ମୁମ୍ଵାଇ ୨୯।୦୬; ମଝିରେ ମଝିରେ ଚର୍ଚ୍ଚାରେ ରହନ୍ତି ଦକ୍ଷିଣୀ ସୁନ୍ଦରୀ ସାମନ୍ଥା ରୁଥ୍ ପ୍ରଭୁ । ନାଗା ଚୈତନ୍ୟଙ୍କ ସହ ପ୍ରେମ, ବିବାହ ଓ ବିଚ୍ଛେଦ- ସାମନ୍ଥାଙ୍କୁ ନେଇ କମ୍ ଚର୍ଚ୍ଚା ହୋଇନି । ଏକ ବିରଳ ସ୍ନାୟୁଜନିତ ରୋଗରେ ଆକ୍ରାନ୍ତ ହେବା ନେଇ ମଧ୍ୟ ସେ ଚର୍ଚ୍ଚାରେ ଥିଲେ । ଏବେ ତାଙ୍କୁ ନେଇ ଆଉ ଏକ ଚର୍ଚ୍ଚା ଆରମ୍ଭ ହୋଇଛି ଯେ ଟିକେ ଟିକେ କଥାରେ କାଳେ ସେ ରାଗିଯାଉଛନ୍ତି । ତାଙ୍କୁ କେହି କିଛି ପ୍ରଶ୍ନ କଲେ ସେ ଚିଡ଼ି ଉଠୁଛନ୍ତି। ହେଲେ ତାଙ୍କ ପିଆର୍ ଟିମ୍ ଭିନ୍ନ କଥା କହୁଛି ।
ପିଆର୍ ଟିମ୍ ଅନୁସାରେ ସାମନ୍ଥା ରାଗୁନାହାନ୍ତି, ବରଂ କପଟ ରାଗ ଦେଖାଉଛନ୍ତି । ତାଙ୍କ ହୃଦୟ ଯଥେଷ୍ଟ କୋମଳ । ସେ ପ୍ରଶଂସକମାନଙ୍କ ପ୍ରତି କେବେ ବି ଖରାପ ଆଚରଣ ପ୍ରଦର୍ଶନ କରିନାହାନ୍ତି । କିନ୍ତୁ କ୍ୟାମେରା ତ ଭିନ୍ନ କଥା କହୁଛି । ସଂପ୍ରତି ମୁମ୍ବାଇର ବାନ୍ଦ୍ରାସ୍ଥିତ ଏକ ଜିମ୍ରୁ ସେ ବାହାରି ନିଜ କାର୍ ଆଡ଼କୁ ଯାଉଥିଲେ । ସେହି ସମୟରେ ତାଙ୍କ ଉପରେ କେତେଜଣ ପାପାରାଜ୍ଜିଙ୍କ ନଜର ପଡିଲା । ସେମାନେ ସାମନ୍ଥାଙ୍କର ଫଟୋ ଉଠାଇନଥିଲେ । କେବଳ ସୁପ୍ରଭାତ ଜଣାଇଥିଲେ । ଏତିକିରେ ଚିହିଁକି ଉଠିଥିଲେ ସାମନ୍ଥା । ଏହା ଦେଖି ସାମନ୍ଥାଙ୍କ ରାଗ କହିଲେ ନ ସରେ । ସାମନ୍ଥାଙ୍କ ଏପରି ରୂପ ଆଗରୁ କେହି ଦେଖିନଥିଲେ । ସେଦିନର ସାମନ୍ଥା ଯେପରି ରୁଢ଼ ବ୍ୟବହାର କରିଥିଲେ ତାହାର ଭିଡିଓ ସୋସିଆଲ୍ ମିଡିଆରେ ଭାଇରାଲ୍ ହୋଇଛି । ଅନେକ ନେଟିଜେନ୍ ତାଙ୍କର ଏପରି ବ୍ୟବହାରକୁ ନିନ୍ଦା କରିଛନ୍ତି ।
ଶୁଣିବାକୁ ମିଳିଛି ସାମନ୍ଥା ଏବେ ଜଣେ ଦକ୍ଷିଣ ଭାରତୀୟ ନିର୍ଦ୍ଦେଶକଙ୍କୁ ଡେଟ୍ କରୁଛନ୍ତି । କାଳେ ସେହି ଖବର ପାପାରାଜ୍ଜିମାନେ ବାହାରେ ପ୍ରକାଶ କରିଦେବେ ସେ ନେଇ ଚିନ୍ତାରେ ଅଛନ୍ତି ସାମନ୍ଥା । ଅନେକ ସୋସିଆଲ୍ ମିଡିଆ ବ୍ୟବହାରକାରୀ ଲେଖିଛନ୍ତି ନୂଆ ଫିଲ୍ମଟିଏ ଆସୁ । ଏହାପରେ ଦେଖାଯିବ ଏହି ଅଭିନେତ୍ରୀଙ୍କ ବ୍ୟବହାର ଅଚାନକ କେମିତି ବଦଳିଯିବ । କେହି କେହି ଲେଖିଛନ୍ତି ଗୋଟିଏ ପରେ ଗୋଟିଏ ଫ୍ଲପ୍ ସିନେମା ପରେ ବି ଏମିତି ମନୋଭାବ କେଉଁଠୁ ଆସେ? କେହି କେହି ତାଙ୍କ ଓଜନ କମାଇବା ସହିତ ମନକୁ ଶାନ୍ତ ରଖିବାର ପରାମର୍ଶ ବି ଦେଇଛନ୍ତି । ଦେଖାଯାଉ ସାମନ୍ଥା ପ୍ରଶଂସକମାନଙ୍କ କଥା କେତେ ମାନୁଛନ୍ତି ।
