ଦିନେ ଗୋଟିଏ ଟିମରେ କାମ କରୁଥିଲେ, ଏଆଇ ସମିଟରେ ସାମ ଅଲ୍ଟମ୍ୟାନ ଓ Anthropic ସିଇଓଙ୍କ ବିବାଦ ଦେଖିଲା ଦୁନିଆ

ନୂଆଦିଲ୍ଲୀ: ଇଣ୍ଡିଆ ଏଆଇ ଇମ୍ପାକ୍ଟ ସମିଟର ଚତୁର୍ଥ ଦିନରେ ପ୍ରଧାନମନ୍ତ୍ରୀ ମୋଦୀଙ୍କ ସହ ମଞ୍ଚ ସେୟାର କରିଥିଲେ ଦୁନିଆର ଅନେକ୍ ଟେକ୍ ଲିଡର । ଏହି ସମୟରେ ଏଆଇ ଦୁନିଆର ଦୁଇ ଶକ୍ତିଶାଳୀ ବ୍ୟକ୍ତିଙ୍କ ମଧ୍ୟରେ ଥିବା ବିବାଦ ସାର୍ବଜନୀନ ହୋଇଥିଲା । ମଞ୍ଚ ଉପରେ ଓପନଏଆଇ ସିଇଓ ସାମ୍ ଅଲ୍ଟମ୍ୟାନ ଓ ଆଣ୍ଟ୍ରୋପିକ୍ ସିଇଓ ଡାରିଓ ଆମୋଡେଇ ପରସ୍ପରକୁ ହାତ ନମିଶାଇବା ଦୃଶ୍ୟ ସୋସିଆଲ୍ ମିଡିଆରେ ଖୁବ ଭାଇରାଲ୍ ହୋଇଛି ।

ଡାରିଓ ଆମୋଡେଇ ପୂର୍ବରୁ ଓପନଏଇ କୋର୍ ଟିମର ଅଂଶ ଥିଲେ । ଚାଟଜିପିଟିର ମୂଳଦୁଆ ପକାଇଥିବା ଟିମର ଗୁରୁତ୍ୱପୂର୍ଣ୍ଣ ସଦସ୍ୟ ଥିଲେ । କିନ୍ତୁ ୨୦୨୧ରେ ଆମୋଡେଇ ଓ ତାଙ୍କ ଟିମ୍ ଓପନଏଆଇ ଛାଡ଼ିଥିଲେ ଏବଂ Anthropic ନାମକ କମ୍ପାନି ଆରମ୍ଭ କରିଥିଲେ ।

ଡାରିଓ ଓପନଏଆଇ ଛାଡ଼ିବା ପଛରେ ଦୁହିଁଙ୍କ ମଧ୍ୟରେ ମତଭେଦ ମୂଳ କାରଣ ଥିଲା । ତାଙ୍କ ମତରେ ଏଆଇ ଦ୍ରୁତ ଗତିରେ ଆଗକୁ ବଢୁଛି ଓ ସୁରକ୍ଷା ଉପରେ ଯେତିକି ଧ୍ୟାନ ଦିଆଯିବା କଥା ସେତିକି ଧ୍ୟାନ ଦିଆଯାଉ ନାହିଁ । ସେ ଏଆଇକୁ ଅଧିକ ନିୟନ୍ତ୍ରଣ ଓ ନିୟମ ସହ ଆଗକୁ ବଢାଇବାକୁ ଚାହୁଁଥିଲେ ।

