୫୦ କୋଟିର ଗାଡ଼ି, ହୀରାର ହାତ ଘଣ୍ଟା; ଛଅ ଜଣଙ୍କ ଉପରେ ଲାମ୍ବୋର୍ଗିନି ଚଢାଇଥିବା କିଏ ଏହି ଶିବମ୍ ମିଶ୍ରା

ଲକ୍ଷ୍ନୌ: ଉତ୍ତର ପ୍ରଦେଶର କାନପୁରରେ ଧନୀ ବାପାର ଉତୁପାତିଆ ପୁଅର ଆତଙ୍କରାଜ । ଟଙ୍କା ଗାଦିରେ ବସୁଥିବା ଅହଂକାରୀ ପୁଅ ନିଜ ଲାମ୍ବୋର୍ଗିନି ଛଅ ଜଣଙ୍କ ଉପରେ ଚଢ଼ାଇଦେଲା । ଏହି ଧନୀ ବ୍ୟକ୍ତି ଆଉ କେହି ନୁହନ୍ତି ବରଂ ତମାଖୁ ବ୍ୟବସାୟୀ କେକେ ମିଶ୍ରାଙ୍କ ପୁଅ, ଯାହାଙ୍କ ଘରେ ୨୦୨୪ ମସିହାରେ ଆୟକର ବିଭାଗ ଚଢାଉ କରିଥିଲା । ସେହି ସମୟରେ ତାଙ୍କର ୧୬ କୋଟି ଟଙ୍କାର ରୋଲ୍ସ ରଏସ୍ ଏବଂ ୧୦୦ କୋଟିରୁ ଅଧିକ ମୂଲ୍ୟର କାର କଲେକ୍ସନ ସମଗ୍ର ଦେଶକୁ ଚକିତ କରିଥିଲା । ସେହି ସମାନ ସମ୍ପତ୍ତି କାନପୁରର ରାସ୍ତାରେ ନିରୀହ ଲୋକଙ୍କ ପାଇଁ କାଳ ପାଲଟିଛି । ରବିବାର ବ୍ୟବସାୟୀଙ୍କ ପୁଅ ଶିବମ୍ ମିଶ୍ରା ତାଙ୍କର ହାଇ-ସ୍ପିଡ୍ ଲାମ୍ବୋର୍ଗିନି ସହିତ ଭିଆଇପି ରୋଡରେ ଆତଙ୍କ ଖେଳାଇଥିଲା ।

ସହରର ଜଣାଶୁଣା ତମାଖୁ ବ୍ୟବସାୟୀ କେକେ ମିଶ୍ରାଙ୍କ ପୁଅ ଶିବମ ମିଶ୍ର ନିଜ ଅହଂକାରରେ ତାଙ୍କ ରାସ୍ତାରେ ଆସୁଥିବା ଯେକୌଣସି ବ୍ୟକ୍ତିଙ୍କ ଉପରେ ଗାଡ଼ି ଚଢାଇ ଦେଇଥିଲେ । ବର୍ତ୍ତମାନ ଅଭିଯୁକ୍ତ ଶିବମ ମିଶ୍ରା ପୋଲିସ ହେପାଜତରେ ଅଛନ୍ତି । ତାଙ୍କ ଲାମ୍ବୋର୍ଗିନିକୁ ମଧ୍ୟ ସିଜ୍ କରାଯାଇଛି । ଶିବମ ମିଶ୍ରା ଏକ ବିଳାସପୂର୍ଣ୍ଣ ଜୀବନ ବଞ୍ଚନ୍ତି । ତାଙ୍କର୫ ୦ କୋଟି ଟଙ୍କାର କାର ଅଛି ଏବଂ ସେ ହାତରେ ଏକ ହୀରା ଘଣ୍ଟା ପିନ୍ଧନ୍ତି ।

