ନୂଆଦିଲ୍ଲୀ: ଇରାନ ମାଟିରେ ତାଣ୍ଡବ ରଚିଥିଲେ ମହିଳା ପାଇଲଟ୍। ମୋସାଦ ଅପରେସନର ସିକ୍ରେଟକୁ ଖୋଲିଲା ତେହେରାନ। ଟେନସନରେ ଆମେରିକା। ବିପଦରେ ଇସ୍ରାଏଲର ସୁରକ୍ଷା ବ୍ୟବସ୍ଥା। ଇସ୍ରାଏଲର F-16 ପାଇଲଟଙ୍କ ଗୁପ୍ତ ସୂଚନା ପ୍ରକାଶ କରିଛି ଇରାନର ଗୁପ୍ତଚର ସଂସ୍ଥା। ଏହାସହ ଇସ୍ରାଏଲର କଡ଼ା ସୁରକ୍ଷା ବଳୟକୁ ଉନ୍ମୋଚନ କରିଛି। ରିପୋର୍ଟରେ ଦାବି କରାଯାଇଛି ଯେ ଇରାନୀ ଏଜେଣ୍ଟମାନେ ପାଇଲଟଙ୍କ ନାମ ଏବଂ ସାମରିକ ୟୁନିଟ୍ ବିବରଣୀ ହାସଲ କରିଛନ୍ତି। ଏହାସହ ସେମାନଙ୍କ ଘର ଠିକଣା, ସେମାନଙ୍କ ଘରର ସାଟେଲାଇଟ୍ ଚିତ୍ର, ସେମାନଙ୍କ ଉପକରଣ ବ୍ୟବହାରର ରେକର୍ଡ ମଧ୍ୟ ହାସଲ କରିଛନ୍ତି। ଇସ୍ରାଏଲର ସୁରକ୍ଷିତ ଡାଟାକୁ ଭେଦ କିପରି ହେଲା ସମ୍ଭବ।
ଇରାନୀ ଗଣମାଧ୍ୟମ ପାଇଲଟମାନଙ୍କୁ 'ମୃତ୍ୟୁ ଏବଂ ବିନାଶର ନାବିକ' ବୋଲି କହିଛି। କହିଛି ଯେ ସେମାନଙ୍କର ପରିଚୟ ଏବଂ କାର୍ଯ୍ୟକଳାପ ବର୍ତ୍ତମାନ ଇରାନର ଗୁପ୍ତଚର ନେଟୱର୍କକୁ ଜଣା। ଇସ୍ରାଏଲୀ ସାମରିକ ଅଧିକାରୀଙ୍କ ପାଇଁ ଏକ ସିଧାସଳଖ ଧମକ। ଯେଉଁମାନେ ଇରାନ ବିରୁଦ୍ଧରେ ଯୁଦ୍ଧରେ ସାମିଲ ଥିଲେ।
ଏହି ପାଇଲଟମାନଙ୍କ ମଧ୍ୟରୁ ଜଣେ ହେଉଛନ୍ତି ମେଜର ୟାଏଲ୍ ଆଶ୍। ଯିଏ ତାଙ୍କ ସ୍ୱାମୀ ବାର ପ୍ରିନ୍ସଙ୍କ ସହିତ 'ବ୍ୟାଟ୍ ସ୍କ୍ୱାଡ୍ରନ୍' (ସ୍କ୍ୱାଡ୍ରନ୍ 119)ର ଡେପୁଟି କମାଣ୍ଡର। ରିପୋର୍ଟରେ ଗୁରୁତ୍ୱ ଦିଆଯାଇଛି ଯେ ମେଜର ଆଶ୍ ୧୯୭୩ ୟୋମ୍ କିପ୍ପୁର ଯୁଦ୍ଧରେ ନିଖୋଜ ହୋଇଯାଇଥିବା ଇସ୍ରାଏଲୀ ପାଇଲଟଙ୍କ ନାତୁଣୀ। କିନ୍ତୁ ଏବେ ରିପୋର୍ଟରେ ଦାବି କରାଯାଇଛି ଯେ ସେ ନିଜେ ସୁରକ୍ଷିତ ନୁହଁନ୍ତି।
