ବିଶ୍ୱରେ ଆରମ୍ଭ ହେଲାଣି ଡଲାରର ବିକଳ୍ପ ଖୋଜା, ଚଳିତ ବର୍ଷ ପ୍ରଥମ ତ୍ରୈମାସରେ ୧୭୬% ବଢିଛି ସୁନା କିଣା

1/06/2023 at 8:16 PM

ନୂଆଦିଲ୍ଲୀ: ସାରା ଦୁନିଆର କେନ୍ଦ୍ରୀୟ ବ୍ୟାଙ୍କ ଏବେ ସୁନା କିଣିବା ପଛରେ ଦୌଡୁଛନ୍ତି । ବୈଶ୍ୱିକ ବଜାରରେ ବଢୁଥିବା ଅସ୍ଥିରତା ମଧ୍ୟରେ ବିଭିନ୍ନ କେନ୍ଦ୍ରୀୟ ବ୍ୟାଙ୍କ ସୁନାରେ ନିବେଶକୁ ଅଧିକ ସୁରକ୍ଷିତ ମଣୁଛନ୍ତି । ବିଶେଷଜ୍ଞଙ୍କ ଅନୁସାରେ ଏହା ଆମେରିକୀୟ ଡଲାର ଉପରୁ ଲଗାତାର ହ୍ରାସ ପାଉଥିବା ଭରସାର ସଂକେତ ଅଟେ । ଦୁନିଆରେ ବର୍ତ୍ତମାନ ସମୟରେ ଅନ୍ତରାଷ୍ଟ୍ରୀୟ ବ୍ୟବସାୟରେ ଡଲାରର ବିକଳ୍ପ ସନ୍ଧାନ କରାଯାଉଛି । ଏହି ଘଟଣାକୁ ଡି-ଡଲାରାଇଜେଶନ ନାଁରେ ଜଣାଯାଉଛି ।

ସାରା ଦୁନିଆରେ ସୁନା ବ୍ୟବସାୟର ତଥ୍ୟ ରଖୁଥିବା ସଂସ୍ଥା ୱାଲର୍ଡ ଗୋଲ୍ଡ କାଉନସିଲ ନିକଟରେ ପ୍ରମୁଖ ଦେଶଗୁଡିକର କେନ୍ଦ୍ରୀୟ ବ୍ୟାଙ୍କର ସର୍ଭେ କରାଇଥିଲା । ସଂସ୍ଥା ନିଜ ରିପୋର୍ଟରେ କହିଛି ଯେ ୬୨ ପ୍ରତିଶତ କେନ୍ଦ୍ରୀୟ ବ୍ୟାଙ୍କ ଆସନ୍ତା ପାଞ୍ଚ ବର୍ଷରେ ନିଜ ସୁନା ଭଣ୍ଡାରରେ ସୁନାର ମାତ୍ରା ବଢାଇବାର ଯୋଜନା ରଖିଛନ୍ତି । ୱାଲର୍ଡ ଗୋଲ୍ଡ କାଇନସିଲ ଏକ ବର୍ଷ ପୂର୍ବେ ମଧ୍ୟ ସମାନ ସର୍ଭେ କରାଇଥିଲା । ସେହି ସମୟରେ ପ୍ରାୟ ୪୬ ପ୍ରତିଶତ ସେଣ୍ଟ୍ରାଲ ବ୍ୟାଙ୍କ ନିଜ ସୁନା ଭଣ୍ଡାରେ ସୁନା ବଢାଇବା ନେଇ ସମ୍ଭାବନା ପ୍ରକାଶ କରାଯାଇଥିଲା । ସର୍ଭେ ରିପୋର୍ଟ ଅନୁସାରେ ୫୦ ପ୍ରତିଶତ କେନ୍ଦ୍ରୀୟ ବ୍ୟାଙ୍କ ଆଶା ରଖିଛନ୍ତି ଯେ ଆସନ୍ତା ପାଞ୍ଚ ବର୍ଷରେ ସେମାନଙ୍କ ବିଦେଶୀ ମୁଦ୍ରା ଭଣ୍ଡାରରେ ସୁନାର ଭାଗ ୪୦ରୁ ୫୦ ପ୍ରତିଶତ ଯାଏ ପହଞ୍ଚିବ । ନିକଟ ଦଶନ୍ଧିରେ ସେଣ୍ଟ୍ରାଲ ବ୍ୟାଙ୍କଗୁଡିକରେ ୧୫ ପ୍ରତିଶତ ଯାଏ ସୁନା ରଖାଯିବାର ଚଳନ ଥିଲା । ଯାହା ମାତ୍ରା ଏବେ ବଢାଉଥିବା ନଜର ଆସୁଛି ।

ୱାଲର୍ଡ ଗୋଲ୍ଡ କାଉନସିଲ ନିଜ ରିପୋର୍ଟରେ କହିଛି ଯେ ଆମେରିକାରେ ଋଣ ହାର ବଢିବା, ମୁଦ୍ରାସ୍ଫୀତି ଚିନ୍ତା ଏବଂ ଭୂ-ରାଜନୀତି ବିପଦ କାରଣରୁ ନିଜ ମୁଦ୍ରା ଭଣ୍ଡାରରେ ସୁନା ମାତ୍ରା ବୃଦ୍ଧି ଏକ ସଠିକ୍ ପଦକ୍ଷେପ । ଏହି କାରଣୁ ପ୍ରେରିତ ହୋଇ କେନ୍ଦ୍ରୀୟ ବ୍ୟାଙ୍କର ଅଧିକାରୀମାନେ ନିଷ୍ପତ୍ତି ନେଉଛନ୍ତି ।

ବିଶେଷଜ୍ଞଙ୍କ ଅନୁସାରେ ଆମେରିକାରେ ଜାରି ଆର୍ଥିକ ସଂକଟ, ଆମେରିକା ସରକାର ଉପରେ ବଢୁଥିବା ଋଣର ମାତ୍ରା ଏବଂ ଆମେରିକୀୟ ଅର୍ଥବ୍ୟବସ୍ଥା ମାନ୍ଦାବସ୍ଥାର ଶିକାର ହେବା ଆଶଂକା କାରଣରୁ ଡଲାର ପ୍ରତି ବିଭିନ୍ନ ଦେଶର ଭରସା କମୁଛି । ଗୋଲ୍ଡ କାଉନସିଲ କହିଛି ଯେ ସୁନା କିଣିବା ନେଇ ଗତ ବର୍ଷ ଆରମ୍ଭ ହୋଇଥିବା ଟ୍ରେଣ୍ଡ ଏବେ ମଧ୍ୟ ଜାରି ରହିଛି । ଚଳତ ବର୍ଷର ପ୍ରଥମ ତିନି ମାସରେ କେନ୍ଦ୍ରୀୟ ବ୍ୟାଙ୍କଗୁଡିକ ପୂର୍ବ ବର୍ଷ ତୁଳନାରେ ୧୭୬ ପ୍ରତିଶତ ଅଧିକ ସୁନା କିଣିଛନ୍ତି । ଏହା ବିକଶିତ ଦେଶରେ କମ କିନ୍ତୁ ବଢୁଥିବା ଅର୍ଥବ୍ୟବସ୍ଥା ଦେଶରେ ଅଧିକ ଦେଖିବାକୁ ମିଳୁଛି ।