ନୂଆଦିଲ୍ଲୀ ୨୩/୦୭ : ଜଗଦୀପ ଧନଖଡ଼ ଉପରାଷ୍ଟ୍ରପତି ପଦରୁ ଇସ୍ତଫା ଦେବା ପରେ ଯଥାଶୀଘ୍ର ତାଙ୍କ ଉତ୍ତରାଧିକାରୀ ଚୟନ ପାଇଁ ନିର୍ବାଚନ ହେବ। ସମ୍ବିଧାନର ଧାରା ୬୮ର ଉପଧାରା ୨ ଅନୁଯାୟୀ ମୃତ୍ୟୁ, ଇସ୍ତଫା, ଅପସାରଣ କିମ୍ବା ଅନ୍ୟ କୌଣସି କାରଣରୁ ଉପରାଷ୍ଟ୍ରପତି ପଦ ଖାଲି ହେବା ପରେ ସେହି ପଦବୀ ପୂରଣ ପାଇଁ ଯଥାଶୀଘ୍ର ନିର୍ବାଚନ ହେବା ଜରୁରି। ଏହି ପଦ ପାଇଁ ନିର୍ବାଚିତ ବ୍ୟକ୍ତି ଦାୟିତ୍ବ ଗ୍ରହଣ କରିବା ଦିନଠାରୁ ପୂରା ୫ ବର୍ଷ ପର୍ଯ୍ୟନ୍ତ ପଦରେ ରହିବେ।
ତେବେ ସୂଚନା ମିଳିଛି ଯେ, ଆଜିଠାରୁ କିମ୍ବା ଆଗାମୀ ୨୪ଘଣ୍ଟା ମଧ୍ୟରେ ଭାରତୀୟ ନିର୍ବାଚନ କମିଶନ ଏହି ପ୍ରକ୍ରିୟା ଆରମ୍ଭ କରିବାର ସମ୍ଭାବନା ରହିଛି। ନୂତନ ଉପରାଷ୍ଟ୍ରପତିଙ୍କ ନିର୍ବାଚନ ପ୍ରକ୍ରିୟା ଗୋଟିଏ ମାସ ମଧ୍ୟରେ ସମାପ୍ତ ହେବ ବୋଲି ଆଶା କରାଯାଉଛି। ହେଲେ ଏଥିପାଇଁ ଏପର୍ଯ୍ୟନ୍ତ କୌଣସି ସରକାରୀ ବିଜ୍ଞପ୍ତି ଜାରି ହୋଇନାହିଁ।
ଉଲ୍ଲେଖଯୋଗ୍ୟ, ସୋମବାର ସନ୍ଧ୍ୟାରେ ଚିକିତ୍ସାଗତ କାରଣ ଦର୍ଶାଇ ଧନଖଡ଼ ଉପରାଷ୍ଟ୍ରପତି ପଦରୁ ଇସ୍ତଫା ଦେଇଥିଲେ। ସେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ନିକଟକୁ ତାଙ୍କର ଇସ୍ତଫାପତ୍ର ପଠାଇ କହିଥିଲେ ଯେ, ସ୍ବାସ୍ଥ୍ୟ ଉପରେ ଧ୍ୟାନ ଦେବା ପାଇଁ ସେ ନିଜ ପଦରୁ ଇସ୍ତଫା ଦେଉଛନ୍ତି। ଏହା ପରେ ମଙ୍ଗଳବାର ରାଷ୍ଟ୍ରପତି ତାଙ୍କ ଇସ୍ତଫାକୁ ଗ୍ରହଣ କରିଥିଲେ।
ସେପଟେ କିଏ ହେବେ ପରବର୍ତ୍ତୀ ଉପରାଷ୍ଟ୍ରପତି ସେନେଇ ଆରମ୍ଭ ହୋଇଛି କଳ୍ପନା ଜଳ୍ପନା । ବିଜେପିର ଆଭ୍ୟନ୍ତରୀଣ ରାଜନୀତିରେ, ଜେ.ପି. ନଡ୍ଡା, ନିର୍ମଳା ସୀତାରମଣ, ନୀତିନ ଗଡକରୀ, ମନୋଜ ସିହ୍ନା ଏବଂ ବସୁନ୍ଧରା ରାଜେ ଭଳି ନାମ ଆଲୋଚନା ହେଉଛି । କିନ୍ତୁ ଏହି ନାମଗୁଡ଼ିକ ମଧ୍ୟରୁ କୌଣସିଟି ସମସ୍ତ ରାଜନୈତିକ ସମୀକରଣକୁ ସନ୍ତୁଳିତ କରିପାରୁନଥିବା ପରି ମନେ ହେଉଛି। ଜେ.ପି. ନଡ୍ଡାଙ୍କ କାର୍ଯ୍ୟକାଳ ମାର୍ଚ୍ଚ ୨୦୨୫ରେ ଶେଷ ହେଉଛି । ତେବେ ଶାହ-ମୋଦିଙ୍କ ସହ ତାଙ୍କର ନିକଟତରଙ୍କୁ ଦୃଢ଼ ଦାବିଦାର ମନେହୁଏ । ମନୋଜ ସିହ୍ନାଙ୍କ ନାମ ମଧ୍ୟ ଦ୍ରୁତ ଗତିରେ ଉଭା ହୋଇଛି କିନ୍ତୁ ଜାତି ସମୀକରଣ ତାଙ୍କ ସପକ୍ଷରେ ଥିବା ପରି ମନେ ହେଉନାହିଁ।
