ବେଙ୍ଗାଲୁରୁ: ‘ଆପଣ କଣ ଇତିହାସବିତ୍…?’ ଏହି ପ୍ରଶ୍ନ ପଚାରିବା ସହ ଅଭିନେତା କମଲ ହାସନଙ୍କୁ କଡ଼ା ଭର୍ତ୍ସନା କରିଛନ୍ତି କର୍ଣ୍ଣାଟକ ହାଇକୋର୍ଟ। କନ୍ନଡ-ତାମିଲ ଭାଷାକୁ ନେଇ ଚାଲିଥିବା ବିବାଦରେ ହାଇକୋର୍ଟ କହିଛନ୍ତି ଯେ ବ୍ୟକ୍ତିର ସ୍ୱାଧୀନତା ଆଳରେ ଲୋକଙ୍କ ଭାବନାକୁ ଆଘାତ ଦିଆଯାଇପାରିବ ନାହିଁ। କମଲ ହାସନ କନ୍ନଡ ଏବଂ ତାମିଲ ଭାଷାକୁ ନେଇ ଏକ ବୟାନ ଦେଇଥିଲେ।
କମଲ ହାସନ ତାଙ୍କ ଆଗାମୀ ଫିଲ୍ମ 'ଠଗ୍ ଲାଇଫ୍'ର ଅଡିଓ ଲଞ୍ଚ ସମୟରେ କହିଥିଲେ ଯେ କନ୍ନଡ ଭାଷା ତାମିଲରୁ ଜନ୍ମ ହୋଇଛି। ଏହାକୁ ନେଇ ବିବାଦ ସୃଷ୍ଟି ହୋଇଥିଲା। ଏହି ମାମଲା କୋର୍ଟ ପର୍ଯ୍ୟନ୍ତ ପହଞ୍ଚିଥିଲା। କର୍ଣ୍ଣାଟକ ହାଇକୋର୍ଟରେ ଜଷ୍ଟିସ୍ ଏମ୍. ନାଗପ୍ରସନ୍ନାଙ୍କ ଖଣ୍ଡପୀଠ ଅଭିନେତାଙ୍କୁ କହିଥିଲେ ଯେ ଆପଣ ଜନସାଧାରଣଙ୍କ ଭାବନାକୁ ଆଘାତ ଦେଇପାରିବେ ନାହିଁ। ଆପଣ ନିଜେ ଏହି ପରିସ୍ଥିତିର କାରଣ। ଅଭିନେତା କମଲ ହାସନ ମଧ୍ୟ ଏହି ମାମଲାରେ କ୍ଷମା ମାଗିବାକୁ ମନା କରିଦେଇଛନ୍ତି। ସେ କହିଛନ୍ତି ଯେ ଏହି ବୟାନ ଏକତା ବୃଦ୍ଧି କରିବା ଉଦ୍ଦେଶ୍ୟରେ ଦିଆଯାଇଥିଲା।
କମଲ ହାସନଙ୍କ ନୂଆ ଫିଲ୍ମ 'ଠଗ୍ ଲାଇଫ୍' ବିଷୟରେ ଉଲ୍ଲେଖ କରି କୋର୍ଟ କହିଛନ୍ତି, "ଆପଣଙ୍କର କହିବାର ଅଧିକାର ଅଛି, କିନ୍ତୁ ଭାବନାକୁ ଆଘାତ ଦେବାର ନୁହେଁ। ବ୍ୟକ୍ତିର ସ୍ୱାଧୀନତା ନାମରେ, ଏହାକୁ ଏତେ ପରିମାଣରେ ଦିଆଯାଇପାରିବ ନାହିଁ ଯେ ଏହା ଜନସାଧାରଣଙ୍କ ଭାବନାକୁ ଆଘାତ କରେ। ଯଦି ଆପଣ କାହାକୁ ଆଘାତ ଦେଇଛନ୍ତି, ତେବେ କ୍ଷମା ପ୍ରାର୍ଥନା କରନ୍ତୁ।
କମଲ ହାସନଙ୍କ ଫିଲ୍ମ ଠଗ୍ ଲାଇଫ୍ ଜୁନ୍ ୫ରେ ରିଲିଜ୍ ହେବାକୁ ଯାଉଛି। ଏହା ମଧ୍ୟ ବିବାଦରେ ଘେରି ରହିଛି। ଫିଲ୍ମ ବ୍ୟାନ କରିବାକୁ ଅନେକ ନେତା ଧମକ ବି ଦେଇଛନ୍ତି।
