ନୂଆଦିଲ୍ଲୀ ୧୫।୦୮: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ସ୍ବାଧୀନତା ଦିବସରେ ତାଙ୍କ ପୋଷାକ ପାଇଁ ସବୁବେଳେ ରହିଥାନ୍ତି ଚର୍ଚ୍ଚାରେ । ପ୍ରତ୍ୟେକଥର ପ୍ରଧାନମନ୍ତ୍ରୀ ମୋଦିଙ୍କ ପଗଡ଼ି ବାନ୍ଧିବାର ଶୈଳୀ ହୋଇଥାଏ ସବୁଠାରୁ ଆକର୍ଷଣୀୟ । ୨୦୧୪-୨୦୨୫ ଦୀର୍ଘ ୧୧ ବର୍ଷ ପର୍ଯ୍ୟନ୍ତ ପ୍ରଧାନମନ୍ତ୍ରୀ ମୋଦିଙ୍କୁ ଏକ ଭିନ୍ନ ଶୈଳୀରେ ଦେଖିବାକୁ ମିଳିଥାଏ ।
୭୯ତମ ସ୍ବାଧୀନତା ଦିବସରେ ମଧ୍ୟ ପ୍ରଧାନମନ୍ତ୍ରୀ ଏକ ସ୍ବତନ୍ତ୍ର ପୋଷାକରେ ନଜର ଆସିଛନ୍ତି । ଏଥର ମୋଦି ଧଳା କୁର୍ତ୍ତା ସହିତ କମଳା ରଙ୍ଗର ନେହେରୁ ଜ୍ୟାକେଟ ପିନ୍ଧିଛନ୍ତି । ଏହାସହିତ ଗେରୁଆ ରଙ୍ଗର ପଗଡ଼ି ଏବଂ ଏକ ଗାମୁଛା ମଧ୍ୟ ପକାଇଛନ୍ତି । ସବୁବେଳେ ପରି ଏଥର ମଧ୍ୟ ପ୍ରଧାନମନ୍ତ୍ରୀ ମୋଦି ତାଙ୍କର ସ୍ବତନ୍ତ୍ର ଶୈଳୀରେ ରାଜଘାଟରେ ପହଞ୍ଚିଥିଲେ ।
ପ୍ରଧାନମନ୍ତ୍ରୀ ମୋଦି ପ୍ରତ୍ୟେକ କାର୍ଯ୍ୟକ୍ରମରେ ତାଙ୍କ ଲୁକ ପାଇଁ ଚର୍ଚ୍ଚାରେ ରହିଥାନ୍ତି। ବିଶେଷକରି ତାଙ୍କ ପଗଡ଼ିର ଲୁକ ସବୁବେଳେ ଖବରରେ ରହିଥାଏ । ୨୦୨୪ ମସିହାରେ ସ୍ବାଧୀନତାର ୭୮ତମ ସ୍ବାଧୀନତା ଦିବସରେ ପ୍ରଧାନମନ୍ତ୍ରୀ ମୋଦିଙ୍କୁ ଏକ କେସରିଆ, ସବୁଜ ଏବଂ ହଳଦିଆ ପଗଡ଼ିରେ ଦେଖିବାକୁ ମିଳିଥିଲା। ଏହି ପଗଡ଼ି ସହିତ, ସେ ଏକ ଧଳା କୁର୍ତ୍ତା-ପାଇଜାମା ଏବଂ ଏକ ନୀଳ ସାଦ୍ରି ପିନ୍ଧିଥିଲେ।
ଏହାବ୍ୟତୀତ ୨୦୨୩ରେ ସ୍ବାଧୀନତାର ୭୭ତମ ବାର୍ଷିକୀରେ ପ୍ରଧାନମନ୍ତ୍ରୀ ମୋଦି ଏକ ହଳଦିଆ ଏବଂ ଲାଲ ପଗଡ଼ି ପିନ୍ଧିଥିଲେ, ଯେଉଁଥିରେ ଅନେକ ରଙ୍ଗର ରେଖା ଥିଲା। ସେ ଏକ ଧଳା କୁର୍ତ୍ତା ଏବଂ କଳା ଜ୍ୟାକେଟ ପିନ୍ଧିଥିଲେ। ରାଜସ୍ଥାନରେ ଲୋକମାନେ ବିଭିନ୍ନ ରଙ୍ଗର ପଗଡ଼ି ବ୍ୟବହାର କରନ୍ତି ।