ଅନ୍ୟପଟେ ସାମ୍ ଅଲ୍ଟମ୍ୟାନଙ୍କ ଚିନ୍ତାଧାରା ଅଲଗା ଥିଲା । ଓପନଏଆଇ ଦ୍ରୁତ ଗତିରେ ନିଜର ନୂଆ ନୂଆ ପ୍ରୋଜେକ୍ଟ ଲଞ୍ଚ୍ କରିବା ଆରମ୍ଭ କରିଥିଲା । ଚାଟଜିପିଟିକୁ ସାଧାରଣ ଲୋକଙ୍କ ନିକଟରେ ପହଞ୍ଚାଇଥିଲେ । ବିଜନେସ୍ ମଡେଲ୍ ତିଆରି କଲେ । ଏଣ୍ଟରପ୍ରାଇଜ୍ ଟୁଲ୍ସ ବାହାର କରିଥିଲେ । ଉଦ୍ଦେଶ୍ୟ ଥିଲା ଅଧିକରୁ ଅଧିକ ଲୋକ ଏଆଇ ବ୍ୟବହାର କରିପାରିବେ ଓ ଫିଡବ୍ୟାକ୍ ସିଷ୍ଟମ ଉନ୍ନତ ହୋଇପାରିବ । ଏହା ହିଁ ଦୁଇ ଜଣଙ୍କ ମଧ୍ୟରେ ଦୂରତାର ପ୍ରଥମ କାରଣ ହୋଇଥିଲା ।

ସମୟ ସହ ଏହି ଦୂରତା କେବଳ ବିଚାରଧାରାରେ ସୀମିତ ରହିଲା ନାହିଁ । ଏହା କାରବାର ଓ ବ୍ରାଣ୍ଡ ମଧ୍ୟରେ ଟକ୍କରରେ ପରିଣତ ହୋଇଥିଲା । Anthropic ନିଜକୁ ସେଫ୍ଟି ଫାର୍ଷ୍ଟ କମ୍ପାନି ରୂପେ ଲୋକଙ୍କ ସାମନାକୁ ଆଣିଲା । ଅନ୍ୟପଟେ ଓପନଏଆଇ ଏଆଇକୁ ବଡ଼ ମାତ୍ରାରେ ଲୋକଙ୍କ ପାଖରେ ପହଞ୍ଚାଇବା ଉପରେ ଫୋକସ ରଖିଛି । ଏପରିକି ଦୁଇ କମ୍ପାନି ମଧ୍ୟରେ ବିଜ୍ଞାପନ ଓ ମାର୍କେଟିଂକୁ ନେଇ ମଧ୍ୟ ବିବାଦ ଦେଖିବାକୁ ମିଳିଥିଲା । Anthropic କିଛି ପବ୍ଲିକ୍ କ୍ୟାମ୍ପେନକୁ ନେଇ ସାମ୍ ଅଲ୍ଟମ୍ୟାନଙ୍କ ପ୍ରତି ଖୋଲାଖୋଲି ଅସନ୍ତୋଷ ବ୍ୟକ୍ତ କରିଥିଲେ । ଏହା ପରେ ଦୁହିଁଙ୍କ ମଧ୍ୟରେ ପ୍ରଫେସନାଲ୍ ବୟାନବାଜି ସାମନାକୁ ଆସିଥିଲା ।

ବିଶେଷଜ୍ଞମାନେ କୁହନ୍ତି ଯେ ଏହା ଏକ ବ୍ୟକ୍ତିଗତ ମତଭେଦ ନୁହେଁ । ଏହା ଦୁଇଟି ଭିନ୍ନ ମାନସିକତା ଏବଂ ଦୁଇଟି ଭିନ୍ନ ମାର୍ଗ ମଧ୍ୟରେ ସଂଘର୍ଷ । ଗୋଟିଏ ମାର୍ଗ ହେଉଛି ଦ୍ରୁତ ଅଭିବୃଦ୍ଧି ଏବଂ ଶୀଘ୍ର ଗ୍ରାହକଙ୍କ ନିକଟରେ ପହଞ୍ଚିବା, ଅନ୍ୟଟି ହେଉଛି ଧୀର କିନ୍ତୁ ଅଧିକ ସୁରକ୍ଷିତ । ସାମ୍ ଅଲ୍ଟମ୍ୟାନ୍ ଏବଂ ଡାରିଓ ଆମୋଡେଇ ଉଭୟ ବିଶ୍ୱାସ କରନ୍ତି ଯେ AI ବିଶ୍ୱକୁ ବଦଳାଉଛି । କେବଳ ପାର୍ଥକ୍ୟ ହେଉଛି ଏହାକୁ କିପରି ଆଗକୁ ନିଆଯିବ ।