ନୂଆଦିଲ୍ଲୀ: ଆମେରିକାର ମିନେସୋଟା ରାଜ୍ୟର ଦୁଇ ଡେମୋକ୍ରାଟିକ ସାଂସଦଙ୍କୁ ଶନିବାର ସକାଳେ ଗୁଳି କରାଯାଇଛି । ଚାମ୍ପଲିନ ମେୟର ରୟାନ ସବାସ କହିଛନ୍ତି ଯେ ସିନେଟର ମେଲିସା ହର୍ଟମ୍ୟାନ୍ ଓ ତାଙ୍କ ସ୍ୱାମୀଙ୍କୁ ଗୁଳି କରାଯାଇଛି । ଏଥିରେ ଦୁହିଁଙ୍କ ମୃତ୍ୟୁ ହୋଇଛି । ଅନ୍ୟ ଘଟଣାରେ ସିନେଟର ଜନ୍ ହଫମ୍ୟାନ୍ ଓ ତାଙ୍କ ପତ୍ନୀ ୟେବେଟଙ୍କୁ ଗୁଳି କରାଯାଇଛି । ବର୍ତ୍ତମାନ ଦୁହିଁଙ୍କୁ ହାସ୍ପିଟାଲରେ ଭର୍ତ୍ତି କରାଯାଇଛି ଓ ସେମାନଙ୍କ ଅବସ୍ଥା ସ୍ଥିର ରହିଛି ।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ଏହି ଆକ୍ରମଣର ନିନ୍ଦା କରିଛନ୍ତି । ସେ କହିଛନ୍ତି ଯେ ମିନେସୋଟାରେ ଯାହା ହୋଇଛି, ତାହା ନିନ୍ଦନୀୟ । ସାଂସଦଙ୍କ ଉପରେ ଏଭଳି ଆକ୍ରମଣକୁ ଆମେରିକାରେ ଆଦୌ ବରଦାସ୍ତ କରାଯିବା ନାହିଁ । ସେପଟେ ଏହି ମାମଲାରେ ମିନେସୋଟା ଗଭର୍ଣ୍ଣର ଟିମ୍ ୱାଲ୍ଜ କହିଛନ୍ତି, ଏହି ଆକ୍ରମଣ ରାଜନୈତିକ କାରଣରୁ କରାଯାଇଥିବା ପରି ମନେ ହେଉଛି ।
ମେଲିସା ହର୍ଟମ୍ୟାନ୍ ମିନେସୋଟା ରାଜ୍ୟର ପୂର୍ବତନ ହାଉସ୍ ବାଚସ୍ପତି ଏବଂ ଡେମୋକ୍ରାଟିକ୍ ପାର୍ଟିର ଜଣେ ବରିଷ୍ଠ ନେତା ଥିଲେ । ୨୦୦୪ ମସିହାରେ ସେ ପ୍ରଥମେ ବିଧାନସଭା ସଦସ୍ୟ ଭାବରେ ନିର୍ବାଚିତ ହୋଇଥିଲେ । ସେ ମିନେସୋଟା ରାଜନୀତିରେ ଜଣେ ପ୍ରଭାବଶାଳୀ ଚେହେରା ଥିଲେ ଏବଂ ଉତ୍ତର ମିନିଆପୋଲିସ୍ ଅଞ୍ଚଳର ପ୍ରତିନିଧିତ୍ୱ କରୁଥିଲେ । ସେ ମିନେସୋଟା ଡେମୋକ୍ରାଟିକ୍-କୃଷକ-ଶ୍ରମିକ ଦଳର ସଦସ୍ୟ ମଧ୍ୟ ଥିଲେ।
ସେହିପରି ହଫମ୍ୟାନ୍ ୨୦୧୨ରୁ ସେନେଟରେ ଅଛନ୍ତି ଏବଂ ପୂର୍ବରୁ ମିନେସୋଟାର ସବୁଠାରୁ ବଡ଼ ସ୍କୁଲ ଡିସିଟ୍ରିକ୍ଟ ଆନୋକା-ହେନେପିନର ସ୍କୁଲ ବୋର୍ଡରେ କାର୍ଯ୍ୟ କରିଥିଲେ । ହଫମ୍ୟାନ୍ ଷ୍ଟ୍ରାଟେଜିକ୍ ଆଡଭାଇଜର୍ସ ନାମକ ଏକ ପରାମର୍ଶଦାତା କମ୍ପାନି ମଧ୍ୟ ଚଳାନ୍ତି ।
ମିନେସୋଟାର ବ୍ୟୁରୋ ଅଫ୍ କ୍ରିମିନାଲ୍ ଆପ୍ରେନସନ୍ (BCA)ର ମୁଖ୍ୟ ଡ୍ର୍ୟୁ ଇଭାନ୍ସ କହିଛନ୍ତି ଯେ ପୋଲିସ ପୋଷାକ ପିନ୍ଧିଥିବା ଜଣେ ସନ୍ଦିଗ୍ଧ ବ୍ୟକ୍ତିକୁ ପୋଲିସ ଖୋଜୁଛି । ପବ୍ଲିକ୍ ସେଫ୍ଟି କମିଶନର ବବ୍ ଜନସନ୍ କହିଛନ୍ତି, "ସନ୍ଦିଗ୍ଧ ବ୍ୟକ୍ତି ଆଇନ ବ୍ୟବସ୍ଥାର ନକଲି ଚେହେରା ହୋଇ ଲୋକଙ୍କ ବିଶ୍ୱାସ ଭାଙ୍ଗି ଯାଉଥିଲା । ଆମ ସୁରକ୍ଷାର ପ୍ରତୀକ ୟୁନିଫର୍ମର ଅପବ୍ୟବହାର ଅତ୍ୟନ୍ତ ଚିନ୍ତାଜନକ।"
