ବେଙ୍ଗାଲୁରୁ ୨୩/୦୭ : ପରିବା ଦୋକାନୀଙ୍କୁ ଜିଏସ୍ ନୋଟିସ୍ । ଲକ୍ଷେ କି ଦୁି ଲକ୍ଷ ନୁହେଁ ଏକାଥରେ ୨୯ ଲକ୍ଷର ନୋଟିସ୍ । ଚର୍ଚ୍ଚାରେ କର୍ଣ୍ଣାଟକର ଜଣେ ପନିପରିବା ବିକ୍ରେତା । GST ଅଧିକାରୀଙ୍କ ପକ୍ଷରୁ ଘରକୁ ଆସିଛି ଏତେ ବଡ଼ ଟଙ୍କାର GST ନୋଟିସ । ଯାହା ଦେଖି ତାଜବୁ ଦୋକାନୀ ଜଣଙ୍କ ।
ଦୋକାନୀ ଜଣଙ୍କ ହେଉଛନ୍ତି ଶଙ୍କରଗୌଡା ହାଡିମଣିଙ୍କର । ଯିଏ କି କର୍ଣ୍ଣାଟକରେ ପ୍ରତିଦିନ ପନିପରିବା ଦୋକାନ ଖୋଲି ତାଙ୍କ ପରିବାର ଚଳାନ୍ତି । ହେଲେ ତାଙ୍କୁ ସାମଗ୍ରୀ ଓ ସେବା କର ନିୟମ ଅନୁଯାୟୀ ଏହି ବିଶାଳ ଦେୟ ଦେବାକୁ କୁହାଯାଇଛି । ଆସନ୍ତୁ ଜାଣିବା ପୁରା ଘଟଣା...
କର୍ଣ୍ଣାଟକର ହାଭେରୀରେ ଘଟିଛି ଏହି ମାମଲା । ଶଙ୍କରଗୌଡା ସ୍ଥାନୀୟ ମ୍ୟୁନିସିପାଲ୍ ହାଇସ୍କୁଲ ନିକଟରେ ଏକ ପନିପରିବା ଦୋକାନ କରିଛନ୍ତି । ଗତ ଚାରି ବର୍ଷ ଧରି ପନିପରିବା ବିକ୍ରି କରୁଛନ୍ତି। ତାଙ୍କର ଅଧିକାଂଶ ଗ୍ରାହକ UPI କିମ୍ବା ଅନ୍ୟାନ୍ୟ ଡିଜିଟାଲ୍ ୱାଲେଟ୍ ମାଧ୍ୟମରେ ପେମେଣ୍ଟ କରନ୍ତି । ତେବେ ଶଙ୍କରଙ୍କ ପାଇଁ ଏକ ବଡ଼ ସମସ୍ୟା ହୋଇଗଲା ଏହି ଡିଜିଟାଲ ପେମେଣ୍ଟ । ଯାହାର ଫଳସ୍ୱରୂପ GST ଅଧିକାରୀମାନେ ତାଙ୍କୁ ଏକ ନୋଟିସ ପଠାଇଛନ୍ତି । ନୋଟିସ୍ରେ ଲେଖା ଅଛି କି, ଚାରି ବର୍ଷରେ ୧.୬୩ କୋଟି ଟଙ୍କାର କାରବାର କରିଛନ୍ତି । ଏହା ଅନୁସାରେ, ତାଙ୍କର ୨୯ ଲକ୍ଷ ଟଙ୍କାର GST ଦେବାର ଅଛି। ତେବେ ପ୍ରତିକ୍ରିୟାରେ ଶଙ୍କରଗୌଡା କହିଛନ୍ତି 'ଏହା ଅସମ୍ଭବ' ।
ରିପୋର୍ଟ ଅନୁଯାୟୀ, GST ନୋଟିସ ପାଇବା ପରେ, ପନିପରିବା ବିକ୍ରେତା ଶଙ୍କରଗୌଡା କହିଛନ୍ତି ଯେ ସେ ଚାଷୀଙ୍କଠାରୁ ସିଧାସଳଖ ତାଜା ପନିପରିବା କିଣନ୍ତି । ତାଙ୍କ ଛୋଟ ଦୋକାନରେ ବିକ୍ରି କରନ୍ତି । ଯେଉଁଠାରେ ଅଧିକାଂଶ ଗ୍ରାହକ UPI ପେମେଣ୍ଟକୁ ପସନ୍ଦ କରନ୍ତି । କାରଣ ଆଜିର ସମୟରେ ନଗଦର ବ୍ୟବହାର ବହୁତ ହ୍ରାସ ପାଇଛି। ଏହା ସହିତ, ସେ କହିଛନ୍ତି ଯେ ସେ ପ୍ରତିବର୍ଷ ତାଙ୍କର ଆୟକର ରିଟର୍ଣ୍ଣ (ITR ଫାଇଲ୍) ଫାଇଲ୍ କରନ୍ତି ଏବଂ ଏହାର ସମ୍ପୂର୍ଣ୍ଣ ରେକର୍ଡ ମଧ୍ୟ ରଖନ୍ତି। ନୋଟିସ ପାଇବା ପରେ ସେ ଭୟଭୀତ ଅବସ୍ଥାରେ ଅଛନ୍ତି ଏବଂ କହୁଛନ୍ତି, 'ମୁଁ ୨୯ ଲକ୍ଷ ଟଙ୍କା କିପରି ଦେବି, ଏହାକୁ ଉଠାଇବା ଅସମ୍ଭବ।'
ନିୟମ ଅନୁଯାୟୀ, ଯଦି ଜଣେ ବିକ୍ରେତା ସିଧାସଳଖ ଚାଷୀଙ୍କଠାରୁ ପନିପରିବା କିଣି ପ୍ରକ୍ରିୟାକରଣ ବିନା ବିକ୍ରୟ କରନ୍ତି । ତେବେ ଏହା ଉପରେ GST ଲାଗୁ ହେବ ନାହିଁ । ଅନ୍ୟପକ୍ଷରେ, ଯଦି ପନିପରିବା ବ୍ରାଣ୍ଡେଡ୍ କିମ୍ବା ପ୍ୟାକିଂ ହୋଇଥାଏ, ତେବେ ଏହା ଉପରେ 5% GST ଲାଗୁ ହେବ। ତଥାପି, କର୍ଣ୍ଣାଟକରେ ଶଙ୍କରଗୌଡ଼ାଙ୍କ ମାମଲା ପରେ, ତାଙ୍କ ପରି ଅନେକ ଛୋଟ ବ୍ୟବସାୟୀ UPI ପେମେଣ୍ଟ ଗ୍ରହଣ କରିବା ବନ୍ଦ କରିଦେଇଛନ୍ତି ଏବଂ ବର୍ତ୍ତମାନ କେବଳ ନଗଦ ନେଉଛନ୍ତି।
