କୋଟି ପ୍ରଦାନ କରାଯାଇଥିବା ଦାବି କରିଥିଲେ ।