ନୂଆଦିଲ୍ଲୀ ୨୩/୦୭ : ପୂର୍ବତନ ଉପରାଷ୍ଟ୍ରପତି ଜଗଦୀପ ଧନଖଡ ଇସ୍ତଫାକୁ ନେଇ ହଇଚଇ । ତେବେ ଇସ୍ତଫା ପୂର୍ବରୁ ପହଞ୍ଚିଥିଲେ ହଠାତ୍ ରାଷ୍ଟ୍ରପତି ଭବନରେ । ତେବେ ଏ ବିଷୟରେ ସେ ପୂର୍ବରୁ କାହାକୁ ଜଣାଇ ନଥିଲେ । ଧନଖଡ ହଠାତ୍ ରାଷ୍ଟ୍ରପତି ଭବନରେ ପହଞ୍ଚିବା ପରେ ହଇଚଇ ସୃଷ୍ଟି ହୋଇଥିଲା ।
ସଂସଦର ମୌସୁମୀ ଅଧିବେଶନ ଆରମ୍ଭରେ ସେ ଇସ୍ତଫା ଘୋଷଣା କରିଥିଲେ । ଧନଖଡ ସୋମବାର (ଜୁଲାଇ ୨୧) ଇସ୍ତଫା ଦେଇଥିଲେ । ତାଙ୍କ ଇସ୍ତଫାକୁ ନେଇ ରାଜନୈତିକ ମହଲରେ ଅନେକ ଆଲୋଚନା ହେଉଛି। କଂଗ୍ରେସ ନେତା ପି. ଚିଦାମ୍ବରମ କହିଛନ୍ତି ଯେ ଧନଖଡ ଓ ସରକାରଙ୍କ ମଧ୍ୟରେ ସମ୍ପର୍କ ଖରାପ ହୋଇଯାଇଛି ।
ପ୍ରକୃତରେ କହିବାକୁ ଗଲେ, ରାଷ୍ଟ୍ରପତିଙ୍କୁ ଭେଟିବା ପୂର୍ବରୁ ଆପଏଣ୍ଟମେଣ୍ଟ ନେବାକୁ ପଡିଥାଏ । ବୈଠକ ପୂର୍ବରୁ ସରକାରୀ ସୂଚନା ଦେବାକୁ ପଡିବ । କିନ୍ତୁ ଧନଖଡଙ୍କ କ୍ଷେତ୍ରରେ ସେପରି ଘଟନିଥିଲା । ରାତି ପ୍ରାୟ ୯ ଟାରେ ସେ ରାଷ୍ଟ୍ରପତି ଭବନରେ ପହଞ୍ଚିଲେ । ଧନଖଡଙ୍କୁ ଦେଖି ରାଷ୍ଟ୍ରପତି ଭବନର କର୍ମଚାରୀମାନେ ମଧ୍ୟ ଆଶ୍ଚର୍ଯ୍ୟ ହୋଇଗଲେ । ସେମାନେ ଆଶ୍ଚର୍ଯ୍ୟ ହେଲେ ଯେ ସେ ହଠାତ୍ ସୂଚନା ବିନା କାହିଁକି ଆସିଲେ। ସାଧାରଣତଃ ରାଷ୍ଟ୍ରପତି ଏବଂ ଉପରାଷ୍ଟ୍ରପତିଙ୍କ ମଧ୍ୟରେ ସାକ୍ଷାତର ସମୟ ପୂର୍ବରୁ ସ୍ଥିର ହୋଇଯାଇଥାଏ । କର୍ମଚାରୀମାନେ ମଧ୍ୟ ଏହା ବିଷୟରେ ଅବଗତ ଥାଆନ୍ତି।
ପ୍ରୋଟକଲ୍ ଭାଙ୍ଗି ରାଷ୍ଟ୍ରପତିଙ୍କୁ ଭେଟିବାକୁ ପହଞ୍ଚିଥିଲେ:
ଧନଖଡ ହଠାତ୍ ପ୍ରୋଟକଲ୍ ଭାଙ୍ଗି ରାଷ୍ଟ୍ରପତି ଭବନରେ ପହଞ୍ଚିଥିଲେ। ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ସହ ସାକ୍ଷାତ ସମୟରେ ସେ ସମ୍ବିଧାନ ଅନୁଯାୟୀ ଇସ୍ତଫାପତ୍ର ଦାଖଲ କରିଥିଲେ। ଏହା ପରେ, ରାତି ପ୍ରାୟ ୯.୨୫ ସମୟରେ, ଜନସାଧାରଣଙ୍କୁ କୁହାଗଲା ଯେ ଉପରାଷ୍ଟ୍ରପତି ଇସ୍ତଫା ଦେଇଛନ୍ତି।
ଧନଖଡଙ୍କ ବିଷୟରେ ଚିଦମ୍ବରମଙ୍କ ବଡ଼ ଦାବି:
କଂଗ୍ରେସ ନେତା ପି. ଚିଦମ୍ବରମ ଧନଖଡଙ୍କ ବିଷୟରେ ବଡ଼ ଦାବି କରିଥିଲେ । ରିପୋର୍ଟ ଅନୁଯାୟୀ, ସେ କହିଛନ୍ତି ଯେ ଧନଖଡ ତାଙ୍କର ସୀମା ଅତିକ୍ରମ କରିଛନ୍ତି । ସରକାର ତାଙ୍କ ଉପରେ ବିଶ୍ୱାସ ହରାଇଛନ୍ତି। ଚିଦାମ୍ବରମ କହିଛନ୍ତି ଯେ ଏହି କାରଣରୁ ଧନଖଡ ଇସ୍ତଫା ଦେଇଛନ୍ତି ।
ଧନଖଡ ଉପରାଷ୍ଟ୍ରପତିଙ୍କ ଏନକ୍ଲେଭ ଛାଡିବେ:
ଧନଖଡ ଗତ ବର୍ଷ ଏପ୍ରିଲରେ ସଂସଦ ଭବନ ପରିସର ନିକଟ ଚର୍ଚ୍ଚ ରୋଡରେ ଥିବା ଉପରାଷ୍ଟ୍ରପତିଙ୍କ ଏନକ୍ଲେଭକୁ ସ୍ଥାନାନ୍ତରିତ ହୋଇଥିଲେ । ଉପରାଷ୍ଟ୍ରପତିଙ୍କ ବାସଭବନ ଏବଂ କାର୍ଯ୍ୟାଳୟ ଥିବା ଏନକ୍ଲେଭ ସେଣ୍ଟ୍ରାଲ୍ ଭିଷ୍ଟା ପୁନଃବିକାଶ ଯୋଜନା ଅଧୀନରେ ନିର୍ମିତ ହୋଇଥିଲା। ପ୍ରାୟ ୧୫ ମାସ ସେଠାରେ ରହିବା ପରେ ଧନଖଡଙ୍କୁ ଉପରାଷ୍ଟ୍ରପତିଙ୍କ ଏନକ୍ଲେଭ ଛାଡିବାକୁ ପଡିବ।