ଇରାନୀ ଗଣମାଧ୍ୟମ ଅନୁଯାୟୀ, ରିପୋର୍ଟ ଆସିବା ପରେ, ଇସ୍ରାଏଲୀ ସରକାର ତୁରନ୍ତ ପାଇଲଟମାନଙ୍କୁ ସୁରକ୍ଷା ପାଇଁ ସ୍କୁଲ ଏବଂ ବେସାମରିକ କୋଠାକୁ ସ୍ଥାନାନ୍ତରିତ କରିଥିଲେ। ବିଶେଷଜ୍ଞମାନେ କହିଛନ୍ତି ଯେ ଇରାନ ପାଇଲଟମାନଙ୍କର ସମ୍ପୂର୍ଣ୍ଣ ବିବରଣୀ ଜାଣିବା ଦ୍ୱାରା ଲାଭବାନ ହେବ। ନାମ, ଘାଟି, ପୂର୍ବ ମିଶନ ଏବଂ ସେମାନଙ୍କର କାର୍ଯ୍ୟକଳାପର ଶୈଳୀ ଜାଣିହେବ। ଯଦି ଇସ୍ରାଏଲ ପୁଣି ଆକ୍ରମଣ କରେ, ତେବେ ଏହି ସୂଚନା ତେହେରାନ ପାଇଁ ଲାଭବାନ ହେବ। ଇସ୍ରାଏଲ ଅପରେସନରେ ଥିବା ପାଇଲଟଙ୍କ ନାଁ ଜାଣିବା ପରେ ଚିନ୍ତା ପ୍ରକଟ କରିଛି ଆମେରିକାର ଗୁଇନ୍ଦା ସଂସ୍ଥା CIA।
ଜୁନ ୧୩ରେ ଇସ୍ରାଏଲ ଇରାନୀ ଘାଟି ଉପରେ ଆକ୍ରମଣ କରିଥିଲା। ଅନ୍ତର୍ଜାତୀୟ ଆଇନ ଉଲ୍ଲଂଘନ କରି ଇରାନର ଅନେକ ଉଚ୍ଚସ୍ତରୀୟ ସାମରିକ ଅଧିକାରୀଙ୍କୁ ହତ୍ୟା କରିଥିଲା IDF। ଏହାର ଜବାବରେ ଇରାନୀ ଇସ୍ରାଏଲୀ ସାମରିକ ଏବଂ ଶିଳ୍ପ ସ୍ଥାନଗୁଡ଼ିକୁ ଟାର୍ଗେଟ କରି ମିଶାଇଲ ଏବଂ ଡ୍ରୋନ ଆକ୍ରମଣ କରିଥିଲା। ଏହି ଆକ୍ରମଣ ମଧ୍ୟରୁ ଅନେକ ସାଧାରଣ ନାଗରିକ ଅଞ୍ଚଳକୁ ମଧ୍ୟ ପ୍ରଭାବିତ କରିଥିଲା।
ଆମେରିକାର ହସ୍ତକ୍ଷେପ ପରେ ଜୁନ ୨୪ରେ ଯୁଦ୍ଧ ବନ୍ଦ ହୋଇଗଲା ସତ କିନ୍ତୁ ଏବେ ଲାଗି ରହିଛି ଛକାପଞ୍ଝା। ରାଷ୍ଟ୍ରପତି ମାସୁଦ ପେଜେଶକିୟାନ ଏବଂ ସଶସ୍ତ୍ର ବାହିନୀ ମୁଖ୍ୟ ମେଜର ଜେନେରାଲ ଅବଦୋଲରାହିମ ମୁସାଭି ଦେଇଛନ୍ତି ଚେତାବନୀ। ସେମାନେ ଇସ୍ରାଏଲର ଅସ୍ତ୍ରବିରତି ପ୍ରତିଶ୍ରୁତି ଉପରେ ବିଶ୍ୱାସ କରନ୍ତି ନାହିଁ। ଯଦି ଇସ୍ରାଏଲ ପୁଣି ଆକ୍ରମଣ କରେ, ତେବେ ଇରାନ କଡ଼ା ପ୍ରତିଶୋଧ ନେବାକୁ ପ୍ରସ୍ତୁତ।
