ଭୁବନେଶ୍ୱର ୦୪।୦୭ : ଅବିଶ୍ରାନ୍ତ ବର୍ଷା ଧାରା । ବନ୍ଦ ହେବାର ନାଁ ଧରୁନି । ଶୁଖିଲା ପାଗ କୁଆଡ଼େ ହଜିଗଲାଣି । ନିୟମିତ ବର୍ଷା ଲାଗି ରହିଛି । ପାଣିପାଗର ସମ୍ଭାବ୍ୟ ଲକ୍ଷଣ ଯାହା- ଏବେ ବର୍ଷା ଛାଡ଼ିଲା ଭଳି ଲାଗୁନି। ଗୋଟିଏ ପରେ ଗୋଟିଏ ଘୂର୍ଣ୍ଣିବଳୟ ବର୍ଷା ଜାରି ରହିଥିବାବେଳେ ଆହୁରି ଦୁଇଟି ଘୂର୍ଣ୍ଣିବଳୟ ଆଗପଛ ହୋଇ ଆସୁଛି। ନିର୍ଧୁମ ଢାଳିବ ବର୍ଷା।
ଏ ବର୍ଷ ଆଗୁଆ ଆସିଥିବା ମୌସୁମୀ ଆରମ୍ଭରୁ ଧକାଉଥିଲା । ରଜ ଯାଏ ମୌସୁମୀ ଦୁର୍ବଳ ହୋଇ ପଡ଼ିଥିଲା। ଜୁନ୍ ୨୦ ପରେ ମୌସୁମୀର ପ୍ରକୋପ ଦେଖିବାକୁ ମିଳିଛି । ଯେତିକି ନିଅଣ୍ଟିଆ ସ୍ଥିତି ଥିଲା, ସବୁ ଭରଣା କରିଦେଲା ଏଇ ସପ୍ତାହରେ। ଜୁନ୍ ୨୬ରୁ ଜୁଲାଇ ୨ ଭିତରେ ରାଜ୍ୟରେ ଯେତିକି ବର୍ଷା ହେବା କଥା, ତା’ଠାରୁ ୧୦୦% ଅଧିକ ବର୍ଷା ଅଜାଡ଼ିଛି । ବର୍ତ୍ତମାନ ସ୍ଥିତି ଏଇଆ- ଜୁନ୍ ପହିଲାରୁ ଏଯାଏଁ ରାଜ୍ୟରେ ୨୯% ଅଧିକ ବର୍ଷା ଢାଳିଛି ମୌସୁମୀ । ୩ଟି ଜିଲ୍ଲାରେ (ପୁରୀ, ଗଜପତି, ନୂଆପଡ଼ା) ବର୍ଷା ସାମାନ୍ୟ ନିଅଣ୍ଟିଆ ଥିବାବେଳେ ୨୭ ଜିଲ୍ଲା ଭଲ ବର୍ଷା ପାଇଛି । ଜୁଲାଇରୁ ବି ପ୍ରବଳ ବର୍ଷା ଆଶା ଦେଖାଇଛି ପାଣିପାଗ ବିଭାଗ ।
ବର୍ତ୍ତମାନ ଉତ୍ତର ଓଡ଼ିଶା ଏବଂ ପାଶ୍ୱର୍ବର୍ତ୍ତୀ ଗାଙ୍ଗେୟ ପଶ୍ଚିମବଙ୍ଗ ଉପରେ ଘୂର୍ଣ୍ଣିବଳୟ ଅଛି । ଏହା ପ୍ରଭାବରେ ରାଜ୍ୟରେ ବର୍ଷା ଲାଗି ରହିଛି । ବିଭିନ୍ନ ମଡେଲକୁ ଅନୁଶୀଳନ କରି ଆଗାମୀ ଦୁଇ ସପ୍ତାହ ପାଇଁ ଭାରତୀୟ ପାଣିପାଗ ବିଭାଗ (ଆଇଏମ୍ଡି) ପୂର୍ବାନୁମାନ ଜାରି କରିଛି । ଏହି ପୂର୍ବାନୁମାନ କହୁଛି, ଆସନ୍ତା ୬ ତାରିଖ ବେଳକୁ ଉତ୍ତର