ବିରୋଧୀ ମେଣ୍ଟ ପାଖରେ ମାତ୍ର ୧୫୦ ଭୋଟ ଅଛି, ଯାହା କାରଣରୁ ସେମାନଙ୍କର ଆଶା ବହୁତ କମ। ତଥାପି, କଂଗ୍ରେସ ପ୍ରତି ଅସନ୍ତୁଷ୍ଟ ବୋଲି ବିବେଚିତ ଶଶି ଥରୁରଙ୍କ ନାମ ମଧ୍ୟ 'ସାର୍ବଜନୀନ ପ୍ରାର୍ଥୀ' ଭାବରେ ଚର୍ଚ୍ଚାରେ ଅଛି। ଥରୁରଙ୍କ ପରି ଜଣେ ମୁହଁକୁ ଆଗକୁ ଆଣି ବିଜେପି କଂଗ୍ରେସକୁ ଭିତରୁ ଭାଙ୍ଗିବାକୁ ଚାହିଁପାରେ। କିନ୍ତୁ ରାଜନୈତିକ ବିଶ୍ୱସନୀୟତା ଏବଂ ଦଳୀୟ ନିୟନ୍ତ୍ରଣ ଦୃଷ୍ଟିରୁ, ଏହି ସମ୍ଭାବନା ମଧ୍ୟ ବହୁତ କମ୍ ମନେ ହେଉଛି।
ଲୋକସଭା ଏବଂ ରାଜ୍ୟସଭାର ମୋଟ ୭୮୨ ପ୍ରଭାବଶାଳୀ ସଦସ୍ୟଙ୍କ ମଧ୍ୟରୁ ବିଜୟ ପାଇଁ ୩୯୪ ଭୋଟ ଆବଶ୍ୟକ। ବିଜେପି ନେତୃତ୍ୱାଧୀନ ଏନଡିଏର ବର୍ତ୍ତମାନ ଲୋକସଭାରେ ୨୯୩ ସାଂସଦ ଏବଂ ରାଜ୍ୟସଭାରେ ୧୨୯ ସାଂସଦଙ୍କ ସମର୍ଥନ ରହିଛି। ଅର୍ଥାତ୍, ସଂଖ୍ୟା ଅନୁସାରେ, ଏନଡିଏର ସ୍ପଷ୍ଟ ବହୁମତ ଅଛି, କିନ୍ତୁ ଏଥିରେ ସହଯୋଗୀଙ୍କ ଭୂମିକା ନିର୍ଣ୍ଣାୟକ ହେବ। ଜେଡିୟୁ, ଟିଡିପି ଏବଂ ଶିବସେନା ଭଳି ଦଳଗୁଡ଼ିକର ସମର୍ଥନ ବଜାୟ ରଖିବା ଗୁରୁତ୍ୱପୂର୍ଣ୍ଣ।
ବିହାର ବିଧାନସଭା ନିର୍ବାଚନକୁ ଆଖି ଆଗରେ ରଖି, ହରିବଂଶ ନାରାୟଣ ସିଂହ ଉପରାଷ୍ଟ୍ରପତି ପଦ ପାଇଁ ଆଲୋଚନା ହେଉଥିବା ନାମଗୁଡ଼ିକର ଶୀର୍ଷରେ ଅଛନ୍ତି। ରାଜ୍ୟସଭାର ଉପାଧ୍ୟକ୍ଷ ହେବା ବ୍ୟତୀତ, ସେ ଜେଡିୟୁରୁ ଆସିଛନ୍ତି ଏବଂ ପ୍ରଧାନମନ୍ତ୍ରୀ ମୋଦିଙ୍କ ବିଶ୍ୱସ୍ତ ବୋଲି ବିବେଚନା କରାଯାଏ। ତାଙ୍କର ରାଜ୍ୟସଭା ପରିଚାଳନାର ଅଭିଜ୍ଞତା ମଧ୍ୟ ଅଛି। ସେହିଭଳି ନୀତିଶ କୁମାରଙ୍କ ନାମ ମଧ୍ୟ ଆଲୋଚନାରେ ଅଛି । କିନ୍ତୁ ତାଙ୍କ ସ୍ୱାସ୍ଥ୍ୟ ଅବସ୍ଥା ଏବଂ ସ୍ୱଭାବ ଉପରାଷ୍ଟ୍ରପତି ପଦର ଦାୟିତ୍ୱ ପାଇଁ ଉପଯୁକ୍ତ ବୋଲି ବିବେଚନା କରାଯାଉନାହିଁ।
