ନୂଆଦିଲ୍ଲୀ: ସାମଗ୍ରୀ ଏବଂ ସେବା ଟିକସ ବା GST ବ୍ୟବସ୍ଥାକୁ ଆହୁରି ସରଳ କରିବାକୁ ପ୍ରସ୍ତୁତି କରୁଛନ୍ତି ସରକାର। ନିକଟରେ ସ୍ବାଧୀନତା ଦିବସ ଅବସରରେ ପ୍ରଧାନମନ୍ତ୍ରୀ ମୋଦୀ ନିଜେ ମଧ୍ୟ ଜିଏସଟି ସରଳୀକରଣ କଥା କହିଥିଲେ। ଯାହା ପରେ ଏବେ ଏହି ପ୍ରକ୍ରିୟା ଆଉ ପାଦେ ଆଗେଇଛି। ଗୁରୁବାର ରାଜ୍ୟଗୁଡ଼ିକର ଅର୍ଥମନ୍ତ୍ରୀମାନଙ୍କ ବୈଠକରେ କେନ୍ଦ୍ର ଦ୍ୱାରା ପ୍ରସ୍ତାବିତ GST ସରଳୀକରଣକୁ ସହମତି ମିଳିଛି। ଏହାର ଅର୍ଥ ବର୍ତ୍ତମାନ ଥିବା ଜିଏସଟିର ୪ଟି ସ୍ଲାବ (୫%, ୧୨%, ୧୮%, ୨୮%)କୁ ହଟାଇ କେବଳ ଦୁଇଟି ସ୍ଲାବ ରଖାଯିବ। ସରଳ ଭାଷାରେ କହିଲେ ୧୨% ଏବଂ ୨୮% ଜିଏସଟି ସ୍ଲାବ ଉଚ୍ଛେଦ କରାଯିବ ଏବଂ କେବଳ ୫% ଏବଂ ୧୮% ସ୍ଲାବ ରହିବ।

ବିହାର ଉପମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀଙ୍କ ନେତୃତ୍ୱରେ ବସିଥିବା ୬ ସଦସ୍ୟ ବିଶିଷ୍ଟ ମନ୍ତ୍ରୀଙ୍କ ବୈଠକରେ ନିଷ୍ପତ୍ତି ହୋଇଛି ଯେ, GST ହାରକୁ କେବଳ ଦୁଇଟି ସ୍ଲାବରେ ବିଭକ୍ତ କରାଯିବ। ଏଥିରେ, ଭଲ ଏବଂ ଅତ୍ୟାବଶ୍ୟକ ସାମଗ୍ରୀ ଉପରେ ୫% ହାର ଲାଗୁ ହେବ। ଅଧିକାଂଶ ମାନକ ସାମଗ୍ରୀ ଏବଂ ସେବା ଉପରେ ୧୮% ଟିକସ ଲାଗୁ ହେବ। ଏହା ବ୍ୟତୀତ, ବିଳାସପୂର୍ଣ୍ଣ ସାମଗ୍ରୀ ୪୦% ସ୍ଲାବରେ ରହିବ।

ଏହି ନିଷ୍ପତ୍ତି ପରେ, ପୂର୍ବରୁ ୧୨% ଟିକସ ଲାଗୁ ହେଉଥିବା ପ୍ରାୟ ୯୯% ସାମଗ୍ରୀ ଏବେ ୫% ସ୍ଲାବରେ ଆସିବ। ଅନ୍ୟପକ୍ଷରେ ପୂର୍ବରୁ ୨୮% ଟିକସ ଲାଗୁ ହେଉଥିବା ପ୍ରାୟ ୯୦% ସାମଗ୍ରୀ ଉପରେ ୧୮% ଟିକସ ଲାଗୁ ହେବ। ଏହା ଟିକସ ବ୍ୟବସ୍ଥାକୁ ଅଧିକ ସରଳ ଏବଂ ସ୍ପଷ୍ଟ କରିବ, ଯାହା ସାଧାରଣ ଲୋକଙ୍କ ସହିତ ବ୍ୟବସାୟୀମାନଙ୍କୁ ମଧ୍ୟ ଲାଭ ଦେବ।

ମନ୍ତ୍ରିମଣ୍ଡଳ ମଧ୍ୟ ପ୍ରସ୍ତାବ ଦେଇଛି ଯେ, ବିଳାସପୂର୍ଣ୍ଣ କାରଗୁଡ଼ିକ ଉପରେ ୪୦% ହାରରେ ଟିକସ ଲାଗୁ କରାଯିବା ଉଚିତ। ଏହା ସହିତ, କିଛି କ୍ଷତିକାରକ ଜିନିଷକୁ ମଧ୍ୟ ଏହି ସ୍ଲାବରେ ରଖାଯିବ। ମନ୍ତ୍ରିମଣ୍ଡଳରେ ଥିବା ଉତ୍ତର ପ୍ରଦେଶ, ରାଜସ୍ଥାନ, ପଶ୍ଚିମବଙ୍ଗ, କର୍ଣ୍ଣାଟକ ଏବଂ କେରଳର ଅର୍ଥମନ୍ତ୍ରୀମାନେ ମଧ୍ୟ ଏହି ପ୍ରସ୍ତାବକୁ ସମର୍ଥନ କରିଛନ୍ତି। ସେମାନେ କହିଛନ୍ତି ଯେ, ଏହା ଟିକସ ବ୍ୟବସ୍ଥାରେ ସ୍ୱଚ୍ଛତା ଆଣିବ ଏବଂ ଟିକସଦାତାଙ୍କ ସଂଖ୍ୟା ବୃଦ୍ଧି ପାଇବ।

ଅର୍ଥମନ୍ତ୍ରୀ ନିର୍ମଳା ସୀତାରମଣ ଏହି ବୈଠକରେ କହିଛନ୍ତି ଟିକସ ହାରକୁ ଯୁକ୍ତିଯୁକ୍ତ କରିବା ଦ୍ୱାରା ସାଧାରଣ ଜନତା ଲାଭବାନ ହେବେ। ଏହି ନୂତନ ବ୍ୟବସ୍ଥା ଟିକସ ସିଷ୍ଟମକୁ ସରଳ ଏବଂ ସ୍ୱଚ୍ଛ କରିବ। ଏହା ଅନେକ ସାମଗ୍ରୀ ଉପରେ ଟିକସ ହାର ହ୍ରାସ କରିବ, ଯାହା ସାମଗ୍ରୀର ମୂଲ୍ୟ ହ୍ରାସ କରିବ ଏବଂ ଗ୍ରାହକଙ୍କୁ ଆଶ୍ୱସ୍ତି ମିଳିବ।