ନୂଆଦିଲ୍ଲୀ ୧୭/୦୫: ୟେମେନରେ ହୁତି-ନିୟନ୍ତ୍ରିତ ବନ୍ଦରଗୁଡ଼ିକ ଉପରେ ଇସ୍ରାଏଲର ବଡ଼ ଧରଣର ଏୟାର ଷ୍ଟ୍ରାଇକ୍ । ଯାହା ଫଳରେ ବହୁତ କ୍ଷତି ହୋଇଛି। ଇସ୍ରାଏଲ ପ୍ରତିରକ୍ଷା ମନ୍ତ୍ରୀ ଇସ୍ରାଏଲ କେଟ୍ଜ ଆକ୍ରମଣକୁ ନିଶ୍ଚିତ କରିଛନ୍ତି। ସେ କହିଛନ୍ତି ଯେ ଇସ୍ରାଏଲୀ ସେନା ୟେମେନର ସେହି ବନ୍ଦରଗୁଡ଼ିକୁ ବ୍ୟାପକ କ୍ଷତି ପହଞ୍ଚାଇଛି ଯାହା ହୁତି ଆତଙ୍କବାଦୀ ସଂଗଠନର ନିୟନ୍ତ୍ରଣରେ ଅଛି । ସେମାନେ ହୁତି ନେତାଙ୍କୁ ହତ୍ୟା କରିବାକୁ ଶପଥ ନେଇଛନ୍ତି ।
ପ୍ରତିରକ୍ଷା ମନ୍ତ୍ରୀ ଇସ୍ରାଏଲ କେଟ୍ଜ କହିଛନ୍ତି ଯେ ଯଦି ହୁତି ସଂଗଠନ ଇସ୍ରାଏଲ ଉପରେ କ୍ଷେପଣାସ୍ତ୍ର ଆକ୍ରମଣ ଜାରି ରଖେ, ତେବେ ସେମାନଙ୍କୁ ଏବଂ ସେମାନଙ୍କ ନେତାମାନଙ୍କୁ ଗମ୍ଭୀର ପରିଣାମ ଭୋଗ କରିବାକୁ ପଡିବ। ଯେପରି ଆମେ ଗାଜାରେ ହମାସ ସାମରିକ ମୁଖ୍ୟ ମହମ୍ମଦ ଦୈଫ୍, ବେରୁତରେ ସିନୱାର୍ସ (ହମାସ ନେତା) ଏବଂ ହାସନ ନସରାଲ୍ଲା (ହିଜବୋଲା ନେତା), ତେହେରାନରେ ହାନିୟେ (ହମାସ ମୁଖ୍ୟ) ଉପରେ ଆକ୍ରମଣ କରିଥିଲୁ । ସେହିପରି ଆମେ ୟେମେନରେ ଅବଦୁଲ ମାଲିକ ଅଲ-ହୁତିଙ୍କୁ ମଧ୍ୟ ଟାର୍ଗେଟ କରିବୁ। ଆମେ ଯେକୌଣସି ଶତ୍ରୁ ବିରୁଦ୍ଧରେ ଆମର ସମସ୍ତ ଶକ୍ତି ସହିତ ନିଜକୁ ରକ୍ଷା କରିବୁ।
ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ଏହି କାର୍ଯ୍ୟକୁ ପ୍ରଶଂସା କରିଛନ୍ତି। ସେ କହିଛନ୍ତି, ଆମର ପାଇଲଟମାନେ ହୁତି ଆତଙ୍କବାଦୀଙ୍କ ଦୁଇଟି ଘାଟି ଉପରେ ସଫଳତାର ସହ ଆକ୍ରମଣ କରିଛନ୍ତି। ଆମେ ହୁତିମାନଙ୍କୁ ଆହୁରି କ୍ଷତି ପହଞ୍ଚାଇବୁ । ଏପରିକି ସେମାନେ ବ୍ୟବହାର କରୁଥିବା ଭିତ୍ତିଭୂମିକୁ ମଧ୍ୟ ।
ନେତାନ୍ୟାହୁ ମଧ୍ୟ କହିଥିଲେ ଯେ ହୁତିଙ୍କ ପଛରେ ଇରାନର ହାତ ଅଛି। ସେ ଆହୁରି କହିଛନ୍ତି, ହୁତିମାନେ କେବଳ ବନ୍ଦୀ। ସେମାନଙ୍କ ପଛରେ ଥିବା ଶକ୍ତି, ସେମାନଙ୍କୁ ସମର୍ଥନ ଏବଂ ନିର୍ଦ୍ଦେଶ ଦେଉଥିବା ଶକ୍ତି ହେଉଛି ଇରାନ। ହେଲେ ଏବେ ହୁତିମାନଙ୍କୁ ଏଥିପାଇଁ ବହୁତ ମୂଲ୍ୟ ଦେବାକୁ ପଡିବ । ଆମେ ଇସ୍ରାଏଲର ସୁରକ୍ଷା ବଜାୟ ରଖିବା ପାଇଁ ପ୍ରତ୍ୟେକ ସମ୍ଭବ ପଦକ୍ଷେପ ନେବୁ।