ବଙ୍ଗୋପସାଗର, ପାଶ୍ୱର୍ବର୍ତ୍ତୀ ଉପକୂଳ ପଶ୍ଚିମବଙ୍ଗ ଓ ବାଂଲାଦେଶ ଉପରେ ଏକ ଘୂର୍ଣ୍ଣିବଳୟ ସୃଷ୍ଟି ହୋଇପାରେ। ଏହା ୩-୪ ଦିନ ଭିତରେ ପଶ୍ଚିମ ଉତ୍ତର ପଶ୍ଚିମ ଦିଗରେ ଗାଙ୍ଗେୟ ପଶ୍ଚିମବଙ୍ଗ, ଉତ୍ତର ଓଡ଼ିଶା, ଝାଡ଼ଖଣ୍ଡ ଓ ପୂର୍ବ ମଧ୍ୟପ୍ରଦେଶ ଆଡ଼କୁ ଗତି କରିବା ସମ୍ଭାବନା ଅଛି। ସେହିପରି ଜୁଲାଇ ୧୧ରୁ ୧୭ ତାରିଖ ଭିତରେ ଆଉ ଏକ ଘୂର୍ଣ୍ଣିବଳୟ ହୋଇପାରେ ଉତ୍ତର ବଙ୍ଗୋପସାଗର ଓ ପାଶ୍ୱର୍ବର୍ତ୍ତୀ ଉପକୂଳ ପଶ୍ଚିମବଙ୍ଗ-ଓଡ଼ିଶା ଏବ ବାଂଲାଦେଶ ଉପରେ। ଏବେ ଗୋଟିଏ ଘୂର୍ଣ୍ଣିବଳୟ ଥିବାବେଳେ ଆଗକୁ ଆଗ ପଛ ହୋଇ ଆଉ ଦୁଇଟି ଘୂର୍ଣ୍ଣିବଳୟ ଓଡ଼ିଶା ମୁହାଁ ହେବେ। ଏଥିରୁ ସ୍ପଷ୍ଟ-ଓଡ଼ିଶାରେ ବର୍ତ୍ତମାନ ଶୁଖିଲା ପାଗ ଆଶା କମ୍ ।
ଭୁବନେଶ୍ୱର ପାଣିପାଗ କେନ୍ଦ୍ରର ଆକଳନ ହେଲା-ଶୁକ୍ରବାର ରାଜ୍ୟର ଅଧିକାଂଶ ସ୍ଥାନରେ ବର୍ଷା ସମ୍ଭାବନା ଅଛି। ସୁନ୍ଦରଗଡ଼ରେ ପ୍ରବଳରୁ ପ୍ରବଳତର ବର୍ଷା ଓ ପବନ ହୋଇପାରେ । ଝାରସୁଗୁଡ଼ା, ବରଗଡ଼, ସୋନପୁର, ସମ୍ବଲପୁର, ଦେବଗଡ଼, ବଲାଙ୍ଗୀର, ନୂଆପଡ଼ାରେ ପ୍ରବଳ ବର୍ଷା ଆଶଙ୍କା ଅଛି । ଶନିବାର ବାହୁଡ଼ା ଯାତ୍ରା ଦିନ ରାଜ୍ୟରେ ବିସ୍ତୃତ ବର୍ଷା ହେବ । ଆଭ୍ୟନ୍ତରୀଣ ଓଡ଼ିଶାର ଅଧିକାଂଶ ଅଞ୍ଚଳ, ଉପକୂଳର ଅନେକ ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ସମ୍ଭାବନା ଅଛି । ସୁନ୍ଦରଗଡ଼ରେ ପ୍ରବଳରୁ ପ୍ରବଳତର ବର୍ଷା, ମୟୂରଭଞ୍ଜ, ବାଲେଶ୍ୱର ଓ କେନ୍ଦୁଝରରେ ପ୍ରବଳ ବର୍ଷା ହୋଇପାରେ । ୬ ତାରିଖ (ରବିବାର) ଉପକୂଳ ଓଡ଼ିଶା ଓ ଦକ୍ଷିଣ ଆଭ୍ୟନ୍ତରୀଣର ଅନେକ ସ୍ଥାନ ଏବଂ ଉତ୍ତର ଆଭ୍ୟନ୍ତରୀଣର ଅଧିକାଂଶ ସ୍ଥାନରେ ବର୍ଷା ସମ୍ଭାବନା ଅଛି । ୭ରୁ ବର୍ଷା ପ୍ରକୋପ କମିବ । ତଥାପି ଅନେକ ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ହୋଇପାରେ ।