ତମାଖୁ ବ୍ୟବସାୟୀ କେ.କେ. ମିଶ୍ରାଙ୍କ ଦିଲ୍ଲୀର ବସନ୍ତ ବିହାରରେ ଏକ ଘର ମଧ୍ୟ ଅଛି । ଏଠାରୁ ପୋଲିସ ଅନେକ ବିଳାସପୂର୍ଣ୍ଣ ଗାଡ଼ି ଜବତ କରିଛି । ତେବେ ଗୁରୁତ୍ୱପୂର୍ଣ୍ଣ କଥା ହେଉଛି, ଶିବମଙ୍କ ସମସ୍ତ ବିଳାସପୂର୍ଣ୍ଣ ଗାଡ଼ିର ନମ୍ବର ପ୍ଲେଟରେ "୪୦୧୮" ଲେଖାଯାଇଛି । ଜବତ ଗାଡ଼ିଗୁଡ଼ିକର ମୂଲ୍ୟ ୫୦ କୋଟି ବୋଲି ଆକଳନ କରାଯାଇଛି, ଯେଉଁଥିରେ ଏକ ରୋଲ୍ସ-ରଏସ୍ ଫ୍ୟାଣ୍ଟମ୍, ଏକ ମ୍ୟାକଲାରେନ୍, ଏକ ପୋର୍ସେ ଏବଂ ଏକ ଲାମ୍ବୋର୍ଗିନି ରେଭ୍ୟୁଏଲ୍ଟୋ ରହିଛି ।

ଦୁଇ ବର୍ଷ ପୂର୍ବେ ୨୦୨୪ ମସିହାରେ, କେକେ ମିଶ୍ରଙ୍କ କମ୍ପାନି ବଂଶୀଧର ଟବାକୋ ପ୍ରାଇଭେଟ୍ ଲିମିଟେଡ୍ ଉପରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଚଢାଉ କରିଥିଲା । ଏହି ଚଢଉ ଅନେକ ରାଜ୍ୟରେ ବ୍ୟାପିଥିଲା, ଯେଉଁଥିରେ ଶିବମଙ୍କ ବାପାଙ୍କ କମ୍ପାନି ଜଡିତ ଥିଲା । ଆୟକର ବିଭାଗ କାନପୁର, ଦିଲ୍ଲୀ, ମୁମ୍ବାଇ ଏବଂ ଗୁଜରାଟର ୨୦ଟି ସ୍ଥାନରେ ତଲାସ କରିଥିଲା । ପାଞ୍ଚଟି ରାଜ୍ୟରେ ପ୍ରାୟ ୧୫ରୁ ୨୦ଟି ଦଳ ଏହି ଅପରେସନରେ ସାମିଲ ଥିଲେ ।

ରିପୋର୍ଟରେ ଦାବି କରାଯାଇଛି ଯେ କମ୍ପାନି ବାର୍ଷିକ ୨୦-୨୫ କୋଟି ରାଜସ୍ୱ ଉଲ୍ଲେଖ କରିଥିଲା । କିନ୍ତୁ ଏହାର ପ୍ରକୃତ କାରବାର ୧୦୦-୧୫୦ କୋଟି ମଧ୍ୟରେ ଆକଳନ କରାଯାଇଥିଲା । ଅଧିକାରୀମାନେ କମ୍ପାନfର ଘୋଷିତ ଆୟ ଏବଂ ପ୍ରକୃତ କାରବାର ଭିନ୍ନ ଥିବା ଅଭିଯୋଗ କରିଥିଲେ । ଆୟକର ବିଭାଗ କମ୍ପାନି ଉପରେ ଆୟକର ଆଇନ ଏବଂ ଜିଏସଟି ନିୟମାବଳୀ ଉଲ୍ଲଂଘନ କରୁଥିବା ସନ୍ଦେହ କରିଥିଲା । ତଦନ୍ତରେ ଏହା ମଧ୍ୟ ସନ୍ଦେହ କରାଯାଇଥିଲା ଯେ ଅଫଶୋର ଆକାଉଣ୍ଟ ଏବଂ ହେରଫେର ହୋଇଥିବା ଲେଜର ମାଧ୍ୟମରେ ପାଣ୍ଠି ଲୁଚାଇବାକୁ ଚେଷ୍ଟା କରାଯାଇଥିଲା ।