ନୂଆଦିଲ୍ଲୀ: ମଲାୱି ଉପରାଷ୍ଟ୍ରପତି ସୌଲୋସ କ୍ଲାସ ଚିଲିମାଙ୍କ ଏକ ବିମାନ ଦୁର୍ଘଟଣାରେ ନିଧନ ହୋଇଛି । ମଲାୱି ରାଷ୍ଟ୍ରପତି ଲାଜର ଚକୱେରା ମଙ୍ଗଳବାର ଏହି ସୂଚନା ଦେଇଛନ୍ତି । ରାଷ୍ଟ୍ର ଉଦ୍ଦେଶ୍ୟରେ ସମ୍ୱୋଧନ କରି ସେ ଏହି ଦୁଃଖଦ ଖବର ଦେଇଛନ୍ତି । ସେ କହିଛନ୍ତି ଯେ ମଲାୱିର ଉପରାଷ୍ଟ୍ରପତି ସୌଲୋସ କ୍ଲାସ ଚିଲିମାଙ୍କୁ ନେଇ ଯାଉଥିବା ବିମାନରେ ଥିବା ସମସ୍ତ ଯାତ୍ରୀଙ୍କ ମୃତ୍ୟୁ ହୋଇଛି । ଉଲ୍ଲେଖଯୋଗ୍ୟ ଯେ ସୋମବାର ସଂଧ୍ୟାରୁ ଉପରାଷ୍ଟ୍ରପତିଙ୍କୁ ନେଇ ଯାଉଥିବା ବିମାନ ନିଖୋଜ ଥିଲା ।
ନ୍ୟୁଜ୍ ଏଜେନ୍ସି ରାୟଟର୍ସ ଅନୁଯାୟୀ, ସୋମବାର ଉପରାଷ୍ଟ୍ରପତିଙ୍କ ସହିତ ମାଲଓ୍ୱି ଡିଫେନ୍ସ ଫୋର୍ସର ୯ ଜଣ ସଦସ୍ୟ ବିମାନରେ ଯାତ୍ରା କରୁଥିଲେ । ଉପରାଷ୍ଟ୍ରପତି ସୌଲୋସ କ୍ଲାସ୍ ଚିଲିମାଙ୍କ ସହିତ ପ୍ରତିନିଧି ମଣ୍ଡଳୀ ରାଜଧାନୀ ଲିଲଙ୍ଗୱେରୁ ୩୪୦ କିଲୋମିଟର ଦୂର ମଜୁଜୁକୁ ଯାତ୍ରା ଆରମ୍ଭ କରିଥିଲେ । ରାଜଧାନୀରୁ ଉଡାଣ ଭରିବାର କିଛି ସମୟ ପରେ ବିମାନଟି ରାଡାର ବାହାରକୁ ଚାଲିଯାଇଥିଲା ଏବଂ ଏଟିସି ସହ ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା । ଏହା ପରେ ପ୍ରଶାସନ ପକ୍ଷରୁ ତୁରନ୍ତ ଖୋଜାଖୋଜି ଆରମ୍ଭ ହୋଇଥିଲା । ଦକ୍ଷିଣ-ପୂର୍ବ ଆଫ୍ରିକା ସେନାର ଯବାନ ମାନେ ରେସ୍କ୍ୟୁ ମିଶନରେ ସାମିଲ୍ ହୋଇଛନ୍ତି । ଉପରାଷ୍ଟ୍ରପତିଙ୍କ ବିମାନକୁ ଠାବ ନହେବା ଯାଏଁ ଅପରେସନ ଜାରି ରହିବ ବୋଲି ପ୍ରଶାସନ ପକ୍ଷରୁ କୁହାଯାଇଥିଲା । ଏବେ ତାଙ୍କ ମୃତ୍ୟୁ ହୋଇଥିବା ରାଷ୍ଟ୍ରପତି ସ୍ପଷ୍ଟ କରିଛନ୍ତି ।