ବୁଧବାର ସକାଳରୁ ଅପରାହ୍ଣ ସାଢ଼େ ୫ଟା ଭିତରେ ଭୁବନେଶ୍ୱରରେ ୩୪.୨, ସୁନ୍ଦରଗଡ଼ରେ ୪୩.୪, କୋରାପୁଟରେ ୧୪.୮, ବୌଦ୍ଧରେ ୧୫ ମିମି ବର୍ଷା ରେକର୍ଡ ହୋଇଥିବାବେଳେ ଅନେକ ସ୍ଥାନରେ ହାଲୁକା ବର୍ଷା ବି ହୋଇଛି । ଜୁନ୍ ପହିଲାରୁ ଏଯାବତ୍ ରାଜ୍ୟରେ ୨୩୮ ମିମି ବର୍ଷା ବର୍ଷା ହେବା କଥା। ହୋଇଛି ୩୦୫.୮ ମିମି । ନୂଆପଡ଼ା, ଗଜପତି, ପୁରୀରେ ବର୍ଷା କମ୍ ଥିବାବେଳେ ୧୪ ଜିଲ୍ଲାରେ ଅଧିକ ଓ ୧୩ଟି ଜିଲ୍ଲାରେ ସ୍ୱାଭାବିକ ବର୍ଷା ହୋଇଛି। ବୌଦ୍ଧରେ ୮୯%, ସୁନ୍ଦରଗଡ଼ରେ ୮୧%, ଦେବଗଡ଼ରେ ୭୮%, ସୋନପୁରରେ ୭୩%, କୋରାପୁଟରେ ୭୩%, ମୟୂରଭଞ୍ଜରେ ୬୩% ଅଧିକ ବର୍ଷା ହୋଇଛି । କନ୍ଧମାଳ, ଢେଙ୍କାନାଳ, କେନ୍ଦୁଝର, ସମ୍ବଲପୁର, କେନ୍ଦ୍ରାପଡ଼ା, ଜଗତସିଂହପୁର, କଟକ, ମାଲକାନଗିରିରେ ସ୍ୱାଭାବିକଠାରୁ ୨୦%ରୁ ୫୦% ପର୍ଯ୍ୟନ୍ତ ଅଧିକ ବର୍ଷା ହୋଇଛି ।
ଗତ ୨୬ ଜୁନ୍ରୁ ଆଜି ଭିତରେ ରାଜ୍ୟରେ ହାରାହାରି ୧୨୬.୫ ମିମି ବର୍ଷା ହୋଇଛି । ଏହି ସମୟ ଭିତରେ କୋରାପୁଟରେ ଯେତିକି ବର୍ଷା ହେବା କଥା, ତା’ଠାରୁ ୨୪୫% ଅଧିକ ବର୍ଷା ଅଜାଡ଼ିଛି । ମୟୂରଭଞ୍ଜରେ ୨୧୩%, ବାଲେଶ୍ୱରରେ ୨୦୧%, ବୌଦ୍ଧରେ ୧୭୨%, ସୋନପୁରରେ ୧୪୫%, ମାଲକାନଗିରିରେ ୧୩୭%, ନବରଙ୍ଗପୁରରେ ୧୨୭%, ଜଗତସିଂହପୁରରେ ୧୩୭%, ସୁନ୍ଦରଗଡ଼ରେ ୧୦୧%, କଟକରେ ୧୧୭%, ଅନୁଗୁଳରେ ୧୦୬%, କେନ୍ଦୁଝରରେ ୧୦୮%, ଭଦ୍ରକରେ ୧୦୭% ମିମି ଅଧିକ ବର୍ଷା ଢାଳିଛି ।
