ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କିଙ୍କ ସହ ଫୋନ୍ ଯୋଗେ କଥା ହୋଇଛନ୍ତି । ଚୀନରେ ରାଷ୍ଟ୍ରପତି ପୁଟିନଙ୍କ ସହ ହେବାକୁ ଥିବା ବୈଠକ ପୂର୍ବରୁ ପିଏମ୍ ମୋଦୀ ଓ ରାଷ୍ଟ୍ରପତି ଜେଲେନସ୍କିଙ୍କ ମଧ୍ୟରେ ଏହି ଗୁରୁତ୍ୱପୂର୍ଣ୍ଣ ଆଲୋଚନା ହୋଇଛି । ଏହି କଥାବର୍ତ୍ତାରେ ରାଷ୍ଟ୍ରପତି ଜେଲେନସ୍କି ୟୁକ୍ରେନରେ ଚାଲିଥିବା ଘଟଣାକ୍ରମ ଉପରେ ପିଏମ୍ ମୋଦୀଙ୍କୁ ବିସ୍ତୃତ ସୂଚନା ଦେଇଛନ୍ତି । ପ୍ରଧାନମନ୍ତ୍ରୀଙ୍କ କାର୍ଯ୍ୟକାଳୟ ମୁତାବକ, ସଂଘର୍ଷର ଶାନ୍ତିପୂର୍ଣ୍ଣ ସମାଧାନ ଓ ଶାନ୍ତି ସ୍ଥାପନା ପ୍ରୟାସ ପ୍ରତି ଭାରତର ଦୃଢ ଓ ନିରନ୍ତର ଆଭିମୁଖ୍ୟକୁ ଦୋହରାଇଛନ୍ତି । ଏହାସହ ଏହି ପ୍ରସଙ୍ଗରେ ସବୁ ସମ୍ଭବ ସହଯୋଗ ହେବା ପାଇଁ ଭାରତର ପ୍ରତିବଦ୍ଧତାକୁ ଦୋହରାଇଛନ୍ତି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏକ୍ସରେ ଲେଖିଛନ୍ତି, 'ଆଜିର ଫୋନ କଲ୍ ପାଇଁ ରାଷ୍ଟ୍ରପତି ଜେଲେନସ୍କିଙ୍କୁ ଧନ୍ୟବାଦ । ଆମେ ଚାଲିଥିବା ସଂଘର୍ଷ, ଏହାର ମାନବିକ ଦିଗ, ଶାନ୍ତି ଏବଂ ସ୍ଥିରତା ଫେରାଇ ଆଣିବା ପାଇଁ ପ୍ରୟାସ ଉପରେ ମତ ବିନିମୟ କରିଛୁ । ଭାରତ ଏହି ଦିଗରେ ସମସ୍ତ ପ୍ରୟାସକୁ ପୂର୍ଣ୍ଣ ସମର୍ଥନ କରେ।'
Thank President Zelenskyy for his phone call today. We exchanged views on the ongoing conflict, its humanitarian aspect, and efforts to restore peace and stability. India extends full support to all efforts in this direction. @ZelenskyyUa
— Narendra Modi (@narendramodi) August 30, 2025
ୟୁକ୍ରେନ ରାଷ୍ଟ୍ରପତି ଜେଲେନସ୍କି ଏକ୍ସରେ ଲେଖିଛନ୍ତି, 'ମୁଁ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ କଥା ହୋଇଛି । ୱାଶିଂଟନରେ ରାଷ୍ଟ୍ରପତି ଟ୍ରମ୍ପ ଓ ୟୁରୋପୀୟ ନେତାଙ୍କ ଆଲୋଚନା ବାବାଦରେ ମୁଁ ସୂଚନା ପ୍ରଦାନ କଲି । ୟୁକ୍ରେନ ରୁଷର ଶୀର୍ଷ ନେତାଙ୍କ ସହ ବୈଠକ ପାଇଁ ନିଜର ତତ୍ପରତା ଦୋହରାଇଥିଲା । ଏହି ଆଲୋଚନାକୁ ଦୁଇ ସପ୍ତାହ ବିତି ସାରିଛି, କିନ୍ତୁ ରୁଷ କୌଣସି ସକାରାତ୍ମକ ସଂକେତ ଦେଇ ନାହିଁ । ସେ କେବଳ ନାଗରିକଙ୍କ ଠିକଣା ଉପରେ ନିନ୍ଦନୀୟ ଆକ୍ରମଣ କରୁଛି ଓ ଆମର ଲୋକଙ୍କୁ ହତ୍ୟା କରୁଛି । ପୀଡ଼ିତ ପରିବାର ଲୋକ ଓ ପ୍ରିୟଜନଙ୍କ ପ୍ରତି ସମବେଦନା ଲାଗି ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଉଛି । ଏସିଓ ବୈଠକ ପୂର୍ବରୁ ଆମ ସ୍ଥିତିର ସମନ୍ୱୟ ସ୍ଥାପନ କରିଛୁ । ଭାରତ ଶିଖର ସମ୍ମିଳନୀରେ ଆବଶ୍ୟକୀୟ ପ୍ରୟାସ କରିବାକୁ ଏବଂ ଉପଯୁକ୍ତ ସଙ୍କେତ ପଠାଇବାକୁ ପ୍ରସ୍ତୁତ । ନିକଟ ଭବିଷ୍ୟତରେ ପ୍ରଧାନମନ୍ତ୍ରୀଙ୍କୁ ଭେଟି ମୁଁ ଖୁସି ହେବି।'
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ଜେଲେନସ୍କିଙ୍କ ମଧ୍ୟରେ ଫୋନରେ ହୋଇଥିବା କଥାବର୍ତ୍ତା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । କାରଣ ଏସସିଓ ଶିଖର ସମ୍ମିଳନୀରେ ପ୍ରଧାନମନ୍ତ୍ରୀ ମୋଦୀ ଓ ରୁଷ ରାଷ୍ଟ୍ରପତି ପୁଟିନଙ୍କ ମଧ୍ୟରେ ଦ୍ୱିପାକ୍ଷିକ ଆଲୋଚନା ହୋଇପାରେ । ଏହି ବୈଠକରେ ରୁଷ-ୟୁକ୍ରେନ ସଂଘର୍ଷ, ଦ୍ୱିପାକ୍ଷିକ ବାଣିଜ୍ୟ, ଟାରିଫ୍ ଓ ଏନର୍ଜି ସେକ୍ଟର ପରି ପ୍ରସଙ୍ଗରେ ଆଲୋଚନା ହୋଇପାରେ ।
