କର୍ଣ୍ଣାଟକ କଂଗ୍ରେସରେ ବିଦ୍ରୋହ ! ଖଡେଗଙ୍କୁ କାହିଁକି ଭେଟିଲେ ୧୦ ବିଧାୟକ ?

ନୂଆଦିଲ୍ଲୀ, ୨୧|୧୧: କର୍ଣ୍ଣାଟକ କଂଗ୍ରେସରେ ବିଦ୍ରୋହ । ବିଧାୟକଙ୍କ ସହ ଆଲୋଚନା କଲେ ଏଆଇସିସି ସଭାପତି ମଲ୍ଲିକାର୍ଜୁନ ଖଡଗେ । ନିଜ ଘରେ କିଛି ବିଧାୟକଙ୍କୁ ଭେଟିବା ପରେ ରାଜ୍ୟରେ କଂଗ୍ରେସର ସ୍ଥିତି ଠିକ୍ ନଥିବା ଅନୁମାନ କରାଯାଉଛି । ତେବେ ବିଧାୟକଙ୍କ ଦିଲ୍ଲୀ ଗସ୍ତ ବାବଦରେ କଛି ଜାଣିନଥିବା କହିଛନ୍ତି ରାଜ୍ୟର ଉପ ମୁଖ୍ୟମନ୍ତ୍ରୀ ଡିକେ ଶିବକୁମାର । ଯାହାକୁ ନେଇ ବିବାଦ ବଢିଛି ।

ଡିକେ ଶିବକୁମାର କହିଛନ୍ତି ଯେ, ଅନେକ ବିଧାୟକ ଦିଲ୍ଲୀ ଯାଇଛନ୍ତି । କିନ୍ତୁ ସେ କିଛି ଏବାବଦରେ ଜାଣି ନାହାଁନ୍ତି । ତାଙ୍କ ପାଖରେ ଏସମ୍ବନ୍ଧରେ ସୂଚନା ନାହିଁ । ସେ ମଧ୍ୟ ଏନେଇ କାହାକୁ ପ୍ରଶ୍ନ କରିନାହାଁନ୍ତି । ଏପରିକି ତାଙ୍କ ସ୍ବାସ୍ଥ୍ୟବସ୍ଥା ଭଲ ନାହିଁ । ତେଣୁ ସେ ଘରୁ ବାହାରକୁ ଯାଉ ନଥିବା ପ୍ରକାଶ କରିଛନ୍ତି ।

ଅନ୍ୟଦିଗରେ କଂଗ୍ରେସ ଅଧ୍ୟକ୍ଷଙ୍କ କାର୍ଯ୍ୟାଳୟ ଅନୁସାରେ, ବିଧାୟକମାନେ କଂଗ୍ରେସ ସଭାପତିଙ୍କୁ ଭେଟିବାକୁ ଇଚ୍ଛା ପ୍ରକାଶ କରିଥିଲେ । ତେଣୁ ସେମାନଙ୍କୁ ଡକାଯାଇଥିଲା । ବୈଠକ ବାବଦରେ ସୁରକ୍ଷାକର୍ମୀଙ୍କୁ ପୂର୍ବରୁ ସୂଚନା ଦିଆଯାଇନଥିଲା । ଖଡଗେ ସମସ୍ତ ବିଧାୟକଙ୍କ ସହ ଆଲୋଚନା କରିଥିଲେ । ସେମାନଙ୍କ ଦାବିକୁ ଶୁଣିଥିଲେ ।

ସୂଚନାଯୋଗ୍ୟ, ଡିକେ ଶିବକୁମାରଙ୍କ ସମର୍ଥନରେ ୧୦ ଜଣ ବିଧାୟକ ଦିଲ୍ଲୀ ଗସ୍ତ କରିଥିଲେ । ସେମାନେ ରାଜ୍ୟରେ ପାଓ୍ୱାର ସେୟାରିଂ ଫର୍ମୁଲାକୁ ଲାଗୁ କରିବା ପାଇଁ ଦାବି କରିଥିଲେ । ଏହା ସେତେବେଳେ ଘଟିଛି ଯେବେ ସିଦ୍ଧରମୟା ନିଜ ସରକାରର ଅଢେଇ ବର୍ଷ ପୂରଣ କରିଥିଲେ । ଜାଙ୍କ ଜାଗାରେ ଡିକେଙ୍କୁ ମୁଖ୍ୟମନ୍ତ୍ରୀ କରିବା ପାଇଁ କିଛି ବିଧାୟକ ଦାବି କରୁଛନ୍ତି ।

ନିକଟରେ ସିଦ୍ଧରମୟା ନିଜେ ମୁଖ୍ୟମନ୍ତ୍ରୀ ରହିବେ ବୋଲି କହିଥିଲେ । ଯାହା ଉପରେ ଖୁସି ପ୍ରକଟ କରିଥିଲେ ଶିବକୁମାର । ବହୁତ ଖୁସି ଅଛି । ତାଙ୍କୁ ମୁଖ୍ୟମନ୍ତ୍ରୀ ରହିବାକୁ କିଏ ମନା କରୁଛି ବୋଲି ଶିବକୁମାର କହିଥିଲେ । ଏହାସହ ଦଳ ତାଙ୍କୁ ଯେଉଁ ଦାୟିତ୍ୱ ଦେବ ସେ ମିଳିମିଶି କାମ କରିବେ ବୋଲି ପ୍ରକାଶ କରିଥିଲେ ।