ନୂଆଦିଲ୍ଲୀ ୦୪/୦୮: ବୟସ ଜାଲିଆତି ରୋକିବାକୁ ଅଣ୍ଟା ଭିଡିଛି ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ (BCCI) । ଏହା ଅଧୀନରେ, ବୋର୍ଡ ଖେଳାଳିଙ୍କ ତଦନ୍ତ ପାଇଁ ଏକ ବାହ୍ୟ ଏଜେନ୍ସି ନିଯୁକ୍ତ କରିବ। ଯାହା ଖେଳାଳିଙ୍କ ଯୋଗ୍ୟତା ଯାଞ୍ଚ କରିବ। ରିପୋର୍ଟ ଅନୁଯାୟୀ, ଏଥିପାଇଁ RPF (ପ୍ରସ୍ତାବର ଅନୁରୋଧ) ଜାରି କରାଯାଇଛି। ଯେଉଁଥିରେ ବଡ଼ ଓ ଜଣାଶୁଣା କମ୍ପାନୀଗୁଡ଼ିକୁ ନିଲାମ ପ୍ରକ୍ରିୟାରେ ସାମିଲ ହେବାକୁ ଆମନ୍ତ୍ରଣ କରାଯାଇଛି।

ଏହି ନୂଆ ନିୟମ ଅନୁଯାୟୀ, BCCI ଦୁଇ-ସ୍ତରୀୟ ବୟସ ଯାଞ୍ଚ ବ୍ୟବସ୍ଥା କରିଛି । ଦୁଇ-ସ୍ତରୀୟ ବୟସ ଯାଞ୍ଚ ବ୍ୟବସ୍ଥାରେ ଡକ୍ୟୁମେଣ୍ଟ ଓ ଜନ୍ମ ପ୍ରମାଣପତ୍ରର ଯାଞ୍ଚ ଅନ୍ତର୍ଭୁକ୍ତ ରହିବ । ଯାହା ଖେଳାଳିଙ୍କ ବୟସ ନିର୍ଣ୍ଣୟ କରିବ । ଏହା ପରେ, TW3 ଅର୍ଥାତ୍ ଟାନର୍ ହ୍ୱାଇଟ୍‌ହାଉସ୍ ୩ । ଯେଉଁଥିରେ ହାଡ଼ ପରୀକ୍ଷା ହେବ। ଏଗୁଡ଼ିକ ପ୍ରାୟତଃ ୧୬ ବର୍ଷରୁ କମ୍ ପୁଅ ଓ ୧୫ ବର୍ଷରୁ କମ୍ ଝିଅଙ୍କ ସ୍ତରରେ କରାଯାଏ।

ଏହି ବାହ୍ୟ ଏଜେନ୍ସି ନିଲାମ ପ୍ରକ୍ରିୟା ଅଗଷ୍ଟ ଶେଷ ସୁଦ୍ଧା ହେବାର ଆଶା କରାଯାଉଛି । କ୍ରିକବଜ୍ ରିପୋର୍ଟ ଅନୁଯାୟୀ, ଏହି ପଦକ୍ଷେପ ପଛରେ କାରଣ ସମ୍ପୂର୍ଣ୍ଣ ସ୍ପଷ୍ଟ ନୁହେଁ । କିନ୍ତୁ ଏହା ଦେଖାଯାଉଛି ଯେ ଦାଖଲ କରାଯାଇଥିବା ଡକ୍ୟୁମେଣ୍ଟ କିମ୍ବା ପ୍ରମାଣପତ୍ର ସନ୍ଦେହଜନକ ଥିବା ମାମଲା ପରେ ଏହା ଘଟିଛି। BCCI ସିଷ୍ଟମରେ ଅଧିକ ବୟସର ଖେଳାଳିଙ୍କ ପ୍ରବେଶର ସମ୍ଭାବନାକୁ ଦୂର କରିବାକୁ ଲକ୍ଷ୍ୟ ରଖିଛି।

BCCI ବିଡିଂ କମ୍ପାନୀ କିମ୍ବା ଏଜେନ୍ସି ପାଇଁ କିଛି ସର୍ତ୍ତ ମଧ୍ୟ ରଖିଛି। ଯେପରିକି ସେମାନଙ୍କର ଫାର୍ମଗୁଡ଼ିକୁ ଯାଞ୍ଚ ସେବା ପ୍ରଦାନ କରିବାରେ ଅତି କମରେ ୩ ବର୍ଷର ଅଭିଜ୍ଞତା ରହିବା ଉଚିତ । ଭାରତରେ ଏକ ନେଟୱର୍କ ରହିବା ଉଚିତ କିମ୍ବା ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଶାରୀରିକ ଏବଂ ଡିଜିଟାଲ୍ ଭାବରେ ଯାଞ୍ଚ କରିବାର କ୍ଷମତା ରହିବା ଉଚିତ।

ରିପୋର୍ଟ ଅନୁଯାୟୀ, BCCI ଚାହୁଁଛି ଯେ ସେମାନେ ପରିଚୟ ପ୍ରମାଣ (ଆଧାର, ପାସପୋର୍ଟ), ବୟସ ପ୍ରମାଣ (ଜନ୍ମ ପ୍ରମାଣପତ୍ର, ସ୍କୁଲ ରେକର୍ଡ), ବାସସ୍ଥାନ ପ୍ରମାଣ, ଶିକ୍ଷାଗତ ରେକର୍ଡ ଇତ୍ୟାଦି ସମେତ ବିଭିନ୍ନ ଡକ୍ୟୁମେଣ୍ଟ ଯାଞ୍ଚ କରିବାର କ୍ଷମତା ପ୍ରଦର୍ଶନ କରନ୍ତୁ । ଆବଶ୍ୟକ ହେଲେ, ବିଶେଷକରି ଗ୍ରାମାଞ୍ଚଳରେ ବ୍ୟକ୍ତିଗତ ଭାବରେ କ୍ଷେତ୍ର ଯାଞ୍ଚ କରିବାର କ୍ଷମତା ମଧ୍ୟ ରଖନ୍ତୁ।

ଯଦି କୌଣସି ଖେଳାଳି ବୟସ ଜାଲିଆତିରେ ଦୋଷୀ ସାବ୍ୟସ୍ତ ହୁଅନ୍ତି । ତେବେ ତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଆପଣଙ୍କୁ ଜଣାଇ ଦେଉଛୁ ଯେ ଅନେକ ଖେଳାଳିଙ୍କ ବିରୁଦ୍ଧରେ ବୟସ ଜାଲିଆତି ଅଭିଯୋଗ ଆସିଛି । ସମ୍ପ୍ରତି, ବୈଭବ ସୂର୍ଯ୍ୟବଂଶୀଙ୍କ ବୟସ ବିଷୟରେ ମଧ୍ୟ ପ୍ରଶ୍ନ ଉଠିଥିଲା । କିନ୍ତୁ ଏହି ଦାବିଗୁଡ଼ିକ ମିଥ୍ୟା ପ୍ରମାଣିତ ହୋଇଥିଲା।