ନୂଆଦିଲ୍ଲୀ: ବାଲେଶ୍ୱର ଫକିରମୋହନ ବିଶ୍ୱ ବିଦ୍ୟାଳୟ ଛାତ୍ରୀ ଆତ୍ମାହୁତି ଘଟଣାରେ ପ୍ରତିକ୍ରିୟା ପ୍ରକାଶ କରିଛନ୍ତି ସୁପ୍ରିମକୋର୍ଟ। ଘଟଣା ଅତ୍ୟନ୍ତ ଲଜ୍ଜାଜନକ ବୋଲି କୋର୍ଟ କହିଛନ୍ତି। ଏଥିସହିତ ଗ୍ରାମାଞ୍ଚଳରେ ସ୍କୁଲ ଝିଅମାନଙ୍କୁ, ଗୃହିଣୀ ଏବଂ ପିଲାମାନଙ୍କୁ ସଶକ୍ତ କରିବା ପାଇ କ’ଣସବୁ ପଦକ୍ଷେପ ନିଆଯାଇପାରିବ କୋର୍ଟ ସେ ନେଇ ପରାମର୍ଶ ଲୋଡ଼ିଛନ୍ତି।
ମଙ୍ଗଳବାର ସୁପ୍ରିମକୋର୍ଟ ମହିଳା ଓକିଲ ସଂଘର ଓକିଲ ଏହି ଘଟଣା ସମ୍ପର୍କରେ ସୁପ୍ରିମକୋର୍ଟଙ୍କ ଦୃଷ୍ଟି ଆକର୍ଷଣ କରିଥିଲେ। ଘଟଣା ବିଷୟରେ ଅବଗତ ହେବା ପରେ ବିଚାରପତି ସୂର୍ଯ୍ୟକାନ୍ତ ଏବଂ ଜୟମାଲ୍ୟ ବାଗଚୀଙ୍କ ଖଣ୍ଡପୀଠ ଏହାକୁ ନିନ୍ଦା କରିଥିଲେ। ଖଣ୍ଡପୀଠ କହିଥିଲେ “ଆମେ ଲଜ୍ଜିତ ଏବଂ ଦୁର୍ଭାଗ୍ୟଜନକ ଯେ ଏହି ଘଟଣାଗୁଡ଼ିକ ଏବେ ବି ଘଟୁଛି। ଏହା ପ୍ରତିଦ୍ୱନ୍ଦ୍ୱୀମୂଳକ ମାମଲା ନୁହେଁ। ଆମକୁ କେନ୍ଦ୍ର ଏବଂ ସମସ୍ତ ପକ୍ଷଙ୍କଠାରୁ ପରାମର୍ଶ ଆବଶ୍ୟକ।”
କୋର୍ଟ ଆହୁରି କହିଛନ୍ତି “ସ୍କୁଲ ଝିଅ, ଗୃହିଣୀ, ଗ୍ରାମାଞ୍ଚଳର ପିଲାମାନଙ୍କୁ, ଯେଉଁମାନେ ସବୁଠାରୁ ଦୁର୍ବଳ ଏବଂ ନିଜ ପାଇଁ ସ୍ୱର ଉଠାଇ ପାରୁ ନାହାନ୍ତି, ସେମାନଙ୍କୁ ସଶକ୍ତ କରିବା ପାଇଁ କ'ଣ ଠୋସ୍ ପଦକ୍ଷେପ ନିଆଯାଇପାରିବ ସେ ବିଷୟରେ ଆମକୁ ସମସ୍ତଙ୍କ ଠାରୁ ପରାମର୍ଶ ଆବଶ୍ୟକ। ଆମର ନିର୍ଦ୍ଦେଶାବଳୀର କିଛି ପ୍ରଭାବ ଏବଂ ଦୃଶ୍ୟମାନ ଛାପ ରହିବା ଉଚିତ।"
ମହିଳା, ଶିଶୁ ଏବଂ ଟ୍ରାନ୍ସପର୍ସନଙ୍କ ପାଇଁ ଏକ ସୁରକ୍ଷିତ ପରିବେଶ ଗଢ଼ିବାକୁ ସମଗ୍ର ଭାରତରେ ଏକ ମାର୍ଗଦର୍ଶିକା ଜାରି କରିବାକୁ ହୋଇଥିବା ଏକ ଆବେଦନର ଖଣ୍ଡପୀଠ ଶୁଣାଣି କରିଥିଲେ। ଶୁଣାଣି ସମୟରେ, ବରିଷ୍ଠ ଓକିଲ ମହାଲକ୍ଷ୍ମୀ ପାୱାନି କହିଥିଲେ ଯେ ଦୁର୍ଭାଗ୍ୟର କଥା ଯେ କିଛି ପରିବର୍ତ୍ତନ ହେବା ପାଇଁ ଆଜି ଏକ ବିପର୍ଯ୍ୟୟର ଆବଶ୍ୟକତା ପଡ଼ୁଛି। ଓଡ଼ିଶା ଆତ୍ମଦାହ ମାମଲାରେ, ପାୱାନି କହିଥିଲେ ଯେ ପୀଡିତା ହେଲ୍ପଲାଇନ୍କୁ ଫୋନ୍ କରିଥିଲେ କିନ୍ତୁ ତାଙ୍କୁ କୌଣସି ସାହାଯ୍ୟ ଦିଆଯାଇ ନଥିଲା ଏବଂ ସରକାରଙ୍କୁ ଚିଠି ମଧ୍ୟ ପଠାଯାଇଥିଲା।
ଯେହେତୁ ବ୍ୟବସ୍ଥା ଘଟଣାକୁ କର୍ଣ୍ଣପାତ କଲା ନାହିଁ, ତେଣୁ ଏହାକୁ ସାଂସ୍ଥାଗତ ହତ୍ୟା ବୋଲି କହିଛନ୍ତି ବରିଷ୍ଠ ଓକଲି ପାୱାନି। ସେ ଆହୁରି କହିଛନ୍ତି ଯେ ଆଇନ ଏବଂ ଉପଲବ୍ଧ ପ୍ରକ୍ରିୟା ବିଷୟରେ କୌଣସି ସଚେତନତା ନାହିଁ। ଲୋକମାନେ ଅନଲାଇନ୍ ଅଭିଯୋଗ ପ୍ରକ୍ରିୟା ବିଷୟରେ ସଚେତନ ନ ଥିଲେ ସେମାନେ ଏକପ୍ରକାର ଅକ୍ଷମ ହୋଇଯାଉଛନ୍ତି।
ଏନେଇ ଅତିରିକ୍ତ ସଲିସିଟର ଜେନେରାଲ ବିକ୍ରମଜିତ ବାନାର୍ଜୀ ଏନେଇ କୋର୍ଟକୁ କହିଥିଲେ ଯେ ଯୌନ ଅପରାଧୀଙ୍କ ଏକ ଜାତୀୟ ଡାଟାବେସ୍ ସୃଷ୍ଟି କରାଯାଇଛି। ତଥାପି, ପାୱାନି କୋଲକାତା ଗଣଦୁଷ୍କର୍ମ ମାମଲାର ଉଦାହରଣ ଦେଇଥିଲେ। ଯେଉଁଥିରେ ଜଣେ ୨୪ ବର୍ଷୀୟ ଆଇନ ଛାତ୍ରୀଙ୍କୁ ପୂର୍ବତନ ଛାତ୍ର ମନୋଜିତ ମିଶ୍ର ଏବଂ ଅନ୍ୟ ଦୁଇଜଣ ଯୌନ ନିର୍ଯାତନା ଦେଇଥିବା ଅଭିଯୋଗ ହୋଇଛି। ସେ କହିଛନ୍ତି ଯେ ଅଭିଯୁକ୍ତ ମିଶ୍ରଙ୍କ ବିରୋଧରେ ଅନ୍ୟ ୧୧ଟି ଅଭିଯୋଗ ଅଛି।
ସଂସ୍ଥାଗତ ବିଫଳତାକୁ ଜୋର ଦେଇ ପୱାନ କହିଥିଲେ ଯେ ଯେତେବେଳେ ହଇରାଣର ଶିକାର ହେଉଥିବା ମହିଳାମାନେ ପୋଲିସ ସାହାଯ୍ୟ ପାଇବା ପରିବର୍ତ୍ତେ ହେଲ୍ପଲାଇନ୍କୁ କଲ୍ କରନ୍ତି, ସେତେବେଳେ ସେମାନଙ୍କୁ ନୈତିକ ପୁଲିସ ଭାଷଣ ଶୁଣିବାକୁ ମିଳିଥାଏ। ଏଠାରେ ସାଂସ୍ଥାଗତ ବିଫଳତା ଅଛି ବୋଲି ସେ ତର୍କ ରଖିଥିଲେ।
