ପିଲାଙ୍କ ସହ ସାମାନ୍ୟ ଅଶ୍ଲୀଳ ଆଚରଣ ମଧ୍ୟ ଦୁଷ୍କର୍ମ ଶ୍ରେଣୀଭୁକ୍ତ : ବମ୍ବେ ହାଇକୋର୍ଟ

ନାଗପୁର୨୧।୧୦: ବମ୍ବେ ହାଇକୋର୍ଟଙ୍କ ନାଗପୁର ବେଞ୍ଚ କହିଛନ୍ତି ଯେ ଯଦି କେହି ପିଲାଙ୍କ ସହିତ ସାମାନ୍ୟ ଅଶ୍ଳୀଳ ଆଚରଣ କରନ୍ତି ତେବେ ଏହାକୁ ଦୁଷ୍କର୍ମ ଶ୍ରେଣୀରେ ରଖାଯିବା ଦରକାର। ୩୮ ବର୍ଷ ବୟଷ୍କ ଅଭିଯୁକ୍ତଙ୍କ ଆବେଦନକୁ ଖାରଜ କରି କୋର୍ଟ କହିଛନ୍ତି ଯେ ସେ ୫ ଓ ୬ ବର୍ଷର ବାଳିକାମାନଙ୍କ ସହିତ ଅଭଦ୍ର ଆଚରଣ କରିଥିଲା। ଏଣୁ ଏହା ପକସୋ ମାମଲା ଅଟେ। କୋର୍ଟ ଅଭିଯୁକ୍ତର ୧୦ବର୍ଷ ଜେଲଦଣ୍ଡାଦେଶକୁ ମଧ୍ୟ କାୟମ ରଖିଛନ୍ତି।

ଅଭିଯୁକ୍ତ ପେଷାରେ ଜଣେ ଡ୍ରାଇଭର ଓ ସେ ୱର୍ଦ୍ଧା ଜିଲ୍ଲାର ହିଙ୍ଗଘାଟ ବାସିନ୍ଦା। ନାଗପୁର ବେଞ୍ଚଙ୍କ ବିଚାରପତି ଜଷ୍ଟିସ୍ ନିବେଦିତା ମେହେଟ୍ଟା ମାମଲାରେ ରାୟ ଘୋଷଣା କରି କହିଛନ୍ତି ଯେ ପୀଡ଼ିତାଙ୍କ ସହିତ କୌଣସି ପ୍ରକାରର ଅଶ୍ଲୀଳ ଆଚରଣ ତାଙ୍କୁ ଛୁଇଁବା ବା ତାଙ୍କ ସହ ବଳ ପ୍ରୟୋଗ କରିବାକୁ ଉଦ୍ୟମ କରିବା ମାମଲା ଦୁଷ୍କର୍ମ ଶ୍ରେଣୀର ହୋଇଯାଏ। ସୂଚନା ଅନୁସାରେ ଅଭିଯୁକ୍ତ ନାବାଳିକାଙ୍କୁ ପିଜୁଳି ଲୋଭ ଦେଖାଇ ପାଖକୁ ଡାକିଥିଲା ଓ ସେମାନଙ୍କୁ ଅଶ୍ଳୀଳ ଭିଡିଓ ଦେଖାଇଥିଲା। ଅଭିଯୁକ୍ତ ସେମାନଙ୍କୁ ଯୌନ ଉତ୍ପୀଡ଼ନ କରିବାକୁ ଉଦ୍ୟମ କରିଥିଲା।

ଅଭିଯୁକ୍ତ ବିରୋଧରେ ପକସୋ ଆକ୍ଟ ଓ ଆଇପିସିର ଧାରା ୩୭୬ (୨)(ଆଇ) ଓ ୫୧୧ ରେ ମକଦ୍ଦମା ରୁଜୁ ହୋଇଥିଲା। ଅଭିଯୁକ୍ତଙ୍କୁ ନିମ୍ନ କୋର୍ଟ ୫୦ ହଜାର ଟଙ୍କା ଜରିମନା ନିର୍ଦ୍ଦେଶ ମଧ୍ୟ ଦେଇଛନ୍ତି। ଜଷ୍ଟିସ୍ ମେହେଟା କହିଛନ୍ତି ଯେ ପୀଡ଼ିତା ଓ ସେମାନଙ୍କ ମାଙ୍କ ବୟାନ ଓ ଫରେନସିସ ପ୍ରମାଣରୁ ଏହା ଜଣାପଡୁଛି ଯେ ସେମାନଙ୍କ ପ୍ରତି ଯୌନନିର୍ଯାତନା ଉଦ୍ୟମ ହୋଇଥିଲା। ସେ କହିଛନ୍ତି ଯେ ଘଟଣାର ୧୫ ଦିନ ପରେ ଡାକ୍ତରୀ ପରୀକ୍ଷଣ କରାଯିବା କାରଣରୁ ପୀଡ଼ିତାଙ୍କ ପ୍ରାଇଭେଟ ପାର୍ଟରେ ଆଘାତ ଚିହ୍ନ ଦେଖାଯାଇ ନାହିଁ। ଏହାମାନେ ନୁହେଁ ଯେ ଅଭିଯୁକ୍ତ ଯୌନ ଉତ୍ପୀଡ଼ନ କରି ନାହିଁ। ଏଥିରେ ଅଭିଯୁକ୍ତ ତା ଆବେଦନରେ ଉଲ୍ଲେଖ କରିଥିଲା ଯେ ପୀଡ଼ିତାଙ୍କ ପରିବାର ସହ ପୁରୁଣା ଶତ୍ରୁତା ଯୋଗୁ ତା ବିରୋଧରେ ଏଭଳି ଅଭିଯୋଗ ଅଣାଯାଇଛି।

ଜଷ୍ଟିସ୍ ମେହେଟ୍ଟା କହିଛନ୍ତି ଯେ ଘଟଣା କାଳରେ ପକସୋ ଆଇନରେ ଥିବା ପ୍ରାବଧାନ ଅନୁସାରେ ଅଭିଯୁକ୍ତ ବିରୋଧରେ ଦଣ୍ଡବିଧାନ କରାଯିବା ଦରକାର। ଅଗଷ୍ଟ ୨୦୧୯ରେ ଆଇନ ସଂଶୋଧନ ପରେ ଅନୁନ୍ୟ ୨୦ ବର୍ଷ ଦଣ୍ଡ ବ୍ୟବସ୍ଥା କରାଯାଇଛି। ତେବେ ଲୋଅର କୋର୍ଟ ଅଭିଯୁକ୍ତ ପ୍ରତି କରିଥିବା ୧୦ ବର୍ଷ ସଶ୍ରମ କାରାଦଣ୍ଡାଦେଶ ଯଥେଷ୍ଠ ବୋଲି ହାଇକୋର୍ଟ ବେଞ୍ଚ କହିଛନ୍ତି।