ନୂଆଦିଲ୍ଲୀ ୨୨।୦୪: ଭାରତର ଗ୍ରାଣ୍ଡମାଷ୍ଟର୍ ଡି ଗୁକେଶ । ୧୭ ବର୍ଷ ବୟସରେ କ୍ୟାଣ୍ଡିଡେଟ୍ସ ଚେସ ଟୁର୍ଣ୍ଣାମେଣ୍ଟ ଜିତି ସୃଷ୍ଟି କରିଛନ୍ତି ଇତିହାସ । ଏହି ବିଜୟ ସହିତ ଗୁକେଶ କ୍ୟାଣ୍ଡିଡେଟ୍ସ ଚେସ ଟୁର୍ଣ୍ଣାମେଣ୍ଟରେ ବିଶ୍ୱ ଚାମ୍ପିୟନକୁ ଆହ୍ବାନ ଦେଉଥିବା ସର୍ବକନିଷ୍ଠ ଖେଳାଳି ହୋଇଛନ୍ତି । ଏହି ବିଜୟ ସହିତ ଭାରତୀୟ ତାରକା ୪୦ ବର୍ଷ ପୁରୁଣା ରେକର୍ଡ ଭାଙ୍ଗିଛନ୍ତି । ବର୍ତ୍ତମାନ ଗୁକେଶ ଚଳିତ ବର୍ଷ ଶେଷରେ ଚୀନ୍ ବିଶ୍ୱକପ୍ ଚାମ୍ପିଅନ୍ ଡିଙ୍ଗ୍ ଲିରିନ୍ଙ୍କ ବିପକ୍ଷରେ ଖେଳିବାର ସୁଯୋଗ ପାଇବେ।
ଗୁକେଶଙ୍କ ପୂର୍ବରୁ କମ୍ ବୟସରେ କ୍ୟାଣ୍ଡିଡେଟ୍ସ ଚେସ ଟୁର୍ଣ୍ଣାମେଣ୍ଟ ଜିତିବାର ରେକର୍ଡ ଋଷର ଗୌରୀ କାସ୍ପରୋଭଙ୍କ ନାଁରେ ରହିଥିଲା । ଯିଏକି ୧୯୮୪ରେ ନିଜ ଦେଶ ନାତୋଲି କାର୍ପୋଭଙ୍କୁ ଚ୍ୟାଲେଞ୍ଜ କରିବାକୁ ଯୋଗ୍ୟତା ଅର୍ଜନ କରିଥିଲେ। ସେତେବେଳେ କାସ୍ପରୋଭଙ୍କୁ ୨୨ବର୍ଷ ବୟସ ହୋଇଥିଲା। କିନ୍ତୁ ବର୍ତ୍ତମାନ ଗୁକେଶ ୧୭ବର୍ଷ ବୟସରେ ଏହି ସଫଳତା ହାସଲ କରିଛନ୍ତି ।
ଏହି ଟୁର୍ନାମେଣ୍ଟ ଜିତିବା ପାଇଁ ଗୁକେଶ ଶେଷ ରାଉଣ୍ଡରେ ଆମେରିକାର ହିକାରୁ ନାକାମୁରାଙ୍କ ସହ ଡ୍ର ଖେଳିଥିଲେ । ଟୁର୍ଣ୍ଣାମେଣ୍ଟରେ ଗୁକେଶ ୧୪ ପଏଣ୍ଟ ମଧ୍ୟରୁ ୯ ସ୍କୋର କରିଥିଲେ । ଶେଷ ରାଉଣ୍ଡ ପୂର୍ବରୁ ପଏଣ୍ଟ ଟେବୁଲରେ ଗୁକେଶ ଶୀର୍ଷ ସ୍ଥାନରେ ରହିଥିଲେ । ୧୭ ବର୍ଷୀୟ ଗୁକେଶ ୧୩ ରାଉଣ୍ଡ୍ ସୁଦ୍ଧା ୮.୫ ପଏଣ୍ଟ ପାଇଛନ୍ତି ।
ରୁଷିଆର ଇଆନ ନେପୋମନିଆଚି, ଆମେରିକାର ହିକାରୁ ନାକାମୁରା ଓ ଫାବିଆନୋ କାରୁଆନା ପ୍ରତ୍ୟେକ ୮ ପଏଣ୍ଟ ପାଇ ମିଳିତ ଦ୍ୱିତୀୟ ସ୍ଥାନରେ ରହିଛନ୍ତି । ଅନ୍ତିମ ରାଉଣ୍ଡ୍ରେ ଗୁକେଶ-ନାକମୁରା ଏବଂ ନେପୋମନିଆଚି-କାରୁଆନା ସାମ୍ନାସାମ୍ନି ହେବ ।
