ନୂଆଦିଲ୍ଲୀ ୨୯।୦୮; କର୍ଣ୍ଣାଟକର ଦକ୍ଷିଣ ବେଙ୍ଗାଲୁରୁରେ ଆଶ୍ଚର୍ଯ୍ୟଜନକ ଘଟଣା । ପୁଣି ଯୌତୁକ ପାଇଁ ଗଲା ଆଉ ଏକ ଜୀବନ । ଜଣେ ୨୭ ବର୍ଷୀୟା ମହିଳା ଇଞ୍ଜିନିୟରଙ୍କ ଆତ୍ମହତ୍ୟାର ଘଟଣା ସାମ୍ନାକୁ ଆସିଛି। ଇନଫୋସିସ୍ରେ ଇଞ୍ଜିନିୟର ଥିବା ଶିଳ୍ପାଙ୍କ ବାପାମାଆ ଅଭିଯୋଗ କରିଛନ୍ତି ଯେ ତାଙ୍କ ସ୍ୱାମୀ ଏବଂ ଶ୍ୱଶୁର ଘର ଲୋକଙ୍କ ଯୌତୁକ ନିର୍ଯାତନା ଯୋଗୁଁ ସେ ଜୀବନ ହାରିଛନ୍ତି। FIR ପରେ ଶିଳ୍ପାଙ୍କ ସ୍ୱାମୀ ପ୍ରବୀଣଙ୍କୁ ଗିରଫ କରାଯାଇଛି। ଶିଳ୍ପାଙ୍କ ବିବାହ ଅଢେଇ ବର୍ଷ ପୂର୍ବେ ପ୍ରବୀଣଙ୍କ ସହ ହୋଇଥିଲା । ସେମାନଙ୍କର ଏକ ଦେଢ଼ ବର୍ଷର ପିଲା ମଧ୍ୟ ଅଛି।
ଶିଳ୍ପାଙ୍କ ବାପା-ମାଆଙ୍କ ଅଭିଯୋଗ ଅନୁଯାୟୀ, ବିବାହ ସମୟରେ ପ୍ରବୀଣଙ୍କ ପରିବାର ନଗଦ ୧୫ ଲକ୍ଷ ଟଙ୍କା, ୧୬୦ ଗ୍ରାମ ସୁନା ଏବଂ ଘରକରଣା ସାମଗ୍ରୀ ଦାବି କରିଥିଲେ। ଏହି ଦାବି ପୂରଣ କରିବା ସତ୍ତ୍ୱେ, ବିବାହ ପରେ ଶିଳ୍ପାଙ୍କ ଶ୍ୱଶୁର ଘର ଲୋକେ ଅତିରିକ୍ତ ଟଙ୍କା ଏବଂ ମୂଲ୍ୟବାନ ଜିନିଷପତ୍ର ଦେବାକୁ ଚାପ ପକାଇବା ଆରମ୍ଭ କରିଥିଲେ। ଏତିକି ହିଁ ନୁହେଁ ଶିଳ୍ପାଙ୍କ ଦାଦା କହିଛନ୍ତି, 'ଆମେ ତିନି ବର୍ଷ ପୂର୍ବରୁ ଧୁମ୍ଧାମରେ ବିବାହ କରିଥିଲୁ। ଆମେ ଆମର ଘର ବିକ୍ରି କଲୁ ଓ ବିବାହରେ ୪୦ ଲକ୍ଷ ଖର୍ଚ୍ଚ କରିଥିଲୁ। ବିବାହ ସମୟରେ ଆମେ ତାଙ୍କୁ ୧୬୦ ଗ୍ରାମ ସୁନା ଅଳଙ୍କାର ମଧ୍ୟ ଦେଇଥିଲୁ।
ବିବାହ ସମୟରେ, ପ୍ରବୀଣ ନିଜକୁ BE, M.Tech ସ୍ନାତକ ବୋଲି କହିଥିଲା। କିନ୍ତୁ ଗତ ଦୁଇ ବର୍ଷ ଧରି ସେ ଗୁପ୍ଚୁପ ବିକ୍ରି କରୁଛି। ହେଲେ ଆମ ଝିଅ ଇନଫୋସିସ୍ରେ କାମ କରୁଥିଲା। ସବୁଠାରୁ ବଡ କଥା କିଛି ମାସ ପୂର୍ବରୁ, ସେ ଆମଠାରୁ ଆଉ ୧୦ ଲକ୍ଷ ନେଇଥିଲେ। ବର୍ତ୍ତମାନ ସେମାନଙ୍କର ଏକ ଦେଢ଼ ବର୍ଷର ପିଲା ଅଛି ଏବଂ ସେ ପୁଣି ଗର୍ଭବତୀ ଥିଲା। କହିବାକୁ ଗଲେ ଘର ଭିତରେ ଫ୍ୟାନ୍ ତଳେ କୌଣସି ଚେୟାର କିମ୍ବା କିଛି ରଖାଯାଇ ନ ଥିବାରୁ ପରିବାର ମଧ୍ୟ ହତ୍ୟା ସନ୍ଦେହ କରୁଛନ୍ତି। ଫ୍ୟାନ୍ ମଧ୍ୟ ଏତେ ଉଚ୍ଚତାରେ ନଥିଲା ଯେ କେହି ସହଜରେ ପହଞ୍ଚିପାରିବେ। କବାଟ ଭାଙ୍ଗିବାର ହେବାର କୌଣସି ଚିହ୍ନ ମଧ୍ୟ ନଥିଲା।
