ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଫେକ୍ଟ ଚେକ୍ କରିବା ପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣି ଥରେ ଭାରତ ଏବଂ ପାକିସ୍ତାନ ଯୁଦ୍ଧକୁ ସେ ବନ୍ଦ କରାଇଥିବା କହିଛନ୍ତି। ଗଣମାଧ୍ୟମକୁ ପ୍ରତିକ୍ରିୟା ଦେଇ ସେ କହିଛନ୍ତି “ମୁଁ ପାକିସ୍ତାନ ଏବଂ ଭାରତ ମଧ୍ୟରେ ଯୁଦ୍ଧ ବନ୍ଦ କରିଦେଇଛି। ମୁଁ ପାକିସ୍ତାନକୁ ଭଲ ପାଏ" ମୋଦି ଜଣେ ଚମତ୍କାର ବ୍ୟକ୍ତି। ଗତକାଲି ରାତିରେ ମୁଁ ତାଙ୍କ ସହ କଥା ହୋଇଥିଲି।”
ଏହା ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆମେରିକା ରାଷ୍ଟ୍ରପତିଙ୍କ ସହ ଫୋନ ଯୋଗେ କଥା ହୋଇଥିଲେ। ଏବଂ ଭାରତ କେବେ ମଧ୍ୟସ୍ଥତା ଗ୍ରହଣ କରିନାହିଁ, ଗ୍ରହଣ କରେ ନାହିଁ ଏବଂ ଭବିଷ୍ୟତରେ ମଧ୍ୟ କରିବ ନାହିଁ ବୋଲି କହିଥିଲେ।
ହେଲେ ଟ୍ରମ୍ପ ତାଙ୍କ କଥା ପୁଣିଥରେ ଦୋହରାଇ କହିଛନ୍ତି “ଆମେ ଭାରତର ମୋଦିଙ୍କ ସହିତ ଏକ ବାଣିଜ୍ୟ ଚୁକ୍ତି କରିବାକୁ ଯାଉଛୁ। କିନ୍ତୁ ମୁଁ ପାକିସ୍ତାନ ଏବଂ ଭାରତ ମଧ୍ୟରେ ଯୁଦ୍ଧ ବନ୍ଦ କରିଦେଇଛି।” ମିଡିଆରେ ପ୍ରତିକ୍ରିୟା ଦେଇ ଟ୍ରମ୍ପ ପାକିସ୍ତାନର ସେନା ମୁଖ୍ୟ ଆସିଫ୍ ମୁନିର ଏବଂ ପ୍ରଧାନମନ୍ତ୍ରୀ ମୋଦୀଙ୍କ ପ୍ରଶଂସା କରିଥିଲେ। କହିଥିଲେ ଯେ ସେମାନେ ଦୁଇଜଣ ଅତ୍ୟନ୍ତ ପ୍ରଭାବଶାଳୀ ବ୍ୟକ୍ତି।
ଟ୍ରମ୍ପ କହିଥିଲେ “ଏହି ବ୍ୟକ୍ତି (ମୁନିର) ପାକିସ୍ତାନ ପକ୍ଷରୁ ଯୁଦ୍ଧ ବନ୍ଦ କରିବାରେ ଅତ୍ୟନ୍ତ ପ୍ରଭାବଶାଳୀ ଥିଲେ, ଅନ୍ୟ ପାର୍ଶ୍ୱରୁ ମୋଦୀ। ସେମାନେ ଏହା କରିଥିଲେ। ସେମାନେ ଉଭୟ ପରମାଣୁ ରାଷ୍ଟ୍ର। ମୁଁ ଦୁଇଟି ପ୍ରମୁଖ ପରମାଣୁ ରାଷ୍ଟ୍ର ମଧ୍ୟରେ ଯୁଦ୍ଧ ବନ୍ଦ କରିଦେଇଥିଲି। କିନ୍ତୁ ମୁଁ ଭାବୁନାହିଁ ଯେ ଏହା ବିଷୟରେ ମୋର କୌଣସି କାହାଣୀ ଲେଖାଯାଇଛି। ”
ଭାରତ ଏବଂ ପାକିସ୍ତାନ ମଧ୍ୟରେ ଆମେରିକାର ଯୁଦ୍ଧବିରତି ପାଇଁ ମଧ୍ୟସ୍ଥତା କରିଥିବା କହି ପ୍ରାୟ ୧୪ ଥର ଦାବି କରିବା ପରେ ବି ଭାରତ ଏହାକୁ ଗ୍ରହଣ କରି ନାହିଁ। ପ୍ରଧାନମନ୍ତ୍ରୀ ମୋଦୀ ଡୋନାଲ୍ଡ ଟ୍ରମ୍ପଙ୍କୁ ଜବାବ ଦେଇସାରିଛନ୍ତି। ଆମେରିକାର ଯୁଦ୍ଧବିରତି ମଧ୍ୟସ୍ଥତା କାହାଣୀକୁ ସେ ବିରୋଧ କରିଛନ୍ତି।
ବୁଧବାର ଟ୍ରମ୍ପଙ୍କ ସହ ୩୫ ମିନିଟ୍ ଧରି ଫୋନରେ ଆଲୋଚନା କରି ମୋଦି ସ୍ପଷ୍ଟ କରିଛନ୍ତି ଯେ ଭାରତ ଏବଂ ପାକିସ୍ତାନ ମଧ୍ୟରେ ଯୁଦ୍ଧବିରତି ପାଇଁ ମଧ୍ୟସ୍ଥତା କରିବାରେ ଆମେରିକାର କୌଣସି ଭୂମିକା ନାହିଁ। ସେ ଏହା ମଧ୍ୟ କହିଛନ୍ତି ଯେ ଶତ୍ରୁତା ସମୟରେ ଆମେରିକା-ଭାରତ ବାଣିଜ୍ୟ ଚୁକ୍ତି ଉପରେ କୌଣସି ଆଲୋଚନା ହୋଇନାହିଁ।
