‘ପରମାଣୁ ପ୍ଲାଣ୍ଟରେ ବୋମା, ପୁଟିନ ପହଞ୍ଚିଲେ ହେବ ବିସ୍ଫୋରଣ’; କିଏ ପଠାଇଥିଲା ଇମେଲ୍ ?

ନୂଆଦିଲ୍ଲୀ: ରାଜସ୍ଥାନର ଆଜମେର ଜିଲ୍ଲା ପ୍ରଶାସନକୁ ଗୁରୁବାର ବୋମା ଧମକ ମିଳିବା ପରେ ହଇଚଇ ଖେଳିଗଲା । ଏହି ଧମକପୂର୍ଣ୍ଣ ଇମେଲ୍ କେବଳ ଆଜମେର ପାଇଁ ନଥିଲା ବରଂ ତାମିଲନାଡୁର କୁଡନକୁଲମ ପରମାଣୁ ପ୍ଲାଣ୍ଟ ପାଇଁ ମଧ୍ୟ ଥିଲା। ଇମେଲରେ ଦର୍ଶାଇଯାଇଥିବା ସ୍ଥାନରେ ସୁରକ୍ଷା ଏଜେନ୍ସି ପକ୍ଷରୁ ଆରମ୍ଭ ହୋଇଥିଲା ସର୍ଚ୍ଚ ଅପରେସନ୍ । ଇମେଲ୍ ମାଧ୍ୟମରେ ଦୁର୍ବୃତ୍ତ ଦାବି କରିଥିଲା ଯେ, ଆଜମେରର ଶରିଫ ଦରଘା, ଜିଲ୍ଲାପାଳଙ୍କ କାର୍ଯ୍ୟାଳୟ ଏବଂ କୁଡନକୁଲମ ପରମାଣୁ ଶକ୍ତି କେନ୍ଦ୍ରରେ ଆରଡିଏକ୍ସ ବିସ୍ଫୋଟକ ଖଞ୍ଜାଯାଇଛି । ରୁଷ ରାଷ୍ଟ୍ରପତି ପୁଟିନ୍ ଭାରତ ପହଞ୍ଚିବା ମାତ୍ରେ ବିସ୍ଫୋରଣ ହେବା ବୋଲି ଇମେଲ୍ରେ ଦାବି କରାଯାଇଥିଲା ବୋଲି ପୋଲିସ କହିଛି ।

ଧମକପୂର୍ଣ୍ଣ ଇମେଲ୍ ଆଜି ଦ୍ବିପ୍ରହରରେ ଆଜମେର ଜିଲ୍ଲାପାଳଙ୍କ କାର୍ଯ୍ୟାଳୟକୁ ଆସିଥିଲା। ଆଜମେରର ଦରଘା, ଜିଲ୍ଲାପାଳଙ୍କ କାର୍ଯ୍ୟାଳୟ ଏବଂ ତାମିଲନାଡୁର ନ୍ୟୁକ୍ଲିୟାର ପ୍ଲାଣ୍ଟରେ ଆରଡିଏକ୍ସ ଖଞ୍ଜାଯାଇଛି ନେଇ ଧମକ ଆସିଥିଲା । ଏନେଇ ଜଣାପଡ଼ିବା ପରେ ଏସପି ବନ୍ଦିତା ରାଣା ସମସ୍ତ ବିଭାଗକୁ ସତର୍କ କରାଇ ଦେଇଥିଲେ। ଜିଲ୍ଲାପାଳଙ୍କ କାର୍ଯ୍ୟାଳୟ ଏବଂ ଦରଘାର ପରିସରକୁ ଖାଲି କରାଯାଇ ସର୍ଚ୍ଚ ଅପରେସନ୍ ଆରମ୍ଭ ହୋଇଥିଲା । କିନ୍ତୁ କୌଣସି ବିସ୍ଫୋଟକ ମିଳିନଥିଲା ବୋଲି ଏସପି କହିଛନ୍ତି ।

ଧମକ ମିଳିଥିବା ସ୍ଥାନରେ ସିଆଇଡି, ଏଟିଏସ୍ ଏବଂ ଡଗ୍ ସ୍କ୍ବାଡ୍ ମୁତୟନ କରାଯାଇଥିଲା । ଆଖାପାଖର ସବୁ ଥାନାର ପୋଲିସ ଅଧିକାରୀ ସର୍ଚ୍ଚ ଅପରେସନ୍ରେ ସାମିଲ କରାଯାଇଥିଲା। ଶରଫି ଦରଘା ବନ୍ଦ ହୋଇଯିବା ପରେ ଗେଟ୍ ବାହାରେ ଶ୍ରଦ୍ଧାଳୁଙ୍କ ଭିଡ଼ ବଢ଼ିଥିଲା। ସର୍ଚ୍ଚ ଅପରେସନ୍ ଚାଲିଥିବା ବେଳେ କୌଣସି ବ୍ୟକ୍ତିଙ୍କୁ ଦରଘା ପରିସରକୁ ପ୍ରବେଶ ଅନୁମତି ମିଳିନଥିଲା।

ଜିଲ୍ଲାର ସବୁ ଶୀର୍ଷ ଅଧିକାରୀ ସେହି ସ୍ଥାନରେ ପହଞ୍ଚିଥିଲେ । ବୋମା ବିସ୍ଫୋରଣ ନେଇ ମିଳିଥିବା ସ୍ଥାନରେ କିଛି ମିଳି ନାହିଁ । ସେପଟେ ଏହି ଧମକପୂର୍ଣ୍ଣ ଇମେଲ୍ କିଏ ପଠାଇଛି ଜାଣିବାକୁ ତଦନ୍ତ ଜାରି ରହିଛି । ଆଜି ରୁଷ ରାଷ୍ଟ୍ରପତି ଭାରତ ଆସିଛନ୍ତି । ଏଭଳି ସମୟରେ ବୋମା ମାଡ଼ ଧମକ ଟେନସନ୍ ବୃଦ୍ଧି କରିଛି ।