ପ୍ରଦୂଷଣ ନୁହେଁ, ବାଦଲରେ ହେଉଥିବା ପରିବର୍ତ୍ତନ କାରଣରୁ ବଢୁଛି ପୃଥିବୀର ଉତ୍ତାପ: ଅଧ୍ୟୟନ

ନୂଆଦିଲ୍ଲୀ ୨୫।୧୨: ପୃଥିବୀର ଉତ୍ତାପ ଦିନକୁ ଦିନ ବଢିବାରେ ଲାଗିଛି, ତେବେ ଏଥି ପାଇଁ ବାୟୁ ପ୍ରଦୂଷଣ ଦାୟି ନୁହେଁ। ଏକ ନୂଆ ଅଧ୍ୟୟନରୁ ଏହା ଜଣାପଡିଛି। ପୃଥିବୀର ଉତ୍ତାପ ବୃଦ୍ଧିର କାରଣ ହେଉଛି ବାଦଲରେ ହେଉଥିବା ପରିବର୍ତ୍ତନ ବୋଲି ବୈଜ୍ଞାନିକମାନେ ଜାଣିବାକୁ ପାଇଛନ୍ତି। ଏହି ଅଧ୍ୟୟନରୁ ପୃଥିବୀ ସୂର୍ଯ୍ୟରୁ ଆସୁଥିବା ଉତ୍ତାପ ଅନ୍ତରୀକ୍ଷକୁ ନିଷ୍କାସିତ କରିବା ବଦଳେ ଅଧିକ ଅବଶୋଷି ନେଉଛି। ଏଣୁ ଉର୍ଜା ଅସନ୍ତୁଳନ ପରିସ୍ଥିତି ଉପୁଜିଛି। ଏହି ଅସନ୍ତୁଳନ ଏବେ ପୃଥିବୀର ଉତ୍ତାପ ବୃଦ୍ଧିର କାରଣ ପାଲଟିଛି।

ତେବେ ବାୟୁ ପ୍ରଦୂଷଣକୁ ପ୍ରାୟତଃ ପୃଥିବୀର ଜଳବାୟୁ ପରିବର୍ତ୍ତନ ସହ ଯୋଡା ଯାଇ ଆସୁଛି। ଏଣୁ ନୂଆ ଅଧ୍ୟୟନରେ ଏହା ଉର୍ଜା ଅସନ୍ତୁଳନର ମୁଖ୍ୟ କାରଣ ନୁହେଁ ବୋଲି ଏବେ ନୂଆ ତର୍କ ଦିଆଯାଇଛି। ମିଆମୀ ବିଶ୍ୱବିଦ୍ୟାଳୟର ଗବେଷକମାନେ ସେମାନଙ୍କ ଗବେଷଣା ନିଷ୍କର୍ଷ କୁ ‘ସାଇନ୍ସ ଆଡଭାନ୍ସେସ୍’ ପତ୍ରିକାରେ ପ୍ରକାଶିତ କରିଛନ୍ତି। ସେମାନଙ୍କ ଅଧ୍ୟୟନରୁ ଜଣାପଡିଛି ଯେ ବାଦଲରେ ହେଉଥିବା ପରିବର୍ତ୍ତନ ଏବେ ପୃଥିବୀର ଉଷ୍ମା ଅବରୋଧ ବୃଦ୍ଧିର ସବୁଠୁ ବଡ଼ କାରଣ।

