ନୂଆଦିଲ୍ଲୀ: ରିଲାଏନ୍ସ ଜିଓର ଆଇପିଓକୁ ନେଇ ଜାରି କଳ୍ପନାଜଳ୍ପନା ଭିତରେ ରିଲାଏନ୍ସ ଅଧ୍ୟକ୍ଷ ମୁକେଶ ଅମ୍ୱାନୀ ଏକ ବଡ଼ ସୂଚନା ଦେଇଛନ୍ତି । ମୁକେଶ ଅମ୍ୱାନୀ ରିଲାଏନ୍ସ ଏଜିଏମରେ ବଡ଼ ଘୋଷଣା କରି କହିଛନ୍ତି, ଆଇପିଓ ପାଇଁ ଡ୍ରାଫ୍ଟ ପେପର ଖୁବଶୀଘ୍ର ଫାଇଲ୍ କରାଯିବ ଓ ୨୦୨୬ ପ୍ରଥମ ଛଅ ମାସରେ ରିଲାଏନ୍ସ ଜିଓର ଆଇପିଓ ଲଞ୍ଚ୍ କରାଯିବ ।
ଜିଓ ପାଖରେ ୫୦ କୋଟିରୁ ଅଧିକ ଗ୍ରାହକ ଅଛନ୍ତି । କମ୍ପାନି 5ଜି, ଫିକ୍ସଡ୍ ବ୍ରଡ୍ବ୍ୟାଙ୍କ ଓ ଏଆଇ ଟେକ୍ନୋଲଜିରେ ବଡ଼ ନିବେଶ କରିଛି । ଜିଓ ସେୟାର ବଜାରରେ ସୂଚୀବଦ୍ଧ ହେବା ଦ୍ୱାରା ନିବେଶକଙ୍କୁ ଏକ ବଡ଼ ସୁଯୋଗ ମିଳିପାରେ । ଏକ ଅନୁମାନ ଅନୁସାରେ, ଜିଓ କମ୍ପାନି ଆଇପିଓ ଜରିଆରେ ୧୨ରୁ ୧୩ ଲକ୍ଷ ଟଙ୍କା ଏକାଠି କରିପାରେ । ଏହି ଟଙ୍କାକୁ ନିଜ କାରବାରକୁ ବଢାଇବାରେ କମ୍ପାନି ବିନିଯୋଗ କରିପାରେ । ମୁକେଶ ଅମ୍ୱାନୀ ଆଇପିଓ ବାବଦରେ ସୂଚନା ଦେଇ କହିଛନ୍ତି, ବୈଶ୍ୱିକ ସ୍ତରରେ ଏହା ସେୟାର ହୋଲ୍ଡର୍ସଙ୍କ ପାଇଁ ଭେଲ୍ୟୁ ଅନଲକ୍ କରିବ । ଜିଓ ଗତ କିଛି ମାସ ତଳେ ୫୦୦ ମିଲିୟନ ଗ୍ରାହକ ସଂଖ୍ୟା ଟପିଥିଲା । ଆର୍ଥିକ ବର୍ଷ ୨୦୨୫ରେ ଜିଓର ରେଭେନ୍ୟୁ ୧.୨୮ ଲକ୍ଷ କୋଟି ଥିଲା ।
ରିଲାଏନ୍ସ ଇଣ୍ଡଷ୍ଟ୍ରିଜର ୪୮ତମ ବାର୍ଷିକ ସାଧାରଣ ବୈଠକରେ ଅଧ୍ୟକ୍ଷ ମୁକେଶ ଅମ୍ବାନୀ କହିଛନ୍ତି ଯେ କମ୍ପାନୀ ୨୦୨୫ରେ ଚମତ୍କାର ପ୍ରଦର୍ଶନ କରିଛି । ୧୨୫ ବିଲିୟନ ଡଲାର ବାର୍ଷିକ ଆୟ ଅତିକ୍ରମ କରିଥିବା ପ୍ରଥମ ଭାରତୀୟ କମ୍ପାନୀ ହୋଇଛି । ରିଲାଏନ୍ସର EBITDA ୧,୮୩,୪୨୨ କୋଟି ଏବଂ ଶୁଦ୍ଧ ଲାଭ ୮୧,୩୦୯ କୋଟି ଥିଲା । ରିଲାଏନ୍ସର ରପ୍ତାନୀ ୨,୮୩,୭୧୯ କୋଟି ଥିଲା, ଯାହା ଭାରତର ମୋଟ ପଣ୍ୟଦ୍ରବ୍ୟ ରପ୍ତାନୀର ୭.୬% । ଏହା ପରିସଂଖ୍ୟାନ ସହ ରିଲାଏନ୍ସ ଭାରତର ସର୍ବବୃହତ ରପ୍ତାନିକାରୀ କମ୍ପାନି ମଧ୍ୟରୁ ଗୋଟିଏ ହୋଇଛି ।
ରିଲାଏନ୍ସ ଆର୍ଥିକ ବର୍ଷ ୨୦୨୫ରେ ୨,୧୦,୨୬୯ କୋଟି ଟଙ୍କା ଟ୍ୟାକ୍ସ ଦେଇଛି । ଗତ ୬ ବର୍ଷ ମଧ୍ୟରେ ଦେଶର ରାଜକୋଷରେ କମ୍ପାନି ୧୦ ଲକ୍ଷ କୋଟିରୁ ଅଧିକ ଅବଦାନ ଦେଇଛି । ମୁକେଶ ଅମ୍ବାନୀ ଆଉ ଏକ ବଡ଼ ଘୋଷଣା କରିଛନ୍ତି । ରିଲାଏନ୍ସ ଇଣ୍ଡଷ୍ଟ୍ରିଜର ଏକ ନୂତନ କମ୍ପାନି ରିଲାଏନ୍ସ ଇଣ୍ଟେଲିଜେନ୍ସ ଅନ୍ ଏଆଇ ତିଆରି କରିବ । ଏହି କମ୍ପାନି ଗୁଗଲ୍ ଏବଂ ମେଟା ସହିତ ସହଭାଗିତାରେ କାମ କରିବ ।
ରିଲାଏନ୍ସ ଜିଓର ଅଧ୍ୟକ୍ଷ ଆକାଶ ଅମ୍ବାନୀ କହିଛନ୍ତି, ଦେଶରେ 5ଜିର ସବୁଠାରୁ ଦ୍ରୁତତମ ସ୍ଥାପନା ପରେ, ଜିଓର 5ଜି ଗ୍ରାହକଙ୍କ ସଂଖ୍ୟା ମଧ୍ୟ ଦ୍ରୁତ ଗତିରେ ବୃଦ୍ଧି ପାଇଛି । ୨୨ କୋଟିରୁ ଅଧିକ ଉପଭୋକ୍ତା ଜିଓ ଟ୍ରୁ 5ଜି ନେଟୱାର୍କ ସହିତ ଯୋଡି ହୋଇଛନ୍ତି । ସେ କହିଛନ୍ତି ଯେ ଜିଓ ଖୁବଶୀଘ୍ର ଅନ୍ତର୍ଜାତୀୟ ସ୍ତରରେ ଅପରେସନ ଆରମ୍ଭ କରିବ ।
