ନୂଆଦିଲ୍ଲୀ: ବିହାରର ଦରଭଙ୍ଗାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଅପମାନଜନକ ଶବ୍ଦ ବ୍ୟବହାର କରିଥିବା ପ୍ରତିବାଦରେ ବିଜେପି କର୍ମୀଙ୍କ ବିକ୍ଷୋଭ। ପାଟନାରେ ବିଜେପି କର୍ମୀମାନେ କଂଗ୍ରେସ କାର୍ଯ୍ୟାଳୟ ବାହାରେ ହଙ୍ଗାମା କରିଥିଲେ। ଏହି ସମୟରେ ବିଜେପି ଏବଂ କଂଗ୍ରେସ କର୍ମୀଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲା। ବିଜେପି କର୍ମୀ ଏବଂ ସମର୍ଥକମାନେ କଂଗ୍ରେସ କାର୍ଯ୍ୟାଳୟରେ ଧସେଇ ପଶିଥିଲେ।
ବିଜେପି କର୍ମୀମାନେ କଂଗ୍ରେସ କାର୍ଯ୍ୟାଳୟର ଗେଟ୍ ଭାଙ୍ଗି ଭିତରକୁ ପ୍ରବେଶ କରି ଲାଠି ମାଡ଼ କରିଥିଲେ। ସେମାନେ କାର୍ଯ୍ୟାଳୟରେ ପାର୍କିଂ ହୋଇଥିବା ଗାଡିଗୁଡ଼ିକୁ ଭଙ୍ଗାରୁଜା କରିଥିଲେ। ଇଟା ଏବଂ ପଥର ମଧ୍ୟ ଫିଙ୍ଗିଥିଲେ। ଏଥିରେ କିଛି କଂଗ୍ରେସ କର୍ମୀ ମଧ୍ୟ ଆହତ ହୋଇଛନ୍ତି। ଜଣେ କର୍ମୀଙ୍କ ମୁଣ୍ଡ ଫାଟି ଯାଇଛି। ବିଜେପି ନେତାମାନେ ସଦାକତ ଆଶ୍ରମକୁ ଶୋଭାଯାତ୍ରାରେ ଯାଇ ରାହୁଲ ଗାନ୍ଧୀ ଏବଂ INDIA ମେଣ୍ଟର ଅନ୍ୟ ନେତାମାନଙ୍କ ବିରୁଦ୍ଧରେ ସ୍ଲୋଗାନ ଦେଇଥିଲେ।
ଏହି ପ୍ରତିବାଦ ସମୟରେ, ବିଜେପି କର୍ମୀମାନେ ପାଟନାରେ ଥିବା କଂଗ୍ରେସ ରାଜ୍ୟ ମୁଖ୍ୟାଳୟ 'ସଦାକତ ଆଶ୍ରମ' ଭଙ୍ଗାରୁଜା କରିଥିଲେ। ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ପାଟନା ପୋଲିସ ମୃଦୁ ଲାଠିମାଡ଼ କରିବାକୁ ପଡିଥିଲା। ଘଟଣାସ୍ଥଳରୁ ବିଜେପି ଏବଂ କଂଗ୍ରେସ କର୍ମୀଙ୍କୁ ହଟାଇ ପୋଲିସ ପରିସ୍ଥିତିକୁ ନିୟନ୍ତ୍ରଣକୁ ଆଣିଥିଲା।
ପ୍ରକାଶଥାଉକି ବୁଧବାର ଦରଭଙ୍ଗାରେ ରାହୁଲ ଗାନ୍ଧୀ ଏବଂ ତେଜସ୍ୱୀ ଯାଦବଙ୍କ ଭୋଟର ଅଧିକାର ରାଲି ସମୟରେ ମଞ୍ଚରୁ ପ୍ରଧାନମନ୍ତ୍ରୀ ମୋଦି ଏବଂ ତାଙ୍କ ମାଆଙ୍କ ପାଇଁ ଅପମାନଜନକ ଶବ୍ଦ ବ୍ୟବହାର କରାଯାଇଥିଲା। କିନ୍ତୁ, ଏହି ସମୟରେ ରାହୁଲ କିମ୍ବା ତେଜସ୍ୱୀ ମଞ୍ଚରେ ଉପସ୍ଥିତ ନଥିଲେ। ଏହି ଘଟଣାର ଭିଡିଓ ସୋସିଆଲ ମିଡିଆରେ ମଧ୍ୟ ଭାଇରାଲ ହେଉଛି। ଅଭିଯୁକ୍ତକୁ ବିହାର ପୋଲିସ ଗିରଫ କରିଛି। ତାଙ୍କୁ ରିଜଭି ଓରଫ ରାଜା ଭାବରେ ଚିହ୍ନଟ କରାଯାଇଛି, ଯିଏ ଦରଭଙ୍ଗାର ବାସିନ୍ଦା। ଏଥିପାଇଁ କେନ୍ଦ୍ର ଗୃହମନ୍ତ୍ରୀ ଅମିତ ଶାହ କଂଗ୍ରେସ ଏବଂ ଆରଜେଡିକୁ ତୀବ୍ର ସମାଲୋଚନା କରିଛନ୍ତି।
