କେନ୍ଦ୍ରାପଡ଼ା ୨୯।୮: ମହିଳାଙ୍କୁ ପ୍ରେମ ନିବେଦନ କରି ଚାକିରିରୁ ତଡ଼ା ଖାଇଲେ ହାବିଲଦାର । ପ୍ରେମ ନିବେଦନ ସହ ଅନୈତିକ ସମ୍ପର୍କ ରଖିବାକୁ ପ୍ରବର୍ତ୍ତାଇବା ଓ ଧମକାଇବା ଅଭିଯୋଗରେ ନିଲମ୍ବିତ ହେଲେ କୁଦାନଗରୀ ଥାନାରେ କାର୍ଯ୍ୟରତ ହାବିଲଦାର ଅଜୟ ସାହୁ । ତାଙ୍କୁ ନିଲମ୍ବନ କରାଯିବା ସହ ବିଭାଗୀୟ ତଦନ୍ତ ମଧ୍ୟ ଆରମ୍ଭ ହୋଇଥିବା କେନ୍ଦ୍ରାପଡ଼ା ଜିଲ୍ଲା ଏସ୍ପି ସିଦ୍ଧାର୍ଥ କଟ୍ଟାରିଆ ସୂଚନା ଦେଇଛନ୍ତି ।
ସୂଚନାଯୋଗ୍ୟ ଯେ, ଅଜୟ ଜଣେ ମହିଳାଙ୍କ ଅସହାୟତାର ସୁଯୋଗ ନେଇ ତାଙ୍କୁ ପ୍ରେମ ନିବେଦନ କରିଥିଲେ । ମହିଳାଙ୍କୁ ଏକୁଟିଆ ଦେଖି ଅଶ୍ଳୀଳ ଇଙ୍ଗିତ କରି ଟଣାଓଟରା ବି କରିଥିଲେ । ମହିଳା ଜଣଙ୍କ ପ୍ରତିବାଦ କରିବାରୁ ଅଜୟ ତାଙ୍କୁ ମାଡ଼ ମାରି ତଣ୍ଟି ଚିପି ଦେବାକୁ ମଧ୍ୟ ଉଦ୍ୟମ କରିଥିଲେ । ପୀଡ଼ିତା ମହିଳା ଜଣଙ୍କ ଗତ ୨୩ ତାରିଖରେ ଏସ୍ପିଙ୍କୁ ଭେଟି ଏ ନେଇ ଅଭିଯୋଗ କରିଥିଲେ । ଏସ୍ପିଙ୍କ ନିର୍ଦ୍ଦେଶ କ୍ରମେ ମାର୍ଶାଘାଇ ପୋଲିସ ମାମଲା ରୁଜୁ କରିଥିଲା । ଅଜୟ ସଂପୃକ୍ତ ମହିଳାଙ୍କ ମୋବାଇଲ ନମ୍ବର ରଖି ଗତ ଶୁକ୍ରବାର ଠାରୁ ତାଙ୍କୁ ବାରମ୍ବାର ଫୋନ୍ କରି ପ୍ରେମ ନିବେଦନ କରିବା ସହ ବାହାରକୁ ବୁଲିବା ପାଇଁ ଡାକୁଥିଲେ । ପ୍ରଲୋଭିତ କରୁଥିଲେ, ଧମକାଉ ବି ଥିଲେ । ସଂପୃକ୍ତ ମହିଳାଙ୍କ ସହ ଅଜୟଙ୍କର ଏସଂକ୍ରାନ୍ତ ବାର୍ତ୍ତାଳାପର ଅଡିଓ ଭାଇରାଲ୍ ହେବା ପରେ ଅଜୟ ଆଉ ଥାନାକୁ ଯାଇନାହାନ୍ତି । ସେ ଡ୍ୟୁଟିରେ ଅନୁପସ୍ଥିତ ରହିବା ନେଇ ଥାନା ଅଧିକାରୀ ଏସ୍ପିଙ୍କୁ ରିପୋର୍ଟ କରିଥିଲେ । ପରେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇ ମାମଲାର ତଦନ୍ତ ଚାଲୁ ରହିଛି ।
You Can Read:
ଆସନ୍ତା ୩ରେ ବସିବ ଶ୍ରୀମନ୍ଦିର ପରିଚାଳନା କମିଟି ବୈଠକ, ନୂତନ କମିଟିର ଏହା ପ୍ରଥମ ବୈଠକ
