ୟୁପି SIRରେ କଟିଲେ ପ୍ରାୟ ୩ କୋଟି ଭୋଟର, ଥିଲେ ୨୫ ଲକ୍ଷ ନକଲି ଭୋଟର

ଲକ୍ଷ୍ନୌ: ଉତ୍ତର ପ୍ରଦେଶରେ ସ୍ଵତନ୍ତ୍ର ଭୋଟର ତାଲିକା ପୁନଃନିରୀକ୍ଷଣ(ଏସଆଇଆର) ପରେ କଟିଲେ ୩ କୋଟି ଭୋଟର। ଜାରି ଡ୍ରାଫ୍ଟ ଭୋଟର ତାଲିକାରେ ବିହାରଠୁ ମଧ୍ୟ ଉତ୍ତର ପ୍ରଦେଶରେ ଅଧିକ ନାଁ କଟିଛି। ନିର୍ବାଚନ ଆୟୋଗଙ୍କ ଦ୍ଵାରା ଜାରି ଡ୍ରାଫ୍ଟ ତାଲିକାରେ ପ୍ରାୟ ତିନି କୋଟି ଭୋଟରଙ୍କ ନାଁ କଟିଛି। କିନ୍ତୁ ଆୟୋଗ ଏହା ମଧ୍ୟ କହିଛନ୍ତି ଯେଉଁ ଲୋକଙ୍କ ନାଁ ଭୋଟର ତାଲିକାରୁ କଟିବା ନେଇ କୌଣସି ଆପତ୍ତି ରହିଛି, ସେମାନେ ଫେବୃଆରୀ ୬ ତାରିଖ ସୁଦ୍ଧା ଅଭିଯୋଗ କରି ପାରିବେ। ଏହା ପରେ ମାର୍ଚ୍ଚ ୧୨ରେ ଚୂଡ଼ାନ୍ତ ଭୋଟର ତାଲିକା ଜାରି କରାଯିବ।

ମଙ୍ଗଳବାର ଲୋକଭବନରେ ସାମ୍ବାଦିକ ସମ୍ମିଳନୀରେ ଉତ୍ତର ପ୍ରଦେଶର ମୁଖ୍ୟ ନିର୍ବାଚନ ଅଧିକାରୀ(ସିଇଓ) ନବଦୀପ ରିଣଓ୍ଵା କହିଛନ୍ତି, ଡ୍ରାଫ୍ଟ ମତଦାତା ତାଲିକାରେ ୧୨.୫୫ କୋଟି ଭୋଟର ତାଲିକା ସାମିଲ୍ କରାଯାଇଛି। ଏହା ପୂର୍ବରୁ ମୋଟ୍ ୧୫.୪୪ କୋଟି ଭୋଟର ଥିଲେ। ମାତ୍ର ଏସଆଇଆର ପ୍ରକ୍ରିୟାରେ ୨.୮୯ କୋଟି ଭୋଟରଙ୍କ ନାଁ କଟା ଯାଇଛି। କଟା ଯାଇଥିବା ଭୋଟରଙ୍କ ମଧ୍ୟରୁ ୪୬ ଲକ୍ଷ ୨୩ ହଜାର ମୃତ, ୨ କୋଟି ୧୭ ଲକ୍ଷ ସ୍ଥାନାନ୍ତର୨୫ ଲକ୍ଷ ୪୭ ହଜାର ନକଲି ଓ ୭୯ ଲକ୍ଷ ୫୨ ହଜାର ଭୋଟର ସାମିଲ୍।

ମୋଟାମୋଟି ଭୋଟର ତାଲିକାରୁ ୧୮ ପ୍ରତିଶତ ଭୋଟରଙ୍କ ନାଁ କଟା ଯାଇଛି। ସବୁ ଜିଲ୍ଲାରେ ଡ୍ରାଫ୍ଟ ଭୋଟର ତାଲିକା ପ୍ରକାଶ ପାଇଛି। ଜାନୁଆରୀ ୬ରୁ ଫେବୃଆରୀ ୬ ତାରିଖ ପର୍ଯ୍ୟନ୍ତ ଭୋଟର ତାଲିକାକୁ ନେଇ କାହାର କିଛି ଆପତ୍ତି ଥିଲେ ଅଭିଯୋଗ କରି ପାରିବେ। ଫେବୃଆରୀ ୨୭ ସୁଦ୍ଧା ସବୁ ଅଭିଯୋଗର ସମାଧାନ କରାଯିବ। ଏହା ପରେ ଚୂଡ଼ାନ୍ତ ଭୋଟର ତାଲିକା ମାର୍ଚ୍ଚ ୬ରେ ଜାରି କରାଯିବ।

ମୁଖ୍ୟ ନିର୍ବାଚନ ଅଧିକାରୀ କହିଛନ୍ତି, ଲକ୍ଷ୍ନୌରେ ସବୁଠୁ ଅଧିକ ୧୨ ଲକ୍ଷ ମତଦାତାଙ୍କ ନାଁ ଭୋଟର ତାଲିକାରୁ କଟାଯାଇଛି। ସେହିପରି ପ୍ରୟାଗରାଜରେ ୧୧.୫୬ ଲକ୍ଷ, କାନପୁର ନଗରରେ ୯ ଲକ୍ଷ, ଆଗ୍ରାରେ ୮.୩୬ ଲକ୍ଷ, ଗାଜିଆବାଦରେ ୮.୧୮ ଲକ୍ଷ , ବରେଲିରେ ୭.୧୪ ଲକ୍ଷ, ମେରଠରେ ୬.୬୫ ଲକ୍ଷ, ଗୋରଖପୁରରେ ୬.୪୫ ଲକ୍ଷ, ସୀତାପୁରରେ ୬.୨୩ ଲକ୍ଷ ଓ ଜୈନପୁରରେ ୫.୮୯ ଲକ୍ଷ ଭୋଟରଙ୍କ ନାଁ କଟା ଯାଇଛି। ସିଇଓ କହିଛନ୍ତି, ନୂଆ ଭୋଟରମାନେ ଫର୍ମ ୬ ଭରିବେ। ତ୍ରୁଟି ସଂଶୋଧନ ଓ ସ୍ଥାନାନ୍ତର ହୋଇଥିବା ଭୋଟର ଫର୍ମ ୮ ଭରିବେ।