ଅଭିନେତା ମନୋଜ ତିୱାରୀ, ଗୋବିନ୍ଦା ଏବଂ ଶକ୍ତି କପୁରଙ୍କ ବଢିଲା ଅଡୁଆ, ୩୦୦୦ କୋଟି ଟଙ୍କାର ଠକେଇ ମାମଲା ରୁଜୁ

ନୂଆଦିଲ୍ଲୀ ୩୧।୧: ନିବେଶ ନାମରେ ଠକେଇର ଏକ ବଡ଼ ମାମଲା ସାମ୍ନାକୁ ଆସିଛି। ଏହି ମାମଲାରେ, ଫିଲ୍ମ ଅଭିନେତା ଗୋବିନ୍ଦ, ଚଙ୍କି ପାଣ୍ଡେ, ମନୋଜ ତିୱାରୀ, ରାଜା ମୁରାଦ ଏବଂ ଶକ୍ତି କପୁରଙ୍କ ଭଳି ବଲିଉଡ ଅଭିନେତାଙ୍କ ଅଡୁଆ ବଢିଛି। ଏହି ସମସ୍ତେ ନିବେଶକଙ୍କୁ ଆକର୍ଷିତ କରିବା ପାଇଁ ନିବେଶ ଯୋଜନାର ପ୍ରଚାର କରିଥିଲେ। ନିବେଶ ପ୍ରଚାର କରିବା ଅଭିଯୋଗରେ ସମସ୍ତଙ୍କ ବିରୋଧରେ ମାମଲା କୋର୍ଟଙ୍କ ନିର୍ଦ୍ଦେଶରେ ସାକ୍ଚି ପୋଲିସ ଷ୍ଟେସନରେ ଏକ ମାମଲା ରୁଜୁ କରାଯାଇଛି।

ରିପୋର୍ଟ ଅନୁଯାୟୀ, ଗାଜିଆବାଦସ୍ଥିତ କମ୍ପାନୀ ମ୍ୟାକ୍ସିଜୋନ୍ ଟଚ୍ ପ୍ରାଇଭେଟ୍ ଲିମିଟେଡ୍ ସହିତ ଜଡିତ ଏହି ମାମଲା ଜାମସେଦପୁର କୋର୍ଟରେ ଶୁଣାଣି ହୋଇଥିଲା। ଅଭିଯୋଗ ହୋଇଛି ଯେ କମ୍ପାନୀ ବିପୁଳ ପରିମାଣ ଲାଭର ପ୍ରତିଶ୍ରୁତି ଦେଇ ନିବେଶକମାନଙ୍କୁ ପ୍ରଲୋଭିତ କରିଥିଲା। କମ୍ପାନୀରେ ନିବେଶ କଲେ ମାସିକ ପ୍ରାୟ ୧୫ ପ୍ରତିଶତ ସୁଧ ହାର ଦିଆଯିବାର ପ୍ରତିଶ୍ରୁତି ଦିଆଯାଇଥିଲା।

ଶୁକ୍ରବାର ଜାମସେଦପୁରର ଚିଫ୍ ଜୁଡିସିଆଲ ମାଜିଷ୍ଟ୍ରେଟ୍ କୋର୍ଟରେ ଏହି ମାମଲାର ଶୁଣାଣି ହୋଇଥିଲା। ଅଭିଯୋଗକାରୀ ସୁବୋଧ କୁମାର ସିଂହଙ୍କ ଆବେଦନର ଶୁଣାଣି କରି କୋର୍ଟ ଭାରତୀୟ ଦଣ୍ଡ ସଂହିତାର ଧାରା ୪୨୦,୧୨୦ ବି ଏବଂ ଅନ୍ୟାନ୍ୟ ଧାରା ଅନୁଯାୟୀ ମାମଲା ରୁଜୁ କରିବାକୁ ନିର୍ଦ୍ଦେଶ ଦେଇଛନ୍ତି। ଅଭିଯୋଗକାରୀଙ୍କ ଓକିଲ ବିଦ୍ୟା ସିଂହ କହିଛନ୍ତି, କୋର୍ଟରେ ଅଭିଯୋଗ ଦାଖଲ ହେବା ପରେ, ସମସ୍ତ ଅଭିଯୁକ୍ତଙ୍କ ବିରୁଦ୍ଧରେ ସାକ୍ଚି ପୋଲିସ ଷ୍ଟେସନରେ ମାମଲା ରୁଜୁ କରାଯିବ।

୨୦୨୧ ରୁ ୨୦୨୨ ମଧ୍ୟରେ ହୋଇଥିବା ନିବେଶ

ଅଭିଯୋଗକାରୀଙ୍କ ଅନୁଯାୟୀ, ସେମାନେ ଡିସେମ୍ବର ୨୦୨୧ ରୁ ଫେବୃଆରୀ ୨୦୨୨ ମଧ୍ୟରେ କମ୍ପାନୀରେ ବିଭିନ୍ନ କିସ୍ତିରେ ୮ ଲକ୍ଷ ଜମା କରିଥିଲେ। ଏପରିକି କିଛି ଲୋକ କମ୍ପାନୀରେ ପ୍ରାୟ ୩୦ ଲକ୍ଷ ଟଙ୍କା ପର୍ଯ୍ୟନ୍ତ ନିବେଶ କରିଥିବା ଜଣାପଡ଼ିଛି। ନିବେଶକମାନେ ଅଭିଯୋଗ କରିଛନ୍ତି , କମ୍ପାନୀ ଠିକ୍ ସମୟ ମଧ୍ୟରେ ସୁଧ ଏବଂ ମୂଳଧନ ଫେରସ୍ତ କରିବାରେ ବିଫଳ ହୋଇଛି। କମ୍ପାନୀ କହୁଛି ସେ ବହୁତ ଆର୍ଥିକ କ୍ଷତି ସହିଛି, ଯାହା ଫଳରେ ପେମେଣ୍ଟ କରିପାରିବ ନାହିଁ। ରିପୋର୍ଟ ଅନୁଯାୟୀ, ଜାମସେଦପୁରର ନିବେଶକମାନଙ୍କର ପ୍ରାୟ ୧୫୦ କୋଟି ଏବଂ ଝାଡ଼ଖଣ୍ଡର ନିବେଶକମାନଙ୍କର ପ୍ରାୟ ୬୦୦ କୋଟି କମ୍ପାନୀରେ ଫସି ରହିଛି। ମୋଟ ଠକେଇ ପ୍ରାୟ ୩୦୦୦ କୋଟି ହେବ ବୋଲି ଆକଳନ କରାଯାଉଛି। ବର୍ତ୍ତମାନ ଆଇନଗତ ପ୍ରକ୍ରିୟା ଚାଲିଛି ଏବଂ ପୋଲିସ ତଦନ୍ତ ଜାରି ରଖିଛି। ଏହି ମାମଲା ନିବେଶ ଯୋଜନାକୁ ପ୍ରୋତ୍ସାହିତ କରିବାରେ ସେଲିବ୍ରିଟିଙ୍କ ଭୂମିକା ବିଷୟରେ ମଧ୍ୟ ଅନେକ ପ୍ରଶ୍ନ ଉଠାଇଛି।