ମୁମ୍ବାଇ ୧୨।୪: ଗତ ସପ୍ତାହରେ ଆମେରିକା ଓ ଚୀନ୍ ମଧ୍ୟରେ ଟାରିଫ ୱାର ଭାରତୀୟ ବଜାରକୁ ହଲଚଲ କରିଥିଲା। ଏବେ ଆଗାମୀ ସପ୍ତାହରେ ବଜାରର ମିଜାଜ କିପରି ରହିବ ତାହା ଦେଖିବାର କଥା। ତେବେ ଆଗାମୀ ସପ୍ତାହରେ ସେୟାର ବଜାରରେ ଟ୍ରେଡିଂ ଡେ ସଂଖ୍ୟା କମ ରହିବ। ଏହି ସପ୍ତାହରେ ୨ ଦିନ ଛୁଟି ଯୋଗୁ ସେୟାର ବଜାର ବନ୍ଦ ରହିବ। ବିଏସଇ ଓ ଏନଏସଇ ୱେବସାଇଟ ରେ ସେୟାର ବଜାର ୨୦୨୫ ଛୁଟି ଅନୁସାରେ ସୋମବାର ଓ ଶୁକ୍ରବାର କାରବାର ବନ୍ଦ ରହିବ।
ସୋମବାର ଡ.ବାବାସାହେବ ଆମ୍ବେଦକର ଜୟନ୍ତୀ ଲାଗି ଛୁଟି ରହିବ। ସେହିପରି ଗୁଡ ଫ୍ରାଇଡେ ଲାଗି ଆଗାମୀ ଶୁକ୍ରବାର ସେୟାର ବଜାରରେ କାରବାର ହେବ ନାହିଁ। ଏନଏସଇ ଓ ବିଏସଇରେ ସୋମବାର ଓ ଶୁକ୍ରବାର ବ୍ୟାପାରିକ ଗତିବିଦ୍ଧି ନିଲମ୍ବିତ ରହିବ। ସେହିପରି ଇଲେକ୍ଟ୍ରୋନିକ ଗୋଲ୍ଡ ରିସିଟସ୍ (ଇଜିଆର) ସେଗମେଣ୍ଟରେ ମଧ୍ୟ ଟ୍ରେଡିଂ ବନ୍ଦ ରହିବ। ୨୦୨୫ ସେୟାର ବଜାର ଛୁଟି ଅନୁସାରେ ମୋଟ ୧୪ଟି ବ୍ୟବସାୟୀକ ଛୁଟି ରହିଛି।
ଏହି ୧୪ଟି ବ୍ୟବସାୟୀକ ଛୁଟି ମଧ୍ୟରୁ ଶେଷ ଛୁଟିଟି ୧୦ ଏପ୍ରିଲ ୨୦୨୫ରେ ମହାବୀର ଜୟନ୍ତୀରେ ପଡିଥିଲା। ୧୪ ଏପ୍ରିଲ ୨୦୨୫ ପରେ ଜାରି ବର୍ଷରେ ସେୟାର ବଜାରର ଆଉ ୯ଟି ଛୁଟି ରହିବ। ଗତ ଶୁକ୍ରବାର ବିଏସଇର ୩୦ ସେୟାରର ସୂଚକାଙ୍କ ସେନସେକ୍ସ ୧,୩୧୦.୧୧ ପଏଣ୍ଟ ଅର୍ଥାତ ୧.୭୭ ପ୍ରତିଶତ ବୃଦ୍ଧି ସହ ୭୫,୧୫୭.୨୬ରେ ବନ୍ଦ ହୋଇଥିଲା। ସେହିପରି ଏନଏସଇ ସୂଚକାଙ୍କ ୧.୯୨ ପ୍ରତିଶତ ବଢି ୨୨,୮୨୮.୫୫ରେ ପହଞ୍ଚିଥିଲା।
