ନୂଆଦିଲ୍ଲୀ ୧୭।୪: ସାରା ବିଶ୍ୱରେ ଏବେ ଉତ୍ତେଜନା ଲାଗି ରହିଛି। ସବୁ କୋଣ କୌଣସି ନା କୌଣସି ସଂଘର୍ଷ ଦେଇ ଗତି କରୁଛନ୍ତି। ଏଭଳି ସ୍ଥିତିରେ ସବୁ ଦେଶ ନିଜର ସାମରିକ କ୍ଷମତା ମଜଭୁତ କରିବାରେ ଲାଗିଛନ୍ତି। ଗ୍ଲୋବାଲ ଫାୟାର ପାୱାର ୨୦୨୪ର ସାମରିକ ଶକ୍ତି ରାଙ୍କିଙ୍ଗ ଜାରି କରିଛି। ଏଥିରେ ବିଶ୍ୱର ସବୁଠୁ ଶକ୍ତିଶାଳୀ ୧୦ ଦେଶଙ୍କ ସୂଚୀ ସାମ୍ନାକୁ ଆସିଛି। ଯୁକ୍ତରାଷ୍ଟ୍ର ଆମେରିକା ଗ୍ଲୋବାଲ ଫାୟାର ପାୱାର ଇଣ୍ଡେକ୍ସରେ ୦.୦୭୪୪ ପଏଣ୍ଟ ସହିତ ପ୍ରଥମ ସ୍ଥାନରେ ରହିଛି।
ଆମେରିକାର ୨,୧୨୭,୫୦୦ ସୁଶିକ୍ଷିତ ସୈନ୍ୟ କର୍ମଚାରୀ ଥିବା ବେଳେ ୧୩,୦୪୩ଟି ଯୁଦ୍ଧ ବିମାନ ଓ ୪,୬୪୦ଟି ଟ୍ୟାଙ୍କ ଅଛି। ଏହା ପଛକୁ ଋଷିଆ ୦.୦୭୮୮ ପଏଣ୍ଟ ସହିତ ଦ୍ୱିତୀୟ ସ୍ଥାନରେ ରହିଛି। ଋଷିଆ ନିକଟରେ ୩,୫,୭୦,୦୦୦ସେନା କର୍ମଚାରୀ ଥିବା ବେଳେ ୪,୨୯୨ଟି ଯୁଦ୍ଧ ବିମାନ, ୫,୭୫୦ଟି ଟ୍ୟାଙ୍କ ରହିଛି। ଋଷିଆର ଶକ୍ତି ଓ ସାମରିକ ବଳକୁ ସାରା ଦୁନିଆ ସ୍ୱୀକାର କରିଛି। ଏହା ପଛକୁ ଚୀନକୁ ମଧ୍ୟ ୦.୦୭୮୮ ପଏଣ୍ଟ ମିଳିଛି। ତେବେ କିଛି ମାନକରେ ସେ ଋଷିଆ ଠାରୁ ପଛରେ ତୃତୀୟ ସ୍ଥାନରେ ରହିଛି।
ଚୀନର ୩,୧୭୦,୦୦୦ ସାମରିକ କର୍ମଚାରୀ ଥିବା ବେଳେ ୩,୩୦୯ଟି ଯୁଦ୍ଧବିମାନ ଓ ୬,୮୦୦ଟି ଟ୍ୟାଙ୍କ ଅଛି। ଏଥିରେ ଚୀନ୍ର ପଡୋଶୀ ଭାରତକୁ ୦.୧୧୮୪ ପଏଣ୍ଟ ସହିତ ଚତୁର୍ଥ ସ୍ଥାନ ମିଳିଛି। ଭାରତର ୫,୧୩୭,୫୫୦ ସାମରିକ କର୍ମଚାରୀ ଥିବା ବେଳେ ୨,୨୨୯ଟି ଯୁଦ୍ଧ ବିମାନ ଓ ୪,୨୦୧ଟି ଟ୍ୟାଙ୍କ ଅଛି। ଭାରତର ବଢୁଥିବା ସାମରିକ ଶକ୍ତି ସାରା ଭାରତ ପାଇଁ ଏକ ଗୌରବର କଥା। ଭାରତ ପଛକୁ ଦକ୍ଷିଣ କୋରିଆକୁ ୦.୧୬୫୬ ପଏଣ୍ଟ ମିଳିଥିବା ବେଳେ ଭାରତ ପଛକୁ ପଞ୍ଚମ ସ୍ଥାନରେ ରହିଛି।
ଦକ୍ଷିଣ କୋରିଆର ୩,୮୨୦,୦୦୦ସେନା କର୍ମଚାରୀ ଅଛନ୍ତି। ୧,୫୯୨ଟି ଯୁଦ୍ଧ ବିମାନ ଥିବା ବେଳେ ୨,୨୩୬ଟି ଟ୍ୟାଙ୍କ ଅଛି। ଦକ୍ଷିଣ କୋରିଆ ବିଶ୍ୱର ୫ମ ବୃହତ୍ତ ସାମରିକ ଶକ୍ତି। ଏହି ତଥ୍ୟରୁ ଏହା ସ୍ପଷ୍ଟ ଯେ ଏସିୟାର ୩ଟି ଦେଶ ଚୀନ୍, ଭାରତ ଓ ଦକ୍ଷିଣ କୋରିଆ ଶୀର୍ଷ ୫ଟି ଦେଶଙ୍କ ସୂଚୀରେ ଅଛନ୍ତି। ଯାହା ଏହି କ୍ଷେତ୍ରର ସାମରିକ ପ୍ରସ୍ତୁତିକୁ ଦର୍ଶାଉଛି। ତେବେ ଆଗାମୀ ସମୟରେ ବୈଶ୍ୱିକ ସୈନ୍ୟ ସମିକରଣରେ ଆହୁରି ବି ପରିବର୍ତ୍ତନ ଆସିପାରେ।
