ନୂଆଦିଲ୍ଲୀ: ଆସନ୍ତା ବର୍ଷ ଭାରତ ଏବଂ ଶ୍ରୀଲଙ୍କାରେ ଅନୁଷ୍ଠିତ ହେବାକୁ ଥିବା ପୁରୁଷ ଟି-୨୦ ବିଶ୍ୱକପ୍ ପାଇଁ ଇଟାଲୀ ଯୋଗ୍ୟତା ଅର୍ଜନ କରିଛି । ପ୍ରଥମ ଥର ପାଇଁ ଇଟାଲୀ କ୍ରିକେଟ ଦଳ ବିଶ୍ୱକପ୍ରେ ଅଂଶଗ୍ରହଣ କରିବ । ନେଦରଲ୍ୟାଣ୍ଡସ୍ ମଧ୍ୟ ଏହି ଟୁର୍ଣ୍ଣାମେଣ୍ଟ୍ ପାଇଁ ଯୋଗ୍ୟତା ଅର୍ଜନ କରିଛି । ୟୁରୋପୀୟ କ୍ୱାଲିଫାୟରରେ ଶୀର୍ଷ-୨ ସ୍ଥାନ ହାସଲ କରି ଉଭୟ ଦଳ ଏହି ସଫଳତା ହାସଲ କରିଛନ୍ତି । ଗତ ୪ଟି ଟି-୨୦ ବିଶ୍ୱକପ୍ରେ ଖେଳିଥିବା ସ୍କଟଲ୍ୟାଣ୍ଡ ଜର୍ସି ବିପକ୍ଷରେ ଶେଷ ବଲ୍ରେ ପରାସ୍ତ ହେବାରୁ ନିରାଶ ହେବାକୁ ପଡ଼ିଛି । ସ୍କଟଲ୍ୟାଣ୍ଡ ଆଗାମୀ ଟି-୨୦ ବିଶ୍ୱକପ୍ ପାଇଁ ଯୋଗ୍ୟତା ହାସଲ କରିପାରି ନାହିଁ । ଟିମ୍ ୪ଟି ମ୍ୟାଚ୍ରୁ କେବଳ ଗୋଟିଏ ମ୍ୟାଚ୍ ଜିତିଥିଲା ।
ଜୁଲାଇ ୧୧, ୨୦୨୫ରେ ଖେଳାଯାଇଥିବା ୟୁରୋପୀୟ ଯୋଗ୍ୟତା ପର୍ଯ୍ୟାୟର ଶେଷ ମ୍ୟାଚ୍ରେ ଇଟାଲୀ ଓ ନେଦରଲ୍ୟାଣ୍ଡସ୍ ମଧ୍ୟରେ ମୁକାବିଲା ହୋଇଥିଲା । ଯଦିଓ ଏହି ମ୍ୟାଚ୍ରେ ଇଟାଲୀକୁ ପରାଜୟର ସାମ୍ନା କରିବାକୁ ପଡ଼ିଥିଲା, କିନ୍ତୁ ଏହା ଟି-୨୦ ବିଶ୍ୱକପ୍ ପାଇଁ ସେମାନଙ୍କର ଯୋଗ୍ୟତାକୁ ପ୍ରଭାବିତ କରିନଥିଲା । ମ୍ୟାଚ୍ରେ ଇଟାଲୀ ପ୍ରଥମେ ବ୍ୟାଟିଂ କରି ୨୦ ଓଭରରେ ୭ ୱିକେଟ୍ ହରାଇ ୧୩୪ ରନ୍ କରିଥିଲା। ଜବାବରେ ନେଦରଲ୍ୟାଣ୍ଡସ୍ ୧୬.୨ ଓଭରରେ ମାତ୍ର ଗୋଟିଏ ୱିକେଟ୍ ହରାଇ ଲକ୍ଷ୍ୟ ହାସଲ କରିଥିଲା ।
ସେପଟେ ଶେଷ ମ୍ୟାଚରେ ଗୋଟିଏ ୱିକେଟରେ ଜିତିବା ସତ୍ତ୍ୱେ ଜର୍ସି ଟୁର୍ଣ୍ଣାମେଣ୍ଟରୁ ବାଦ ପଡ଼ିଥିଲା । ଇଟାଲୀ ଏବଂ ଜର୍ସି ଉଭୟ ପାଞ୍ଚ ପଏଣ୍ଟ ପାଇଥିଲେ । କିନ୍ତୁ ଭଲ ନେଟ୍ ରନ ରେଟ୍ ଯୋଗୁଁ ଇଟାଲୀ ୨୦୨୬ ଟି-୨୦ ବିଶ୍ୱକପ୍ ପାଇଁ ଯୋଗ୍ୟତା ଅର୍ଜନ କରିବାରେ ସଫଳ ହୋଇଛି ।