ବାଦଲ ନିର୍ମାଣକୁ ପ୍ରଭାବିତ କରୁଛି ଏରୋସୋଲବାୟୁ ପ୍ରଦୂଷଣ ଯୋଗୁ ଏରୋସୋଲ ନାମରେ ଏକ ସୁକ୍ଷ୍ମ କଣିକା ସୃଷ୍ଟି ହେଉଛି ଯାହା କାରଖାନା,ଯାନବାହନ, ଜଙ୍ଗଲପୋଡି ଓ ଆଗ୍ନେୟଗିରି ଉଦଗିରଣ ଭଳି ସ୍ରୋତରୁ ବାହାରୁଛି। ଏହି ଏରୋସୋଲ ବାଦଲ ନିର୍ମାଣ ଓ ତାର ଚମକକୁ ପ୍ରଭାବିତ କରିପାରେ। ଅଧିକ ଚମକଦାର ବାଦଲ ସୂର୍ଯ୍ୟଙ୍କ କିରଣକୁ ଅଧିକମାତ୍ରାରେ ଅନ୍ତରୀକ୍ଷକୁ ଫେରାଇ ଦେଇ ପାରେ, ଏଣୁ ପୃଥିବୀ ଶୀତଳ ରହିପାରିବ। ତେବେ ଅନେକ ବର୍ଷ ପର୍ଯ୍ୟନ୍ତ ବୈଜ୍ଞାନିକଙ୍କ ଧାରଣା ଥିଲା ଯେ ଏରୋସୋଲ ସ୍ତରରେ ପରିବର୍ତ୍ତନ ଏବେକା ବୈଶ୍ୱିକ ତାପମାନ ବୃଦ୍ଧିରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରୁଛି।

ତେବେ ୨୦ ବର୍ଷର ଉପଗ୍ରହ ତଥ୍ୟକୁ ବିଶ୍ଲେଷଣ କରି ଓ ଉନ୍ନତ ଜଳବାୟୁ ମଡେଲର ଉପଯୋଗ ଦ୍ୱାରା ଗବେଷକମାନେ ଜାଣିବାକୁ ପାଇଛନ୍ତି ଯେ ଗତ ଦଶନ୍ଧୀମାନଙ୍କରେ ପୃଥିବୀର ଉର୍ଜ୍ଜା ସନ୍ତୁଳନରେ ଏରୋସୋଲର ସମଗ୍ର ପ୍ରଭାବ ନ୍ୟୁନତମ ରହିଛି। ଏହାର କାରଣ ହେଉଛି ଦକ୍ଷିଣ ଓ ଉତ୍ତର ଗୋଲାର୍ଦ୍ଧରେ ଏରୋସୋଲର ବ୍ୟବହାର ଭିନ୍ନ। ଉତ୍ତର ଗୋଲାର୍ଦ୍ଧରେ ଅଧିକାଂଶ ଔଦ୍ୟୋଗିକ ଗତିବିଦ୍ଧି ଥିବା ବେଳେ ବାୟୁ ମାନରେ ସୁଧାର ହୋଇଛି। ଏହାର ଅର୍ଥ ହେଉଛି ବାୟୁମଣ୍ଡଳରେ ପ୍ରଦୂଷଣର କଣିକା ହ୍ରାସ ହୋଇଛି। ବାଦଲ ଦ୍ୱାରା ସୌର ଆଲୋକକୁ ପରାବର୍ତ୍ତିତ କରୁଥିବା ସୁକ୍ଷ୍ମ କଣିକା ସଂଖ୍ୟା ହ୍ରାସ ଯୋଗୁ ଏବେ ପୃଥିବୀ ପୃଷ୍ଠକୁ ଅଧିକ ସୌରଶକ୍ତି ପହଞ୍ଚୁଛି। ଏଣୁ ସେହି କ୍ଷେତ୍ରର ତାପମାନ ବୃଦ୍ଧି ହେଉଛି।

ଅନ୍ୟପଟେ ଦକ୍ଷିଣ ଗୋଲାର୍ଦ୍ଧରେ ଭିନ୍ନ ଏକ ପ୍ରବୃତ୍ତି ଦେଖାଯାଇଛି। ୨୦୧୯-୨୦୨୦ରେ ଅଷ୍ଟ୍ରେଲିୟା ବନାଗ୍ନି ଓ ୨୦୨୨ ଟାଙ୍ଗୋ ଆଗ୍ନେୟଗିରି ଉଦଗିରଣ ଭଳି ପ୍ରାକୃତିକ ଘଟଣା ବାୟୁମଣ୍ଡଳକୁ ବହୁ ମାତ୍ରାରେ ସୁକ୍ଷ୍ମ କଣିକା ଛାଡିଛି। ଏହି ଏରୋସୋଲ କାରଣରୁ ବାଦଲ ଅଧିକ ବିକିରଣଶୀଳ ହୋଇଥିବା ବେଳେ ସୂର୍ଯ୍ୟଙ୍କ ଅଧିକାଂଶ କିରଣ ଅନ୍ତରୀକ୍ଷକୁ ଫେରି ଯାଇଛି। ଏଣୁ ଶୀତଳତା ପ୍ରଭାବ ସୃଷ୍ଟି ହୋଇଛି।

