କରୁର ଦଳାଚକଟା ପାଇଁ ମାମଲା: ଟିଭିକେ ସଂସ୍ଥାପକ ବିଜୟଙ୍କୁ ସମନ କଲା ସିବିଆଇ

ନୂଆଦିଲ୍ଲୀ: Karur stampede case, କରୁର ଦଳାଚକଟା ଘଟଣାରେ ଅଭିନେତାରୁ ନେତା ସାଜିଥିବା ତାମିଲିଗା ଭେଟ୍ରି କାଝାଗମ(ଟିଭିକେ)ର ସଂସ୍ଥାପକ ବିଜୟଙ୍କୁ ସିବିଆଇ ସମନ କରିଛି। ଜାନୁଆରୀ ୧୨ ତାରିଖରେ ତାଙ୍କୁ ହାଜର ହେବାକୁ କୁହାଯାଇଛି। ୨୦୨୫ ସେପ୍ଟେମ୍ବର ୨୭ ତାରିଖରେ କରୁର ଜିଲ୍ଲା ଭେଲୁସ୍ୱାମୀପୁରମରେ ଏହି ଦଳାଚକଟା ଘଟଣା ଘଟିଥିଲା।

ଟିଭିକେର ରାଜନୈତିକ ରାଲ୍ଲି ବେଳେ ବିଜୟଙ୍କୁ ଦେଖିବାକୁ ବହୁ ସଂଖ୍ୟାରେ ଲୋକ ଭିଡ଼ ଜମାଇଥିଲେ। ବିଜୟ ଆସିବାରେ ବିଳମ୍ବ ହେବାରୁ ଦଳଚକଟା ଆରମ୍ଭ ହୋଇଯାଇଥିଲା। ଏହି ଘଟଣାରେ ୪୧ ଜଣଙ୍କର ମୃତ୍ୟୁ ହୋଇଥିଲା। ଏକାଧିକ ଆହତ ହୋଇଥିଲେ। ମାମଲାରେ ସିବିଆଇ ତଦନ୍ତ କରୁଛି। ଏହା ପୂର୍ବରୁ ମଧ୍ୟ ଟିଭିକେ ଦଳର କର୍ମୀମାନଙ୍କୁ ସିବିଆଇ ପଚରାଉଚରା କରି ସାରିଛି।

ଆରମ୍ଭରୁ ତାମିଲନାଡୁ ସରକାର ଘଟଣାରେ ସିବିଆଇ ତଦନ୍ତକୁ ବିରୋଧ କରିଥିଲେ ଏବଂ ମାମଲାର ତଦନ୍ତ ପାଇଁ ଏକ ସ୍ୱତନ୍ତ୍ର ତଦନ୍ତକାରୀ ଦଳ (SIT) ଗଠନ କରିଥିଲେ। ଆଇନ ଏବଂ ଶୃଙ୍ଖଳା ରାଜ୍ୟ ବିଷୟ ହୋଇଥିବାରୁ ଘଟଣାର ତଦନ୍ତ ପାଇଁ ଏକ ଏସଆଇଟି ଯଥେଷ୍ଟ ଏବଂ ଭଲ ବୋଲି ରାଜ୍ୟ ସରକାର ବୋଲି କୋର୍ଟ ସମ୍ମୁଖରେ ଯୁକ୍ତ ଦର୍ଶାଇଥିଲେ।

ତଥାପି କରୁର ଦଳାଚକଟା "ଜାତୀୟ ବିବେକକୁ ଦୋହଲାଇ ଦେଇଛି" ବୋଲି କହି ସୁପ୍ରିମକୋର୍ଟ ତଦନ୍ତକୁ ସିବିଆଇକୁ ହସ୍ତାନ୍ତର କରିଥିଲେ ଏବଂ ଏକ ସ୍ୱାଧୀନ ଏବଂ ନିରପେକ୍ଷ ତଦନ୍ତକୁ ଆବଶ୍ୟକ ବୋଲି କହିଥିଲେ। ଏସଆଇଟି ତଦନ୍ତ ଜାରି ରଖିବାକୁ ରାଜ୍ୟର ଆବେଦନକୁ ଗ୍ରହଣ କରିବାକୁ ସର୍ବୋଚ୍ଚ ନ୍ୟାୟାଳୟ ମନା କରିଦେଇଥିଲେ ଏବଂ କେନ୍ଦ୍ରୀୟ ଏଜେନ୍ସିକୁ ତଦନ୍ତ ଦାୟିତ୍ୱ ନେବାକୁ ଅନୁମତି ଦେଇଥିଲେ।

ତଦନ୍ତ ଦାୟିତ୍ୱ ଗ୍ରହଣ କରିବା ପରଠାରୁ, ସିବିଆଇ କାର୍ଯ୍ୟକ୍ରମ ପାଇଁ ଦିଆଯାଇଥିବା ଅନୁମତି, ଭିଡ଼ ପରିଚାଳନା ପଦକ୍ଷେପ, ପୋଲିସ ମୁତୟନ ଏବଂ ଜରୁରୀକାଳୀନ ପ୍ରତିକ୍ରିୟା ଆଦିକୁ ନେଇ ଯାଞ୍ଚ କରୁଛି। ଏଥିସହିତ ଟିଭିକେ କର୍ମକର୍ତ୍ତା ଏବଂ ଅଧିକାରୀଙ୍କ ବୟାନ ମଧ୍ୟ ରେକର୍ଡ କରୁଛି।

ଏହି ମାମଲାରେ ଏଜେନ୍ସି ସମ୍ମୁଖରେ ହାଜର ହୋଇଥିବା ନେତାଙ୍କ ମଧ୍ୟରେ ଟିଭିକେ ରାଜ୍ୟ ସାଧାରଣ ସମ୍ପାଦକ ବୁସି ଆନନ୍ଦ, ଯୁଗ୍ମ ସଚିବ ନିର୍ମଳ କୁମାର ଏବଂ ଆଧବ ଅର୍ଜୁନ ଏବଂ କରୁର ପଶ୍ଚିମ ଜିଲ୍ଲା ସମ୍ପାଦକ ମାଥିୟାଝାଗନ ଅଛନ୍ତି।

କରୁର ଦଳାଚକଟା ପରେ, ମାଡ୍ରାସ ହାଇକୋର୍ଟ ତାମିଲନାଡୁ ସରକାରଙ୍କୁ ରାଜନୈତିକ ରାଲି ଏବଂ ସାର୍ବଜନୀନ ସଭା ପାଇଁ ଏକ ଡ୍ରାଫ୍ଟ ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଡିଓର (SOP) ପ୍ରସ୍ତୁତ କରି ଦାଖଲ କରିବାକୁ ନିର୍ଦ୍ଦେଶ ଦେଇଥିଲେ ଯାହା ଦ୍ୱାରା ସାମୂହିକ କାର୍ଯ୍ୟକ୍ରମ ପାଇଁ ସୁରକ୍ଷା ପ୍ରୋଟୋକଲ ଉନ୍ନତ ହୋଇପାରିବ।