ନୂଆଦିଲ୍ଲୀ: କାର ଦୁର୍ଘଟଣାରେ ଲିଭରପୁଲ ଫରୱାର୍ଡ ଡିଓଗୋ ଜୋଟାଙ୍କ ମୃତ୍ୟୁ ହୋଇଛି। ମୃତ୍ୟୁ ବେଳକୁ ତାଙ୍କୁ ୨୮ ବର୍ଷ ବୟସ ହୋଇଥିଲା। ଏହି ଦୁର୍ଘଟଣାରେ ତାଙ୍କ ଭାଇ ଆନ୍ଦ୍ରେ ସିଲଭାଙ୍କ ମଧ୍ୟ ମୃତ୍ୟୁ ହୋଇଛି। ଡିଓଗୋଙ୍କ ବିବାହ ୧୦ ଦିନ ପୂର୍ବେ ହୋଇଥିଲା। ଦିନକ ପୂର୍ବରୁ ସେ ଫଟୋ ଏବଂ ଭିଡିଓ ସେୟାର କରିଥିଲେ।

ବିବିସି ସ୍ପୋର୍ଟ ଅନୁସାରେ ଜୋଟା ଏବଂ ତାଙ୍କ ଭାଇଙ୍କ ମୃତ୍ୟୁ ଗୁରୁବାର ବିଳମ୍ବିତ ରାତିରେ ହୋଇଥିଲା। ଯେ ତାଙ୍କ ଲାମ୍ବୋରଗିନି କାର ଅନ୍ୟ ଏକ ଗାଡ଼ିକୁ ଓଭରଟେକ୍ କରିବା ସମୟରେ ଟାୟାର ଫାଟିଯିବାରୁ ରାସ୍ତାରୁ ଖସି ଯାଇଥିଲା। ଯାହା ଫଳରେ କାରରେ ନିଆଁ ଲାଗିଯାଇଥିଲା। ନିଆଁ ଏତେ ଭୟଙ୍କର ଥିଲା ଯେ ପାଖରେ ଥିବା ଗଛ ଇତ୍ୟାଦି ମଧ୍ୟ ପୋଡ଼ି ପାଉଁଶ ହୋଇଯାଇଥିଲା।

ଜୋଟା ଗତ ୨୨ ଜୁନରେ ରୁଟ୍ କାରଡୋସୋଙ୍କୁ ବିବାହ କରିଥିଲେ। ତାଙ୍କର ତିନୋଟି ସନ୍ତାନ ଅଛନ୍ତି। ସେ ନିକଟରେ ସୋସିଆଲ ମିଡିଆରେ ତାଙ୍କ ବିବାହ ଉତ୍ସବର ଫଟୋ ମଧ୍ୟ ସେୟାର କରିଛନ୍ତି। ଡିଏଗୋ ଜୋଟା ଗତ ସିଜନରେ ଲିଭରପୁଲକୁ ପ୍ରିମିୟର ଲିଗ୍ ଟାଇଟଲ୍ ଜିତିବାରେ ପ୍ରମୁଖ ଭୂମିକା ନେଇଥିଲେ।  ଜୁନରେ ନେସନ୍ସ ଲିଗ୍ ଫାଇନାଲରେ ପର୍ତ୍ତୁଗାଲର ସ୍ପେନ ବିପକ୍ଷରେ ବିଜୟରେ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ।

ପର୍ତ୍ତୁଗୀଜ୍ ଫୁଟବଲ୍ ଫେଡେରେସନ୍ (FPT) ମୁଖ୍ୟ ପେଡ୍ରୋ ପ୍ରୋଏଙ୍କା ଗଭୀର ଦୁଃଖ ପ୍ରକାଶ କରିଛନ୍ତି। ସେ କହିଛନ୍ତି - ପର୍ତ୍ତୁଗୀଜ୍ ଫୁଟବଲ୍ ଫେଡେରେସନ୍ ଏବଂ ସମଗ୍ର ପର୍ତ୍ତୁଗୀଜ୍ ଫୁଟବଲ୍ ସମ୍ପୂର୍ଣ୍ଣ ଭାବରେ ଭାଙ୍ଗି ପଡ଼ିଛି। ପ୍ରାୟ ୫୦ଟି ଅନ୍ତର୍ଜାତୀୟ ମ୍ୟାଚ୍ ଖେଳିଥିବା ଜଣେ ଚମତ୍କାର ଖେଳାଳି, ଡିଏଗୋ ଜୋଟା ଜଣେ ଅସାଧାରଣ ବ୍ୟକ୍ତି ଥିଲେ।