ଯେତେବେଳେ ବୈଜ୍ଞାନିମାନେ ପୁରା ଗ୍ରହର ଅଧ୍ୟୟନ କଲେ ଏହି ବିପରୀତ ପ୍ରଭାବ ଗୋଟିଏ ଅନ୍ୟଟିକୁ ଅନେକାଂଶରେ ବେଶ୍ ପ୍ରଭାବିତ କରୁଥିବା ଦେଖିବାକୁ ପାଇଛନ୍ତି। ଏହାର ପରିଣାମ ବୈଶ୍ୱିକ ଉତ୍ତାପ ବୃଦ୍ଧିରେ ଏରୋସୋଲର ବହୁତ କମ୍ ପ୍ରଭାବ ପଡୁଥିବା ଜାଣିବାକୁ ପାଇଛନ୍ତି। ଅଧ୍ୟୟନରୁ ଏହା ବି ଜଣାପଡିଲା ଯେ ପୃଥିବୀର ଉର୍ଜା ଅସନ୍ତୁଳନ ଏଥି ପାଇଁ ବଢିଛି ଯେ ଗ୍ରହ ପୂର୍ବାପେକ୍ଷା କମ୍ ସୂର୍ଯ୍ୟାଲୋକକୁ ଅନ୍ତରୀକ୍ଷକୁ ଫେରାଉଛି। ୨୦୦୩ରୁ ୨୦୨୩ ମଧ୍ୟରେ ପୃଥିବୀ ପାଖାପାଖି ପ୍ରତି ୧୦ ବର୍ଷରେ ପ୍ରତି ବର୍ଗମିଟର ଅଧା ୱାଟ୍ ସ୍ଥିର ହାରରେ ଅତିରିକ୍ତ ଶକ୍ତି ପ୍ରାପ୍ତ କରିଛି।

ଏହି ନିଷ୍କର୍ଷ ଗୁରୁତ୍ୱପୂର୍ଣ୍ଣ କାରଣ ଏଥିରୁ ବୈଜ୍ଞାନିକମାନେ ବୈଶ୍ୱିକ ତାପମାତ୍ରା ବୃଦ୍ଧିର ବାସ୍ତବିକ କାରଣକୁ ଭଲ ରୂପେ ବୁଝିବାକୁ ସକ୍ଷମ ହୋଇଛନ୍ତି। ଯଦିଓ ସ୍ୱଚ୍ଛ ବାୟୁ ଔଦ୍ୟୋଗିକ ଅଞ୍ଚଳର କିଛି ତାପମାତ୍ରା ବୃଦ୍ଧିର କାରଣ ହୁଏ ତେବେ ବୈଶ୍ୱିକ ସ୍ତରର ତାପମାତ୍ରାରେ ସମଗ୍ର ବୃଦ୍ଧିର ବ୍ୟାଖ୍ୟା କରୁ ନାହିଁ। ବୈଜ୍ଞାନିକମାନେ କହିଛନ୍ତି ଯେ ଭବିଷ୍ୟତରେ ପୃଥିବୀ ଉତପ୍ତ ହେବା ସହିତ ବାଦଲରେ ହେଉଥିବା ପରିବର୍ତ୍ତନ ଓ ପ୍ରାକୃତିକ ଜଳବାୟୁ ଚକ୍ର ଉପରେ ଅଧିକ ଧ୍ୟାନ ଦେବାର ଆବଶ୍ୟକତା ରହିଛି।